ޕޮލިސް ކޮމިޝަނަރު އޮފީހުގެ ޒިންމާ އިން އެސިސްޓެންޓް ކޮމިޝަނަރު އޮފް ޕޮލިސް އަހްމަދު ޝިފާން ދުރުކޮށްފިއެވެ.

ފުލުހުން މިއަދު ބުނީ ސާވިސް ޑިވެލޮޕްމަންޓުގެ އިސްވެރިއަކަށް ހުންނެވި އެސިސްޓެންޓް ކޮމިޝަނާ އޮފް ޕޮލިސް މޫސާ އަލީ ކޮމިޝަނަރު އޮފީހުގެ ހެޑަކަށް ހަމަޖައްސާފައިވާ ކަމަށެވެ.

އަދި ޝިފާން، ސާވިސް ޑިވެލޮޕްމަންޓް ޑައިރެކްޓްރޭޓަކަށް ބަދަލުކޮށްފައިވާ ކަމަށެވެ. އެ ބަދަލުތައް ގެނައިކަން އިއްޔެ ފުލުހުންގެ އިދާރާގައި މަސައްކަތް ކުރާ ފަރާތްތަކަށް ވަނީ އަންގައިފައެވެ. ނަމަވެސް އެ ބަދަލު ގެނައި ސަބަބެއް ފުލުހުން ހާމައެއް ނުކުރެއެވެ. ފުލުހުން ބުނީ ފުލުހުންގެ އިދާރާ ހިންގުމުގެ ބަހާތަކަށް އަބަދުވެސް ބަދަލުތައް ގެންނަމުން އަންނަ ކަމަށެވެ.

މައުލޫމާތު ލިބިފައިވާ ގޮތުގައި މިހާރު ފުލުހުންގެ ތަރުޖަމާނެއްގެ މަގާމުގައި ހުންނެވި ޝިފާން އެ މަގާމުން ވެސް ދުރުކޮށް އެ މަގާމަށް އައު ބޭފުޅަކު ހަމަޖައްސަވަން އޮތީ ނިންމައިފައެވެ.