އިންސާނުންގެ އަމަލުތައް ހުރި ގޮތުން މުޅި އިންސާނިއްޔަތު އޮތީ ކާރިސާއެއްގައި ކަމަށް ރައީސުލްޖުމްހުރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

އދ.ގެ އާންމު މަޖިލީހުގައި ވާހަކަ ދައްކަވަމުން ރައީސް ޑރ. މުއިއްޒު މިއަދު ވިދާޅުވީ އަދަދު ނުކުރެވޭހާ ގިނަ ކަންތައްތަކެއް ދުނިޔޭގެ އެކި ކަންކޮޅުތަކުގައި ދިރިއުޅޭ މީހުން ތަހަންމަލު ކުރަމުންދާ ކަމަށާއި ހަނގުރާމަ އާއި ފަގީރުކަމާއި މޫސުމީ މައްސަލަތަކާއި ހިޖުރަކުރުމާއި ބަނޑުހައިހޫނުކަން ފަދަ އެތައް މައްސަލަތަކެއް ދުނިޔެއަށް ކުރިމަތިވެފައިވާ ކަމަށެވެ.

އދ.ގެ ޕޯޑިއަމްގައި ވާހަކަ ދައްކަވަމުން، ރައީސް ވަނީ ދުނިޔޭގެ ޗާޓު ރަތް ކުލައިން ފާހަގަކޮށްފައިވާ ފޮޓޯއެއް ދައްކަވާފައެވެ. ދުނިޔޭގެ ރަތް ޗާޓާ އެކު، އެ ފޮޓޯގައި ވަނީ "ކާރިސާތައް ކުރިމަތިވެފައިވާ ގައުމުތައް" މިހެން ލިޔެފައެވެ.

ފޮޓޯ ދެއްކެވުމަށްފަހު، ރައީސް ވަނީ ކާރިސާއެއް ކުރިމަތިނުވާ ގައުމެއް އެ ޗާޓުން ފެންނަން ހުރިތޯ ސުވާލު ކުރައްވާފައެވެ. ރައީސް ވިދާޅުވީ މުޅި އިންސާނިއްޔަތު އޮތީ ރަތް ކުލައިން ފަވާލެވިފައިވާ އަޑިގަނޑެއްގައި ކަމަށާއި މުޅި އިންސާނިއްޔަތު މި އޮތީ ކާރިސާއެއްގައި ކަމަށެވެ.

އިންޒާރުގެ ރަނގަބީލު އަޅަމުންދާއިރު، ކަންކަން ހައްލު ކުރުމުގެ ބަދަލުގައި ކުރިއެކޭ އެއްގޮތަށް ކަންކަން އަދިވެސް ކުރަމުންދާ ކަމަށް ރައީސް ފާހަގަ ކުރެއްވިއެވެ.

"...މިކަމުގެ އަނެއް ފަރާތް ބަލާލާއިރު، އަދިވެސް ކަންކަން ކުރިއަށްދަނީ ކުރިއެކޭ އެއްގޮތަށް. އިންޒާރުގެ ރަނގަބީލު އަޅަމުންދާއިރު، ކުޅެމުންދަނީ ހަމަ ކުރީގެ ރާގުތައް. އަތުނުވާ ވަރަށް ދުވަހެއް ދުވަހަށް ބޯޓު އަޑިއަށްދާއިރު ވެސް، ކަން ހިނގަނީ މި މަގުން،" ރައީސް ޑރ. މުހައްމަދު މުއިއްޒު ވިދާޅުވިއެވެ.

ރައީސް ޑރ. މުހައްމަދު މުއިއްޒަކީ އދ. ގެ އާންމު މަޖިލީހުގައި މިއަހަރު ތަގުރީރު ކުރެއްވި މި ސަރަހައްދުގެ އެންމެ ފުރަތަމަ ލީޑަރެވެ.