ފުލުހުންގެ ނަމުގައި ސައްހަ ނޫން ބަޔާނެއް ދައުރު ކުރަމުން އަންނަ މައްސަލާގައި ތައްޔިބު ޝަހީމް ފުލުހުންގެ އިދާރާ އަށް ހާޒިރުކޮށް ސުވާލުކޮށްފިއެވެ.

ސައްހަ ނޫން ބަޔާނެއް، ފުލުހުންގެ ނަމުގައި ދައުރު ކުރަމުން އަންނަ މައްސަލައިގެ ތަހުގީގަށް ކޯޓު އަމުރެއްގެ ދަށުން ތައްޔިބުގެ ފޯނާއި އެނޫންވެސް ބައެއް އިލެކްޓްރޯނިކް ސާމާނު ވެސް ވަނީ ހިފަހައްޓައިފައެވެ.

އެ މައްސަލައިގެ އިތުރު މައުލޫމާތު ފުލުހުން މިއަދު ހާމަކޮށްފައިވާއިރު، ފުލުހުން ބުނީ އެ މައްސަލައާ ގުޅިގެން ފުލުހުންގެ އިދާރާއަށް ތޮއްޔިބު ހާޒިރުކޮށް، ސުވާލު ކޮށްފައިވާ ކަމަށެވެ.

ފުލުހުންގެ ނަމުގައި ދައުރު ކުރަމުން އަންނަނީ ކޮން ކަހަލަ ލިޔުމެއް ކަމެއް ފުލުހުން ނުބުނެއެވެ.

ކުރީގެ ރައީސް ޔާމީން ހައްޔަރު ކުރުމަށް ސައްހަ ނޫން ކޯޓު އަމުރެއް ނެރުމާއި ގުޅޭ ގޮތުން ދިވެހި ފުލުހުންގެ ހިދުމަތުން ކޮށްފައިވާ ތަހުގީގީ ރިޕޯޓެއް ކަމަށް ބުނެ ސޯޝަލް މީޑިއާގައި ރިޕޯޓެއް ދައުރުކުރިއެވެ.

އެހެންނަމަވެސް އެ ރިޕޯޓަކީ ވެސް ސައްހަ ރިޕޯޓެއް ނޫން ކަމަށް ފުލުހުން ބުނެފައިވެއެވެ. އެހެންކަމުން އެ ރިޕޯޓު އުފައްދައި ދައުރު ކުރަމުންދާ މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރަމުންދާ ކަމަށް ފުލުހުން ބުނެފައިވެއެވެ.