ރާއްޖޭގެ މިނިވަންކަމަށް އެންމެ މުހިންމު މަސައްކަތްތަކެއް ކުރެވޭނީ އދ. ގެ މެމްބަރެއްގެ ގޮތުގައި ރާއްޖެ އޮވެގެން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

އދ. ގެ މެމްބަރުކަން ރާއްޖެއަށް ލިބުނުތާ 59 އަހަރު ފުރުމުގެ މުނާސަބަތުގައި ރައީސް ދެއްވި ހިތާބެއްގައި ވިދާޅުވީ އދ. ގެ މެމްބަރުކަން ރާއްޖެއަށް ލިބުމަކީ ބޮޑެތި ގައުމުތަކާ އެއް ހަމައެއްގައި މަސައްކަތް ކުރަން ލިބުނު ފުރުސަތެއް ކަމަށެވެ. އަދި ގައުމެއްގެ މިނިވަންކަން އެންމެ ބޮޑަށް ދިފާއު ކުރެވޭނީ އެ ގައުމެއްގެ މިނިވަންކަން އެހެން ގައުމުތަކަށް އަންގައިދީގެން ކަމަށާއި އެހެންވެ, އދ. އަކީ ރާއްޖޭގެ މިނިވަންކަމާއި މުސްތަގިއްލުކަން ދެމެހެއްޓުމަށް އެންމެ ބޮޑަށް މަސައްކަތް ކުރެވޭނީ އދ. ގައި ކަމަށް އެމަނިކުފާނު ވިދާޅުވި އެވެ.

"ދިވެހިރާއްޖޭގެ މިނިވަންކަމާއި ސިޔާދަތު ދިފާއުކޮށް, ކުރިއެރުވުމުގެ މަތިވެރި މަސައްކަތް ކުރާ އެންމެ މުހިންމު މައިދާނަކީ އދ. ގެ ޖަމްއިއްޔާ. އދ. ގެ މެމްބަރުކަން މުހިންމު ވަނީ އެހެންވެ." އދ. ގެ އާންމު މަޖިލީހުގެ ޖަލްސާގައި ބައިވެރިވެ ވަޑައިގަތުމަށް އެމެރިކާގައި ހުންނަވައިގެން ދެއްވި ހިތާބުގައި ރައީސް ވިދާޅުވި އެވެ.

ރައީސް ވިދާޅުވީ ވޭތުވެދިޔަ 59 އަހަރު ރާއްޖޭގެ މަސްލަހަތު ހިމާޔަތްކުރަން އދ. ގައި ގިނަ މަސައްކަތްތަކެއް ރާއްޖެއިން ކޮށްފައިވާ ކަމަށެވެ. އަދި އދ. ގެ އިންސާނީ ހައްގުތަކާބެހޭ ކައުންސިލްގެ މެމްބަރުކަން ތިން ވަނަ ފަހަރަށް ރާއްޖެއިން ކުރަމުން ދާއިރު, މި ސަރުކާރު އައިފަހުން ރާއްޖޭގެ މަސްލަހަތު އިތުރަށް ދިފާއު ކޮށްފައިވާ ކަމަށް އެމަނިކުފާނު ވިދާޅުވި އެވެ.

"ވޭތުވެދިޔަ 10 ވަރަކަށް މަސް ދުވަހުގެ ތެރޭގައި އަޅުގަނޑުމެން ވަނީ ދިވެހި ގައުމީ މަސްލަހަތު އިތުރު ބާރު މިނެއްގައި ކުރިއަރުވާފައި." ރައީސް ވިދާޅުވި އެވެ.

ރައީސް ވިދާޅުވި ގޮތުގައި އދ. އަކީ ދުނިޔޭގެ މައި މަޖިލީހެވެ. އެހެންކަމުން އެ މަޖިލީހުގައި ހިނގާ ބަހުސްތަކުން ރާއްޖެއިން ވެސް ބައިވެރިވާން ޖެހޭ ކަމަށާއި އަދި ގައުމުގެ ތަރައްގީއަށް ކުރިއެރުންތައް ލިބޭނީ ވެސް އެފަދަ މައިދާންތަކުގައި ރާއްޖެއިން އަޑުއުފުލައިގެން ކަމަށް އެމަނިކުފާނު ވިދާޅުވި އެވެ.

ރައީސް ވިދާޅުވި ގޮތުގައި މި ސަރުކާރުގެ ހާރިޖީ ސިޔާސަތުތައް އަބަދުވެސް ދެމި އޮންނާނީ ދިވެހިންނާއި ރާއްޖެއަށް އެންމެ ފައިދާ ހުރި ގޮތަކަށެވެ. އަދި އެގޮތުގައި މި ސަރުކާރުގެ ސިޔާސަތުތައް އަބަދުވެސް ދެމި އޮންނާނެ ކަމުގެ ޔަގީންކަން އެމަނިކުފާނު ދެއްވި އެވެ.