ވަޅިން ބިރު ދައްކައި އަންހެނަކު ރަހީނު ކުރުމުން، ބާރުގެ ބޭނުންކުރުމުގެ ތެރޭގައި ޒަހަމްވި ށ. މިލަންދޫ، ހެޕީލޭންޑް، އާދަމް އަތުހަރު، 32، ދަންޖެހުނު ކަމަށް ފުލުހުން ބުނާއިރު، އޭނާ ދަންޖެހުނު ކަމުގެ އެއްވެސް ނިޝާނެއް ކަރުން ފެންނަން ނެތް ކަމަށް އާއިލާ އިން ބުނެފިއެވެ.

"ހަތާވީސް"އާ ވާހަކަދައްކަމުން އަތުހަރުގެ އެއްބަނޑު އެއްބަފާ ބޭބެ މުހައްމަދު ތަސްމީނު ބުނީ އަތުހަރަކީ އިސްކޮޅުގައި ހަފޫޓު ހުންނަ މީހަކަށްވާއިރު އޭނާ ދަން ޖެހުމަށް އޭނާގެ އިސްކޮޅަށްވުރެ މައްޗަށް އަރަން ޖެހޭނެ ކަމަށް ގަބޫލުކުރާ ކަމަށެވެ.

"މަރުވުމުގެ ކުރިންވެސް ވެއްދި އެއްފަހަރު، ދެން މަރުވެފައި ސާފުކުރި ފަހުން އަޅުގަނޑު ބަލާލިއިރު އަޅުގަނޑަކަށް ކަރަކުން އެއްވެސް ވަރަކަށް ނުފެނޭ އެއްވެސް ނިޝާނެއް. ދަން ޖެހިފައި ހުރިއްޔާ ހުންނާނެ ރަތް އަރާފައި، ރޭގެ ވީ ކަމެއް މިއަދު 4:08ގައި މަރުވީ އީސީޖީގައި އަޅުގަނޑު އިންނާނެ ސޮއި ކޮށްފައި، އަޅުގަނޑަކަށް އެއްވެސް ވަރަކަށް ފާހަގައެއް ނުކުރެވޭ އެއްވެސް ނިޝާނެއް ކަރުގައި ހުރި ކަމަކަށް،" އަތުހަރުގެ ބޭބެ ބުންޏެވެ.

ތަސްނީމު ވަނީ އޭނާގެ ކޮއްކޮގެ ހަށިގަނޑުގައި ހުރި ނިޝާންތައް ފެންނަ ފޮޓޯތައް "ހަތާވީސް"އާ ހިއްސާކޮށްފައެވެ.

އަތުހަރުގެ ކަރު: އާއިލާއިން ބުނަނީ ދަންޖެހުނުގެ ކަމުގެ ނިޝާނެއް ނެތްކަމަށް-- ފޮޓޯ/ ހަތާވީސް

އޭނާ ބުނި ގޮތުގައި އަތުހަރު ދަންޖެހުނު ކަމަށް ބުނާއިރު، ގޮޅީގައި ހުރި ސީސީޓީވީ ފޫޓޭޖުން ފެންނަ ވީޑިއޯ އާއިލާއަށް ދައްކަންޖެހޭނެއެވެ.

އޭނާ ބުނީ ގޮތުގައި އަތުހަރުގެ ޕޯސްޓްމޯޓަމް ހަދަން، ފުލުހުން ބޭނުންވި ނަމަވެސް، އާއިލާއިން ބޭނުންވަނީ އަތުހަރުގެ ހަށިގަނޑު ވަޅުލުމަށެވެ.

ދޫނިދޫ ކުޑަ ގޮޅިއެއްގައި އަތުހަރު ދަންޖެހިފައި ހުއްޓާ ފެނިގެން، އަމަލު ކުރި ގޮތުގެ ޓައިމްލައިނެއް ފުލުހުން މިއަދު ވަނީ އާންމުކޮށްފައެވެ.

އެ ޓައިމްލައިންގައިވާ ގޮތުން، އަތުހަރު ދަންޖެހިފައި ހުއްޓާ ފުލުހުންނަށް ފެނުނީ ރޭ 7:02 އެހާކަންހާއިރުއެވެ. އަދި ހަމަ އެ ވަގުތު ޖަލު ގޮޅި ހުޅުވައި، އަތުހަރު ތިރީގައި ބޭއްވި ކަމަށާއި އޭނާ ސްޓްރެޗަރއަށް ލައިގެން ގޮޅިން ނެރުނީ ރޭ 7:05 ހާއިރު ކަމަށް ފުލުހުން ބުންޏެވެ.

ފުލުހުންގެ އެ ޓައިމްލައިންގައިވާ ގޮތުން ދޫނިދޫ ކްލިނިކަށް އޭނާ ގެންދެވުނީ ރޭ 7:06ގައި ކަމަށާއި އިތުރު ފަރުވާއަށް އައިޖީއެމްއެޗަށް ގެންދިއުމަށް ނެގީ 19 މިނެޓެވެ.

ފުލުހުންގެ ޓައިމްލައިންގައިވާ ގޮތުން، އޭނާ ދަންޖެހެން މަސައްކަތް ފެށި ވަގުތާއި ދަންޖެހުނު ވަގުތު އެނގޭކަށް ނެތެވެ.

އަތުހަރާމެދު ފުލުހުން އަމަލުކުރި ގޮތާމެދު އާއިލާއިން ވަނީ ކަންބޮޑުވުން ފާޅުކޮށްފައެވެ. އޭނާއަށް އައިޖީއެމްއެޗުން ފަރުވާ ދިނުމުގައި އިހްމާލުވެފައިވާ ކަމަށާއި ފުލުހުން ބޭނުންވީ ވީހާ ވެސް އަވަހަކަށް އަތުހަތު ފަރުވާއިން ވީއްލައި، ޖަލު ގޮޅިއަށް ގެންދިއުމަށް ކަމަށް އާއިލާއިން ބުންޏެވެ.

އަތުހަރަކީ ޝަރީއަތް ނިމެންދެން ބަންދުކޮށްފައިވާ މީހެވެ. އޭނާގެ ބަންދާމެދު ގޮތް ނިންމީ އޭނާ ކޯޓަށް ހާޒިރު ކުރުމެއް ނެތިއެވެ.