މާލެ ރައްޔިތުންނަށް ދިނުމަށް ނިންމާފައިވާ ގޯތިތައް ދިނުމަށް ގޮވާލައި ކުރަމުން ގެންދިޔަ ސިލްސިލާ މުޒާހަރާތައް ޖަމިއްޔާތަކުން ހުއްޓާލާފައި ވަނިކޮށް، އާންމުންގެ ބަޔަކު ނުކުމެ، އަލުން އެ މުޒާހަރާތައް ފަށައިފިއެވެ.

ގޯތިތައް އަވަހަށް ދިނުމަށް ގޮވާލައި އަޑުއުފުލަން ރޭ ފަށާފައި ވަނީ ރަސްފަންނުގައެވެ.

މީގެ ކުރިން އެ މުޒާހަރާތައް ކުރަމުން ގެންދިޔައީ ރާޅުގަނޑު ސަރަހައްދުގައެވެ. މުޒާހަރާތައް އޭރު ކުރަމުންގެންދިޔައީ ޖަމިއްޔާތަކެއް ބައިވެރިވެގެންނެވެ.

އެ ޖަމިއްޔާތަކުގެ ތެރެއިން، ފަހި ޔޫނިއަން، ގިރާވަރު މާލެ ސިޓިޒަން އެސޯސިއޭޝަން، ގުޅިފަޅުގެ ރައްޔިތުންގެ އެސޯސިއޭޝަން، ހުޅުމާލެ ރައްޔިތުންގެ ކޮމިޓީ، އަދި މާލެ ރަށްވެހިންގެ ޖަމުޢިއްޔާގެ އިސްބޭފުޅުންނާ ރައީސް ޑރ. މުހައްމަދު މުއިއްޒު ވަނީ މި މަހުގެ ދެ ވަނަ ދުވަހު ބައްދަލު ކުރައްވާފައެވެ. އެ ބައްދަލު ކުރެއްވުމަށްފަހުފަހު މުޒާހަރާތައް ވަނީ ހުއްޓާލާފައެވެ.

އަލުން މުޒާހަރާތައް ފެށުމާ ގުޅޭ ގޮތުން ރޭގެ މުޒާހަރާގައި ބައިވެރިވި އަނޫޝާ އަބްދުއްލަތީފު ބުނީ މުޒާހަރާއަށް އަލުން ނުކުންނަންޖެހުނީ ގޯތި ދިނުމުގެ މަސައްކަތް ކުރާތަން ނުފެންނާތީ ކަމަށާއި ގިރާވަރުފަޅު ހިއްކާތަން ވެސް ނުފެންނާތީ ކަމަށެވެ.

"އަޅުގަނޑުމެންނާ އެއްވެސް މަޝްވަރާއެއް ނެތި އެ ބޭފުޅުން މި ޔޫނިއަންތަކުން މުޒާހަރާ ހުއްޓާލީއޭ ބުނި ހިސާބުން އެއްވެސް މަސައްކަތެއް އަޅުގަނޑުމެންނަކަށް ނުފެނޭ. އެހެންވެގެން 10 މަސް ވެގެންދާއިރު އަޅުގަނޑުމެން ހަނު ތިބޭކަށް ބޭނުމެއް ނޫން. އެހެންވީމަ ރައްޔިތުންގެ ހައްގުގައި ވަކާލާތު ކުރަން އަޅުގަނޑުމެން މި ނުކުތީ،" އަނޫޝާ ބުންޏެވެ.

އޭނާ ބުނީ އެ މުޒާހަރާތައް ކޮންމެ ހުކުރު ދުވަހެއްގެ ރޭގައި މާލޭގެ އެކި ސަރަހައްދުތަކުގައި ކުރިއަށް ގެންދާނެ ކަމަށެވެ. މުޒާހަރާގެ ޑިމާންޑަކީ ގޯތިތަކާއި ފްލެޓުތައް ވީހާވެސް އަވަހަކަށް ހަވާލު ކުރުމަށް ގޮވާލުން ކަމަށާއި ހިއްކަންޖެހޭ ތަންތަން އަވަހަށް ހިއްކުމަށް ގޮވާލުން ކަމަށް އަނޫޝާ ބުންޏެވެ.

ކުރީގެ ސަރުކާރުން ހިންގި ބިންވެރިޔާ ސްކީމުގެ ދަށުން ހުޅުމާލެ ދެވަނަ ފިޔަވަހިންނާއި ތިން ވަނަ ފިޔަވަހިންނާއި ގުޅިފަޅު އަދި ގިރާވަރުފަޅުން 9،001 ގޯތި ދޫކުރަން ނިންމިއެވެ.