މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން ކުރިއަށް ގެންދިޔަ ބޭސިކް ފަޔާ ފައިޓާ ކޯސް ނިންމާލައިފިއެވެ.

އެމްއޭސީއެލް އިން ބުނީ 12 ބައިވެރިންނާއެކު އެ ކޯސް ކުރިއަށް ގެންގޮސްފައިވަނީ 43 ދުވަހުގެ މުއްދަތަކަށް ކަމަށެވެ. އަދި މިއީ މި ކޯހުގެ 29 ބެޗް ކަމަށް ވަނީ ބުނެފައެވެ.

މޯލްޑިވްސް އޭވިއޭޝަން އޮތޯރިޓީން ފާސްކޮށްފައިވާ ބޭސިކް ފަޔާ ފައިޓާ ކޯހަކީ ވެލާނާ އިންޓަނޭޝަނަލް އެއާޕޯޓް އަދި އެއާޕޯޓް ވަށައިގެންވާ ސަރަހައްދުގެ އިތުރުން މަތިންދާ ބޯޓުގައި އަލިފާނުގެ ހާދިސާއެއް ހިނގުމުން ކުއްލި ހާލަތްތަކަށް ރައްދުދިނުމަށް ފަޔާ ފައިޓަރުން ތަމްރީން ކުރާ ކޯހެއް ކަމަށް އެމްއޭސީއެލްއިން ބުނެއެވެ.

ބޭސިކް ފަޔާ ފައިޓާ ކޯހަކީ އޭވިއޭޝަން ސޭފްޓީއަށް މުހިންމު ކޯހަކަށް ވާއިރު ފަޔާ ފައިޓަރުންނަށް ކުއްލި ހާލަތްތަކާއި ކުރިމަތިލާން މި ކޯހުން ހުނަރު ލިބިގެންދާނެ ކަމަށް ވަނީ ބުނެފައެވެ.

މިއީ އެމްއޭސީއެލްގެ ހައުސް ޓްރެއިނާސް ބޭނުންކޮށްގެން ކޯސް ކުރިއަށް ގެންދާ ފުރަތަމަ ފަހަރު ކަމަށާއި އެކަމުން ހާމަކޮށްދެނީ ކުންފުނީގެ އިން ހައުސް ޓްރެއިނާސްގެ ގާބިލްކަން އިތުރުވެފައިވާ މިންވަރު ކަމަށް ވިދާޅުވެއެވެ. އަދި ހަމަ އެހެންމެ ރާއްޖޭގެ ޓެކްނިކަލް ދާއިރާތަކުގެ މީހުން ބިނާކުރުމަށް އެމްއޭސީއެލްއިން ދޭ އަހަމިއްޔަތު ކަން ކަމަށް ވެސް ވަނީ ބުނެފައެވެ.

އެ ކޯސް ނިންމާލުމުގެ ރަސްމިއްޔާތުގައި ވާހަކަދައްކަވަމުން އެމްއޭސީއެލްގެ ޑެޕިއުޓީ މެނޭޖިން ޑިރެކްޓަރު މުހައްމަދު ލަމްއާން ވިދާޅުވީ، އެ ކޯސް ފުރިހަމަކަމާއެކު ނިމިގެން ދިއުމުން އެނގިގެންދަނީ އެމްއޭސީއެލްގެ އިން ހައުސް ޓްރެއިނިންގެ ނިޒާމްގެ ހަރުދަނާކަންކަމަށެވެ.

"ދެމެހެއްޓެނިވި ގޮތެއްގައި މުވައްޒަފުނަނަށް ދޭންޖެހޭ ތަމްރީނުތައް ފޯރުކޮށްދިނުމަށް ކުންފުނީގެ މެނޭޖްމަންޓުން މަސައްކަތް ކުރާނެ." ލައްމާން ވިދާޅުވިއެވެ.

އެމްއޭސީއެލްގެ ލާނިން އެންޑް ޑިވެލޮޕްމަންޓް ޔުނިޓުން ރާއްޖޭގެ އޭވިއޭޝަން ދާއިރާގެ އިތުރުން މަސައްކަތްތެރިކަމުގެ ދާއިރާއިން ގިނަ ތަމްރީނުތަކެއް ފޯރުކޮށްދޭ ކަމަށް އެ ކުންފުނިން ވިދާޅުވިއެވެ.

މި އަހަރުގެ ޖޫން މަހު ވަނީ ޒަމާނީ ޓެކްނިލޮޖީތަކުން ތައްޔާރުކޮށްފައިވާ އާ ފަޔާ ސްޓޭޝަންނެއް އިފްތިތާހުކޮށް ކުއްލި ހާލަތުގައި އަވަަސް ރައްދު ދިނުމުގެ ގާބިލްކަން އިތުރުކޮށްފައި ކަމަށް ވެސް އެމްއޭސީއެލްއިން ވިދާޅުވެއެވެ. އަދި މަސައްކަތް ކުރަމުން ދަނީ ވެލާނާ އިންޓަނޭޝަނަލަށް އެއާޕޯޓުގެ ސަލާމަތީ ރައްކާތެރިކަން ކަށަވަރުކޮށް ފަސިންޖަރުންނަށް ޒަމާނީ ހިދުމަތްތަކެއް ފޯރުކޮށްދިނުމަށް ކަމަށް ވިދާޅުވެއެވެ.