ރާއްޖޭގައި ވޭޕް ކުރުން މަނާ ކުރުމަށް ރައީސް ޑރ. މުހައްމަދު މުއިއްޒު މިއަދު ނިންމަވައިފިއެވެ.

އެމަނިކުފާނު އެކްސްގައި މިއަދު ކުރެއްވި ޕޯސްޓެއްގައި ވިދާޅުވީ ވޭޕް ކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން އަންނަ މަހުގެ 15ވަނަ ދުވަހުން ފެށިގެން މަނާ ކުރުމަށް ނިންމަވާފައިވާ ކަމަށެވެ.

"ދިވެހިރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭބެހުން 15 ޑިސެމްބަރ 2024 އިން ފެށިގެން މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އަޅުގަނޑު އަންގައިފިން،" އިތުރަށް ރައީސް ވިދާޅުވިއެވެ.

ރައީސް މިގޮތަށް ނިންމަވާފައި މިވަނީ ރާއްޖޭގައި ވޭޕް ބޭނުން ކުރުމާއި އެތަކެތި ވިއްކުން މަނާ ކޮށްދިނުމަށް އެދި ގައިންގަޔަށް ނާރާ ބަލިތަކާ ދެކޮޅަށް މަސައްކަތްކުރާ އެންސީޑީ އެލަޔަންސް އިން ރައީސްގެ އަރިހުގައި އެދިފައި ވަނިކޮށެވެ.

މީގެއިތުރުން ސްކޫލުތަކުގެ ބެލެނެވެރިންނާއި ގައުމީ ކުޅިވަރު ޖަމިއްޔާތަކުން ވެސް ވަނީ ވޭޕާ ދެކޮޅަށް ނިކުމެފައެވެ.

އައިޖީއެމްއެޗްގެ އެތެރެހަށީގެ ޑރ. މުހައްމަދު އަލީ ވަނީ ވޭޕް ކުރުމަކީ "ކޫލް" ކަމެއް ނޫން ކަމަށާއި އެކަން ކުރުމުގެ ސަބަބުން ފުއްޕާމޭ ފަޅައިގެންދާ ކަމަށް މީގެކުރިން ވިދާޅުވެފައެވެ. ރާއްޖޭގައި ވޭޕް އަކީ ޒުވާން ފިރިހެން ކުދިންނާއި އަންހެން ކުދިންގެ މެދުގައި ވަރަށް މަގުބޫލް އެއްޗެކެވެ. އަދި ސްކޫލު މާހައުލުގައި ވެސް މިތަކެތި ބޭނުން ކުރާ އަދަދު ވެސް ވަނީ އިތުރުވެފައެވެ.

ސިއްހީ މާހިރުން ބުނާ ގޮތުގައި ވޭޕްގެ ސަބަބުން ފުއްޕާމޭގައި ވިޓަމިން އީ އެސެޓޭޓް ނުވަތަ ވިޓަމީން އީ ތެޔޮ ހުރެއެވެ. ވޭޕްގެ ސަބަބުން ކެއްސުމާއި މޭގައި ރިއްސުމާއި ނޭވާ ކުރުވާ ގޮތް ދިމާވެއެވެ.