ގަވާއިދާ ހިލާފަށް ރާއްޖޭގައި އުޅޭ ބިދޭސީން ވިޔަފާރި ކުރަމުންދިޔަ ދެ ތަނެއް ބަލައިފާސްކޮށް، ދެ ބިދޭސީއަކު އަނެއްކާވެސް ހައްޔަރުކޮށްފިއެވެ.

ގަވާއިދާ ހިލާފަށް އުޅޭ ބިދޭސީން ހޯދުމަށް ސިލްސިލާކޮށް އިމިގްރޭޝަނުން ކުރިއަށް ގެންދާ ހަރަކާތުގައި އެ ތަން ބަންދުކޮށްފައި ވަނީ އިއްޔެ ހިންގި އޮޕަރޭޝަނެއްގައެވެ.

އިމިގްރޭޝަނުން ބުނީ އެ ދެ ތަން ބަލައިފާސްކޮށްފައި ވަނީ ގަވާއިދާ ހިލާފަށް އުޅޭ ބިދޭސީން، ދިވެހިން އާންމުކޮށް ދުފުމުގައި ބޭނުންކުރާ ތަކެތި، ވިޔަފާރިއަށް ތައްޔާރުކުރަމުންދާ ކަމަށް "އިމިގްރޭޝަން ވޮޗް"އަށް ލިބުނު ރިޕޯޓަކާ ގުޅިގެން ކަމަށެވެ.

ޑެލިވަރީއަށް ކާބޯތަކެތި ހަދަމުންދިޔަ ތަން، އިމިގްރޭޝަނުން ބަލައިފާސްކުރަނީ-- ފޮޓޯ/ އިމިގްރޭޝަން

އެ ރެއިޑްގައި ބަލައި ފާސްކުރި ދެ ވަނަ ތަނުގައި ޑެލިވެރީއަށް ކާބޯތަކެތި ތައްޔާރުކުރަމުންދިޔަ ކަމަށާއި އެ ދެ ތަނުގައި ކުރަމުން ދިއަ ވިޔަފާރި ހުއްޓުވުމަށް ނޯޓިސް ދީފައިވާ ކަމަށް އިމިގްރޭޝަނުން ބުންޏެވެ.