ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން ހުޅުމާލެ ދެވަނަ ފިޔަވަހީގައި އިމާރާތް ކުރަން ފަށާފައިވާ ފްލެޓުތައް ރައްޔިތުން މަޖިލީހުގެ ޕީއެންސީ އަށް ނިސްބަތްވެވަޑައިގަންނަވާ މެންބަރުންގެ މެދުގައި ބަހާލަން އުޅޭ ކަމަށް ބުނެ ފަތުރަމުން އަންނަ ވާހަކަ ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާހް ދޮގު ކުރައްވައިފިއެވެ.

ފަލާހް އެކްސްގައި ރޭ ކުރެއްވި ޕޯސްޓެއްގައި ވަނީ "ދިޔަވަރު" ނަމަކަށް ކިޔާ ނޫހެއްގައި ޖަހާފައިވާ ހަބަރެއްގެ ފޮޓޯއެއް އާއްމު ކުރައްވައިފައެވެ. އެ ހަބަރުގެ ސުރުހީގައި ވަނީ "ފްލެޓްތައް ޕީއެންސީ މީހުންނަށް ބެހުމަށް، ބައެއް މަޖިލީސް މެމްބަރުންނަށް، ކޮންމެ މެމްބަރަކު ބޭނުންވާ ކޮންމެވެސް 20 މީހެއްގެ ނަން ދިނުމަށް މުއިއްޒު އަންގައިފި" މިހެންނެވެ.

"މިއީ މިއަހަރު ވެސް ހެދުނު އެންމެ ބޮޑު ދޮގު،" އެކްސްގައި ފަލާހް ކުރެއްވި ޕޯސްޓު ފައްޓަވަމުން ވިދާޅުވިއެވެ.

އެއަށްފަހު އޭނާ ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގޯއްޗާއި ފްލެޓުތައް އެއްވެސް ގޮތަކަށް ނުބައްސަވާނެ ކަމަށެވެ. އަދި އެމަނިކުފާނު ވެވަޑައިގެންނެވި ވައުދުފުޅާއި އެއްގޮތަށް ރަނުން ރަނަށް ގޯއްޗާއި ފްލެޓުތައް އޭގެ ހައްގުވެރިންނަށް ދެއްވާނެ ކަމަށް ވިދާޅުވިއެވެ.

"ޕީއެންސީގެ އެއްވެސް އެމްޕީއަކު އެއްވެސް ގޯހެއް ނުހައްދަވާނެ،" ފަލާހް ވިދާޅުވިއެވެ.

އިންޑިއާގެ އެގްޒިމް ބޭންކުން ދީފައިވާ 227 މިލިއަން ޑޮލަރުގެ އެހީގައި ހުޅުމާލޭގައި 4،000 ހައުސިން ޔުނިޓު އެޅުމުގެ މަސައްކަތް ފެށީ ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުގައެވެ. އެއީ ޖުމްލަ 32 ޓަވަރެވެ. އޭގެތެރެއިން 700 ހައުސިން ޔުނިޓުގެ މަސައްކަތް ނިންމާ މިހާރު ދިވެހި ސަރުކާރާ ވަނީ ހަވާލުކޮށްފައެވެ.

ކުރީގެ ސަރުކާރުން އިމާރާތްކުރި ފްލެޓްތައް ލިބޭނެ ކަމަށް ކަނޑައަޅައި، ގެޒެޓްކުރި މީހުން ލިސްޓު ބާތިލުކޮށް، އާ ލިސްޓެއް އެކުލަވާލުމުގެ މަސައްކަތް މި ސަރުކާރުން ވަނީ ފަށައިފައެވެ. ހައުސިން މިނިސްޓަރު ޑރ. އަލީ ހައިދަރު އަހުމަދު ވިދާޅުވި ގޮތުގައި 4،000 ފްލެޓް އިމާރާތްކޮށް ނިމޭނީ އަންނަ އަހަރުގެ އޮގަސްޓު މަހުގައެވެ.

ސަރުކާރުން ކުރިން ބުނެފައި ވަނީ އޮކްޓޫބަރު މަހުގެ ތެރޭގައި ފްލެޓުތަކުގެ ދާއިމީ ލިސްޓު އާންމު ކުރައްވާނެ ކަމަށެވެ.