ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެމްބަރު އަލްހާން ފަހުމީ އިސްވެ ހުންނަވައިގެން ހިންގި ކިންގްސް ކެޕިޓަލް ކުންފުނިން އިންވެސްޓްމަންޓް ސްކީމެއް ތައާރަފްކޮށް، މީހުންގެ އަތުން ފައިސާ އަތުލުމަށްފަހު ފައިސާ އަނބުރާ ނުދިން މައްސަލާގައި އަލްހާނާއި އޭނާގެ ދެ ކޮއްކޮއިންގެ މައްޗަށް ކުރާ ދައުވާތަކުގެ މައްސަލަ ރިވިއުކުރަން ޕްރޮސެކިއުޓާ ޖެނެރަލްގެ އޮފީހުގައި އެދެފިއެވެ.

ކިންގްސް ކެޕިޓަލްސްއިން ގިނަ ބައެއްގެ އަތުން ފައިސާ ނަގައިގެން ހިންގި ސްކީމްގެ މައްސަލާގައި އަލްހާންގެ އިތުރުން ދައުލަތުން ދައުވާ ކުރަނީ އޭނާގެ ކޮއްކޮ ޝަޒްބާން ފަހުމީ އާއި މީޑިއާ ކައުންސިލްގެ ކުރީގެ ރައީސް ޝަހުބާން ފަހުމީގެ މައްޗަށެވެ.

އެ މީހުންގެ މައްޗަށް ޓެކުމުގެ 13 ދައުވާއެއް ދައުލަތުން ކުރެއެވެ.

އެ މައްސަލާގައި ކްރިމިނަލް ކޯޓުގައި މިއަދު ބޭއްވި އަޑުއެހުމުގައި އަލްހާނާއި އޭނާގެ ދެ ކޮއްކޮއިން ދިފާއީ ވަކީލް ވިދާޅުވީ ޖިނާއީ ދައުވާތައް ރިވިއުކުރަން އެދުމުގެ ފުރުސަތު ޕްރޮސެކިއުޓާ ޖެނެރަލްގެ އޮފީހުން ހުޅުވާލާފައިވާތީ އެ މައްސަލަ ރިވިއުކުރަން ހުށަހަޅަން ނިންމާފައިވާ ކަމަށެވެ.

އެކަމާ މެދު ގޮތެއް ނިމެންދެން ޝަރީއަތް މަޑުޖައްސާލަން ވަކީލް އެދިވަޑައިގަތެވެ.

އެ މައްސަލަ ބައްލަވާ ގާޒީ ވިދާޅުވީ ދައުވާ އަނބުރާ ނުގެންދާހާ ހިނދަކު ޝަރީއަތް ކުރިއަށް ގެންދަވާނެ ކަމަށެވެ.

ގާޒީ ވިދާޅުވީ އެ މައްސަލާގެ ދިފާއީ ވަކީލެއްގެ ގޮތުގައި ކުރީގެ ބަންޑާރަ ނައިބު އާޒިމާ ޝަކޫރު ފޯމު ހުށަހަޅުއްވާފައިވާ ކަމަށާއި ނަމަވެސް އޭނާގެ ސޮއި ފޯމުގައި ނެތުމުން ވަކީލެއްގެ ގޮތުގައި އައްޔަން ނުކުރެވޭ ކަމަށެވެ.

ނަމަވެސް އަލުން ފޯމު ހުށަހެޅުމުން ވަކީލެއްގެ ގޮތުގައި ބައިވެރިވެވޭނެ ކަމަށް ގާޒީ ވިދާޅުވި އެވެ.

ޝަހުބާން ބުނީ އާޒިމާ ނެތި މައްސަލަ ކުރިއަށް ގެންދަން ބޭނުންނުވާ ކަމަށެވެ.

އެހެންކަމުން ގާޒީ ވަނީ އަޑުއެހުން އަންނަ އާދިއްތަ ދުވަހަށް ފަސްކުރަން ނިންމަވައިފައެވެ.

އެ މައްސަލާގައި ކިންގްސް ކުންފުނީގެ އެކައުންޓްތައް ބޭންކުން ހިފެހެއްޓިއެވެ. ނަމަވެސް ސިވިލް ކޯޓުން ފަހުން ހުކުމް ކޮށްފައިވަނީ ބޭންކް އެކައުންޓްތައް ހިފެހެއްޓީ ގާނޫނާ ހިލާފަށް ކަމަށެވެ.