ރާއްޖޭގައި ވޭޕް ބޭނުން ކުރުން މަނާ ކުރުމަށް ސަރުކާރުން ނިންމާފައިވުމާއެކު ވޭޕް ކުރާ އާލާތްތައް ވިއްކާ ފިހާރަތައް ބަންދުކޮށްފިއެވެ.

ވޭޕް ކުރާ އާލާތްތައް ވިއްކާ ފިހާރައެއްގެ ވެރިޔަކު "ހަތާވީސް" އަށް މިއަދު ބުނީ އޭނާގެ ފިހާރަ ބަންދުކުރީ މިއަދު ކަމަށެވެ. އޭނާ ފަދައިން ވޭޕް ކުރާ އާލާތްތައް ވިއްކާ އެހެން ބައެއް ފަރާތްތަކުން ވެސް ފިހާރަތައް ބަންދު ކުރަމުން އަންނަ ކަމަށް ބުންޏެވެ.

ރާއްޖޭގައި ވޭޕް ކުރުން މަނާ ކުރަން ނިންމާފައިވާކަން އިއުލާން ކުރެއްވީ ރައީސް ޑރ. މުހައްމަދު މުއިއްޒުއެވެ. އެގޮތަށް ނިންމެވިކަން އިއުލާން ކުރެއްވީ މިމަހުގެ 14ވަނަ ދުވަހުއެވެ.

ވޭޕް ކުރާ އާލާތްތައް ވިއްކާ ފިހާރައެއް ހިންގަމުން އަންނަ އިތުރު ފަރާތަކުން ވާހަކަދައްކަމުން ބުނީ ކުއްލި އަކަށް ސަރުކާރުން ނިންމި އެ ނިންމުމުގެ ސަބަބުން ބޮޑު ގެއްލުމެއް ކުރިމަތިވާނެ ކަމަށެވެ.

"އެންމެން އަކީ ބޮޑު ކެޕިޓަލެއް ހުރެގެން މި މަސައްކަތް ކުރަމުން އަންނަ ބައެއް ނޫން. ހަމަ ލޯނު ނަގައިގެން ވެސް މި މަސައްކަތް ކުރާ މީހުން އެބަތިބި. އަނެއްކާ އިތުރު ޝިޕްމަންޓުތައް ޖަހާފައި ތިބި މީހުން އެބަތިބި. ކިހާ ބޮޑު ގެއްލުމެއް ދޯ އަސްލު މިއީ،" އޭނާ ބުންޏެވެ.

އިތުރަށް ބުނީ އެ މަސައްކަތް ކުރާ ގިނަ މީހުން އެކަން ކުރަމުން އަންނަނީ މުވައްޒަފުން ވެސް ނަގައިގެން ކަމަށާއި މުވައްޒަފުން ވަޒީފާ އިން ވަކި ކުރާ ނަމަ ކަން ކުރަން ވަކި ގޮތެއް ގާނޫނުގައި އޮންނަ ކަމަށެވެ. ނަމަވެސް މިއަދު ފިހަރާތައް ބަންދު ކުރުމުން އެ މުވައްޒަފުންގެ ވަޒީފާތައް ވެސް ގެއްލިގެން ދާނެކަން ފާހަގަކުރިއެވެ.

"މިއީ އަސްލު ވަރަށް ޕްލޭންކޮށް ސަރުކާރުން ކޮށްފައިވާ ކަމެއް. ގިނަ ބަޔަކަށް މިކަމުން ގެއްލުންތަކެއް ވާނެ،" ވޭޕްކުރާ އާލާތްތައް ވިއްކާ ފިހާރައެއް ހިންގަމުން ދިޔަ މީހަކު ބުންޏެވެ.

ރައީސް ވިދާޅުވީ ވޭޕް ކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން އަންނަ މަހުގެ 15ވަނަ ދުވަހުން ފެށިގެން މަނާ ކުރުމަށް ނިންމަވާފައިވާ ކަމަށެވެ.

"ދިވެހިރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭބެހުން 15 ޑިސެމްބަރ 2024 އިން ފެށިގެން މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އަޅުގަނޑު އަންގައިފިން،" އިތުރަށް ރައީސް ވިދާޅުވިއެވެ.