ދިވެހިރާއްޖެ އަކީ ދުނިޔޭގެ ބޮޑެތި އެހެން ގައުމުތަކުގެ ކުރިމަތީގައި ބަސް ބުނަން ކެރޭ ގައުމެއްކަން ރައީސް ޑރ. މުހައްމަދު މުއިއްޒު ސާބިތު ކޮށްދެއްވާފައިވާ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހީމް ވިދާޅުވެއްޖެއެވެ.

ގާސިމްގެ އެކްސްގައި އެމަނިކުފާނު މިއަދު ލިޔުއްވާފައިވާ ޕޯސްޓެއްގައި ވިދާޅުވީ ޖިއޮގްރަފީ ގޮތުން ރާއްޖެ އަކީ ކިތަންމެ ކުޑަ ގައުމަކަށްވީ ނަމަވެސް، އދ ގެ އާންމު މަޖިލީހުގެ ސެޝަންތަކުގައި މީގެ ކުރީގައިވެސް ރާއްޖޭގެ ބައެއް ވެރީން ބައިވެރިވެވަޑައިގެން ރާއްޖެ ތަމްސީލް ކުރައްވާ ރާއްޖެއަށް ދިމާވެފައިވާ އެކި އެކި ގޮންޖެހުންތަކާއި، އަދި މުޅި ދުނިޔެއަށް ދިމާވެފައިވާ އެކި އެކި ކަންތައްތަކާއި ގުޅޭ ގޮތުން އަޑުއުފުއްލަވާފައިވާ ކަމަށެވެ.

"ނަމަވެސް ޝައްކެއްނެތް ގޮތުގައި، މީގެ 59 އަހަރު ކުރީން ދިވެހީންގެ ފަހުރުވެރި މިނިވަން ދިދަ އދ ގެ އިދާރާގައި ވިހުރެން ފެށިފަހުން، މި ގައުމުގެ ވެރިޔަކު އދ ގައި ދިވެހި ގައުމު ތަމްސީލް ކުރުމުގައި އަދުގެ ރައީސުލް ޖުމްހޫރިއްޔާ ޑރ މުޙައްމަދު މުއިއްޒު ދިވެހި ގައުމު ތަމްސީލް ކޮށްދެއްވީ، ނުހަނު ވިސްނުންތެރިކަމާއި އެކު ވަރަށް ފުރިހަމަ އަދި އެހާމެ މުނާސަބުކޮށް ކަމަށް އަޅުގަނޑު ދެކެމެވެ. މި ލޮބުވެތި ގައުމަކީ ފަހުރުވެރި، ކެރޭ، ހަރުދަނާ، ދުރުވިސްނޭ، އިލްމާއި ހުނަރު ލިބިފައިވާ، ތަރައްގީއަށް އުންމީދު ކުރާ ތަސައްވަރެއް އޮތް، އަދި މުޅި ދުނިޔޭގެ ކުރިމަތީގައި ބަސްބުނަން ކެރޭ ގައުމެއްކަން، ރައީސް ޑރ މުއިއްޒު އެވަނީ ވަރަށް ސާބިތު ކަމާއި އެކު ދައްކުވައިދެއްވާފައެވެ" ގާސިމް ވިދާޅުވިއެވެ.

އދ ގެ އާއްމު މަޖިލީހުގެ 79 ވަނަ ބައްދަލުވުމުގައި، ރައީސް ދެއްވި ތަގުރީގަށް ދުނިޔޭގެ ސަމާލުކަން ލިބިގެންދިޔަކަން ގާސިމް ފާހަގަކުރެއްވިއެވެ. ގާސިމްގެ ޕޯސްޓުގައި ކުރީގެ ރައީސް ޔާމީނަށް ވަނީ ފާޑު ވިދާޅުވެފައެވެ.

"ރާއްޖޭގެ ސިޔާސީ އިދިކޮޅު ބައެއް ފަރާތްތަކަށް، ހާއްސަކޮށް ވެރިކަމުގެ 5 އަހަރުގެ ދައުރެއް ލިބިވަޑައިގެންނަމަވެސް އދ ގައި ރާއްޖެ ތަމްސީލް ކޮށްލަން ކެރިވަޑައިނުގަތް ބޭފުޅަކަށް، ރައީސް މުޢިއްޒުގެ ތަގުރީރު އޮޅުން ފިލާވަޑައިނުގަތް ނަމަވެސް، ދުނިޔޭގެ ބޮޑެތި މީޑިއާތަކުގެ ފަލަ ސުރުހީގައި އެމަނިކުފާނުގެ ތަގުރީރް އެވަނީ ހިމެނިފައެވެ،" ގާސިމް ވިދާޅުވިއެވެ.

މީގެ އިތުރުން އދގެ ސަލާމަތީ މަޖިލީހުގެ ތަޅުމުގައި ތަގުރީރު ކުރެއްވި ރާއްޖޭގެ ފުރަތަމަ ރައީސް އަކީވެސް އެމަނިކުފާނު ކަމަށް ތާރީހުގައި ލިޔެވިއްޖެ ކަމަށާއި އދ ގެ 79 ވަނަ އާއްމު ބައްދަލުވުމުގެ ހަވާސާގައި ކުރިއަށް ދިޔަ މުހިންމު އެތައް ބައްދަލުވުމެއްގެ ރިޔާސަތުގައި ކޯ-ޗެއަރއެއްގެ ހައިސިއްޔަތުން ރައީސް މުއިއްޒު އިސް ދައުރެއް އަދާކުރެއްވި ކަމަށް ގާސިމް ވިދާޅުވިއެވެ.

ދެހާސް ސާޅީހުގައި ދިވެހިރާއްޖޭގެ މިނިވަން ކަމަށް 75 އަހަރު ފުރޭއިރު، އެ ދުވަސް އަންނަންވާއިރު ދިވެހިރާއްޖެއަކީ، ފުރިހަމައަށް ތަރައްގީވެފައިވާ ގައުމެއްގެ ގޮތުގައި އޮތުމަށް މާދަމާއަށްޓަކައި ރައީސް މުއިއްޒު ކުރައްވާ ތަސައްވަރުތައް މުޅި ދުނިޔޭގެ ކުރިމަތީގައި ހާމަކޮށްދެއްވާ، ދިވެހި ފަސްގަނޑާއި، ރައްޔިތުންނާއި މެދު ރައީސް ދައްކުވައިދިން ފަހުރުވެރި ނަމޫނާއަށްޓަކައި ގާސިމް ވަނީ ޝުކުރު އަދާ ކުރައްވާފައެވެ.