ރައްޔިތުންގެ މަޖިލީހުގެ ރައީސްގެ ރަސްމީ ގެކޮޅު މ. މުރައިދޫގޭ މުވައްޒަފުންނާއި ގުޅޭ މައުލޫމާތުތައް ހާމަ ނުކުރުމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީން (241 ކޮމެޓީ) ނިންމި ނިންމުން ބަދަލު ކޮށްފިއެވެ.

ރައްޔިތުންގެ މަޖިލީހުގެ ރައީސަށް ހާއްސަ ކުރައްވާފައިވާ އެ ގެކޮޅުގައި މުވައްޒަފުންގެ ގޮތުގައި ތިއްބަވާ މީހުންގެ މައުލޫމާތު ހާމަ ކުރުމަށް އެދިފައިވާ މައްސަލާގައި މިއަދު ވަނީ 241 ކޮމެޓީން ހެނދުނުގެ ވަގުތެއްގައި ކޮމެޓީ ބައްދަލުވުމެއް ބޭއްވިއެވެ. އެ ބައްދަލުވުމުގައި ނިންމީ އެ މައުލޫމާތުތައް ސިއްރު ކުރާށެވެ.

ނަމަވެސް ހަވީރު 16:00 އަށް އިތުރު ބައްދަލުވުމެއް ތާވަލުކުރިއެވެ. އެ ބައްދަލުވުމުގައި ކޮމެޓީން ނިންމީ މިއަދު ހެނދުނު އެ ކޮމެޓީން ނިންމި ނިންމުން ބަދަލުކުރާށެވެ. އެގޮތަށް ބަދަލުކުރަން ނިންމީ ރައީސް ޑރ. މުހައްމަދު މުއިއްޒު އެ ނިންމުން ބަދަލު ކުރެއްވުމަށް އެދިވަޑައިގަތުމުން ކަމަށްވެއެވެ.

ހެނދުނުގެ ވަގުތެއްގައި ކޮމެޓީ ބާއްވާ ވަކި ގޮތަކަށް ފާސްކޮށްފައި ވަނިކޮށް އަނެއްކާ ހަމަ އެ މައްސަލާގައި ހަވީރު ކޮމެޓީ ބާއްވާ ކުރިން ނިންމި ނިންމުން ބަދަލުކުރަން އުޅުމުން ކޮމެޓީގައި އިންނެވި ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ (ގަޕޯ) ވަނީ ކަންބޮޑުވުންފާޅު ކުރައްވާފައެވެ.

މަޖިލިސް ރައީސްގެ ރަސްމީ ގެކޮޅު މުރައިދޫގޭގެ އިސް ވެރިޔަކީ ނޫސްވެރިޔާ އާދަމް ހަލީމް (މުންޑޫ) އެވެ. އެގެކޮޅުގެ ޑިރެކްޓަރުގެ މަގާމު ރާއްޖޭގައި އުފެދުނު އެންމެ މޮޅު ފުޓުބޯޅަ ކުޅުންތެރިޔާ އަލީ އަޝްފާގު (ދަގަނޑޭ) އަށް ވަނީ ދީފައެވެ.