ސަމާހުގެ މަރު: ޑްރައިވަރު ޝަރީއަތް ނިމެންދެން ބަންދަށް

ބުރާސްފަތި ދުވަހުގެ ރޭ މެންދަމު ހުޅުމާލޭގައި އޮތް ޓީއެފްޖީ މެރެތަންއެއްގައި ބައިވެރިވާން ދިޔަ ދުވުންތެރިޔާ ނިޔާވި މައްސަލާގައި ސްޕޯޓްސް ކާރުގެ ޑްރައިވަރު ޝަރީއަތް ނިމެންދެން މިއަދު ބަންދުކޮށްފިއެވެ.

ބާރު ސްޕީޑުގައި ދުއްވާފައި ސްޕޯޓްސް ކާރެއް، ސައިކަލެއްގައި ޖެހި ވިއްސައިގެން ގޮސް، ބޮލަށް ލިބުނު ޒަހަމްތަކަށް ފަރުވާދެމުންދަނިކޮށް ރޭ ނިޔާވެފައި ވަނީ ލ. އިސްދޫ، ބީޗްހައުސް، ހަސަން ސަމާހު، 23، އެވެ. އޭނާ ނިޔާވީ ހުޅުމާލޭ ހޮސްޕިޓަލަށް ގެންދިޔަތާ ކުޑައިރުކޮޅެއްގެ ތެރޭގައެވެ.

ފުލުހުން ބުނީ އެކްސިޑެންޓާ ގުޅިގެން ސ. ހިތަދޫ، ވައިލެޓްފެހި، މުހައްމަދު ވިސާމު ސިދުގީ، 26، ހައްޔަރުކޮށްފައިވާ ކަމަށެވެ. އޭނާގެ ބަންދާމެދު ގޮތެއް ނިންމުމަށް މިއަދު ކޯޓަށް ގެންދިއުމުން ޝަރީއަތް ނިމެންދެން އޭނާ ބަންދުކޮށްފައިވާ ކަމަށް ފުލުހުން ބުންޏެވެ.

ސަމާހުގެ ރައްޓެހިން "ހަތާވީސް"އަށް ބުނީ އެކްސިޑެންޓު ހިނގުމުން ސްޕޯޓްސް ކާރު ފިލަން މަސައްކަތް ކުރި ކަމަށެވެ. ކާރު ފިލަން މަސައްކަތް ކުރުމުން، ފަހަތުން ދުވަން ފެށުމާއެކު ކާރު ހުއްޓާލި ކަމަށެވެ.

ހަތާވީސްއަށް އެނގިފައިވާ ގޮތުގައި އެކްސިޑެންޓު ހިނގި ވަގުތު ތިން މީހަކު ކާރުގައި ތިއްބެވެ.

ސަމާހު ދުއްވާފައި ދިޔަ ސްކޫޕީ ސައިކަލުގައި ކޮންޓްރޯނު ނުވެގެން އައިސް ކާރު ޖެހުމުން، އޭނާ ވިއްސައިގެން 45 ފޫޓް ދުރަށް ދިޔައެވެ. އަދި ޖެހުނު ގޮތުން ބޮލުގެ ނާށިގަނޑު ފަށައިގެންގޮސް، ސިކުނޑިއަށް ގެއްލުންތަކެއްވިއެވެ.

ފުލުހުން ބުނީ ސަމާހު ނިޔާވީ ހުޅުމާލެ ހޮސްޕިޓަލަށް ގެންގޮސް ފަރުވާދެމުންދަނިކޮށް ކަމަށެވެ.

ސަމާހުގެ ކަށުނަމާދު އޮތީ މަޣްރިބު ނަމާދަށްފަހު، ހުޅުމާލެ ސަހަރާ މިސްކިތުގައެވެ.