އިމާރާތެއްގެ މަތިން ވެއްޓި ނިޔާވި ގއ. މާމެންދޫ، ބީޗްވިލާ، ވިފާގު އިބްރާހިމް އަދުނާން، 25، މަރުވި މައްސަލައިގެ މައުލޫމާތު ދިނުމަށް ފުލުހުން އިއްޔެ ބޭއްވި ނޫސްވެރިންގެ ބައްދަލުވުމުގައި ދެކެވުނު ބައެއް ވާހަކަތަކަށް އާއްމުންގެ ކިބައިން މައާފަށް އެދިއްޖެއެވެ.

އެމްޕީއެލް ސަރަހައްދެއްގައި ހުންނަ ހަސޯވާގޭގެ 10 ވަނަ ބުރީގެ ބެލްކަނިން ވިފާގު ވެއްޓި ނިޔާވެފައި ވަނީ އޮގަސްޓް 14، 2024، ގައެވެ.

ވިފާގުގެ މަރާ ގުޅިގެން ފުލުހުން އިއްޔެ ބޭއްވި ނޫސްވެރިންގެ ބައްދަލުވުމުގައި ވިފާގުގެ ޒާތީ ބައެއް މައުލޫމާތުތައް ހާމަ ކޮށްފައި ވާތީ އެކަމާ ފުލުހުންނަށް ވަރަށް ބޮޑަށް އާއްމުން ވަނީ ފާޑުކިޔައިފައެވެ.

ފުލުހުން މިރޭ ނެރުނު ބަޔާނެއްގައި ބުނީ ނޫސްވެރިންގެ ބައްދަލުވުމުގައި އެ މައްސަލައިގެ ތަހުގީގާއި ގުޅުން ހުރި މައުލޫމާތު ދިނުމުގައި މައްސަލައާ ގުޅުން ހުރި ތަފްސީލް މައުލޫމާތުތަކެއް، ފުލުހުންގެ ފަރާތުން ދީފައި ވަނީ އެ މައްސަލައާ ގުޅޭގޮތުން މީޑިއާއަކުން އެކަމުގެ ހަގީގަތް އޮޅޭ ގޮތަށް، ފުލުހުންގެ މުއައްސާސާގެ ތަހްގީގު ކުރިއަށް ގެންގޮސްފައިވާ ގޮތާއި ގުޅޭގޮތުން އަދި ނިޔާވެފައިވާ ފަރާތުގެ އާއިލާގެ ބައެއް ފަރާތްތަކާއިވެސް ގުޅޭގޮތުން ހަގީގަތާއި ހިލާފު ވާހަކަތަކެއްވެސް ހިމެނޭ ގޮތަށް ޕްރޮގްރާމެއް ތަކުރާރުކޮށް ބްރޯޑްކާސްޓް ކޮށްފައިވާތީ ކަމަށެވެ.

އެ މައްސަލާގައި މަޖިލީހުގެ ނައިބު ރައީސް އަހުމަދު ނާޒިމަށް ތުހުމަތުތަކެއްކޮށް، ޗެނަލް13 އިން ވަނީ ރިޕޯޓެއް ގެނެސްފައެވެ. ފުލުހުންގެ ބަޔާނުގައި އެބުނާ ވާހަކައަކީ އެއީއެވެ.

ފުލުހުން ބުނީ އެ މައުލޫމާތުތައް ފުލުހުންގެ ފަރާތުން ދީފައި ވަނީ ނިޔާވި ޒުވާނާގެ މަންމަ އަދި ބައްޕަ ހިމެނޭ ގޮތަށް އާއިލާއަށްވެސް އެކަން އެނގިގެން ކަމަށްވެސް ފުލުހުން ވިދާޅުވިއެވެ.

"އެ މީޑީއާ ބްރީފިންގ ކުރިއަށް ގެންދިއުމުގައި ބައެއް ސެންސިޓިވް ވާހަކަތައް އެންމެ ރަނގަޅު ނޫން ގޮތުގައި ގެނެސްދެވުނުކަން މި ހިދުމަތުގެ ފަރާތުން ގަބޫލުކޮށް، އެކަމަށް އެންމެހާ ފަރާތްތަކުގެ ކިބައިން ނިހާޔަތަށް މައާފަށް އެދެމެވެ،" ފުލުހުން ބުންޏެވެ.

ވިފާގަކީ ގދ. ފަރެސްމާތޮޑާ ބަގީޗާގޭ، ޒީނަތު އަބްދުﷲ އާއި ގއ. މާމެންދޫ ބީޗްވިލާ، އިބްރާހިމް އަދުނާން އަނީސްގެ ކައިވެންޏަށް ލިބިފައިވާ ތިން ކުދިންގެ ތެރެއިން ދެ ވަނަ ކުއްޖާއެވެ. އަދުނާނަކީ މެރިން ޕޮލިސްގެ ވެރިޔާ އެވެ. އޭނާއަކީ ފުލުހުންގެ ސުޕްރިޓެންޑެންޓެކެވެ. ޒީނަތާއި އަދުނާންގެ ކައިވެނި ރޫޅުނީ އޭޕްރީލް 9، 2003،ގައެވެ.

ވިފާގެ މަރާ ގުޅޭ ގޮތުން އިންކަންދަރު ބިލްޑިންގައި މިއަދު ބޭއްވި ޕްރެސް ކޮންފަރެންސްގައި ޗީފް ސުޕްރިޓެންޑެންޓް ހަސަން ޝިފާއު ވިދާޅުވީ ނާޒިމް، ޒީނަތާ ކައިވެނި ބައްލަވައިގެންނެވީ ޒީނަތުގެ ފުރަތަމަ ކައިވެނި ރޫޅުނުތާ ހަ އަހަރު ފަހުން ޖުލައި 30، 2009،ގައި ކަމަށެވެ.

ވިފާގު ބެލްކަނިން ވެއްޓުނުއިރު، އެ އެޕާޓްމަންޓުގައި ދިރިއުޅެމުން ދިޔައީ ޒީނަތާއި ވިފާގުގެ ދޮން ބައްޕަ، ނާޒިމެވެ. ވިފާގު މަރުވިއިރު އޭނާ ދިޔައީ ނަފްސާނީ ބައްޔަށް ފަރުވާ ހޯދަމުން ކަމަށާއި 2016 ވަނަ އަހަރުން ފެށިގެން ނަފްސާނީ ބައްޔަށް އޭނާ ފަރުވާ ހޯދި ކަމަށް ޝިފާއު ވިދާޅުވިއެވެ.

އޭނާ ވިދާޅުވީ މީގެ ކުރިން ވެސް ވިފާގު ބެލްކަނިން ފުއްމާލަން އުޅެގެން، ރާއްޖެއިން ބޭރަށް ގެންގޮސް ފަރުވާ ހޯދާފައިވާ ކަމަށެވެ.

ނާޒިމް ވިފާގަށް ޖިންސީ ގޯނާ ކުރި ކަމަށް ތުހުމަތު ކުރެވޭ ވާހަތަކަށް އިޝާރާތްކޮށް، ޝިފާއު ވިދާޅުވީ ވިފާގު ނިޔާވެފައި ވަނީ ބިކުރުވެރި ހާލަތުގައި ކަމަށާއި އެހެންކަމުން އެއްވެސް އިރެއްގައި ޖިންސީ ގޯނާއެއް ވިފާގަށް ލިބިފައި ނުވާކަން ކަށަވަރުކުރެވޭ ކަމަށެވެ.

"ވިފާގު ނިޔާވިއިރު، އޭނާ ވަނީ ބިކުރުވެރި ހާލަތެއްގައިކަން ވިފާގުގެ މެޑިކޯ ލީގަލް ރިޕޯޓުން އެނގެން އޮތުމުން، އޭނާއަކީ އެއްވެސް އިރެއްގައި ޖިންސީ ގޯނާގެ ޝިކާރައަކަށްވެފައިވާ މީހެއް ނޫންކަން ކަށަވަރު ކުރެވޭ،" ޝިފާއު ވިދާޅުވިއެވެ.

ވިފާގުގެ މަރާ ގުޅިގެން ޗެނަލް13އިން ގެނެސްދިން ޑޮކިއުމެންޓްރީގެ މައްސަލަ ބްރޯޑްކާސްޓިން ކޮމިޝަންއިން ބަލަމުންދާތީ، އެ ކޮމިޝަނަށް ފުލުހުން އެއްބާރުލުން ދެމުންގެންދާ ކަމަށާއި ނަމަވެސް އެ ޑޮކިއުމެންޓްރީގެ މައްސަލަ ފުލުހުން ނުބަލާ ކަމަށް އޭނާ ވިދާޅުވިއެވެ.