ފުވައްމުލަކު ސިޓީގައި ވާލުގެ އުނދަގޫ ބޮޑުވުމުން، ބަޑި ޖަހައިގެން ވާ މަދު ކުރުމުގެ މަސައްކަތް އެމްއެންޑީއެފް އިން ފަށައިފިއެވެ.
އެމްއެންޑީއެފް އިން މިއަދު ބުނީ ފުވައްމުލަކު ސިޓީގައި ވާ މަދުކުރުމުގެ ޕްރޮގްރާމެއް އެމްއެންޑީއެފް ސަދަން އޭރިއާ ކޮމާންޑާއި ފުވައްމުލަކު ސިޓީ ކައުންސިލުން ގުޅިގެން ފަށާފައިވާ ކަމަށެވެ.
ފުވައްމުލަކު ސިޓީގައި ވާ ގިނަވެ އާންމު ފަރުދުންނަށް އުނދަގޫތަކާ ކުރިމަތިލާން ޖެހިފައިވުމާއެކު، މިއަދުން [ސެޕްޓެންބަރު 28 ވަނަ ދުވަހު] ފެށިގެން ކުރިއަށް ގެންދާ މި ޕްރޮގްރާމުގައި، ކޮންމެ ދުވަހަކުވެސް އެ ސިޓީގެ އެކި ސަރަހައްދުތަކުގައި ބަޑި ޖަހައިގެން ވާ މަދުކުރުން ކުރިއަށް ގެންދިއުމަށް ވަނީ ހަމަޖެހިފައެވެ.
މި ޕްރޮގްރާމުގައި ހަރަކާތްތެރިވަނީ އެމްއެންޑީއެފް ސަދަން އޭރިއާ ކޮމާންޑާއި ފުވައްމުލަކު ޕޯސްޓުގައި މަސައްކަތްކުރާ ސިފައިންނެވެ.