ރައީސުލްޖުމްހޫރިއްޔާ އަކަށް ހުންނަވާ ބޭފުޅަކު، އަމިއްލަފުޅު ދަތުރެއް ކުރަން ޖެހިއްޖެ ނަމަ އެ އޮންނަ އުސޫލަކުން ދައުލަތުގެ ފައިސާ އިން ހަރަދު ކުރެވޭ ކަމަށާއި ނަމަވެސް މިހާތަނަށް ކުރެއްވި އެއްވެސް އަމިއްލަ ދަތުރުފުޅެއްގެ ހަރަދު ދައުލަތުން ކޮށްފައި ނުހުންނާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

މިރޭ "ސަންގު ޓީވީ" އިން ގެނެސްދިން އިންޓަވިއުއެއްގައި ރައީސް މުއިއްޒު ވިދާޅުވީ އުސޫލުގައި އޮންނަ ގޮތުން މުލީއާގެ [ރައީސުލްޖުމްހޫރިއްޔާގެ ރަސްމީ ގެކޮޅު] ބަޖެޓުން އަމިއްލަފުޅު ދަތުރުތަކަށް ހަރަދު ކުރެއްވޭ ކަމަށެވެ. ނަމަވެސް މިއަދާއި ހަމައަށް އެމަނިކުފާނު ކުރެއްވި އެއްވެސް އަމިއްލަފުޅު ދަތުރެއްގެ ހަރަދު މުލީއާގެ ބަޖެޓުން ނުވަތަ ދައުލަތުގެ ފައިސާ އިން ކޮށްފައި ނުހުންނާނެ ކަމަށް ރައީސް ވިދާޅުވިއެވެ.

"އަޅުގަނޑުގެ އެއްވެސް އަމިއްލަ ދަތުރެއްގައި ޓިކެޓުވިއަސް އެކަމޮޑޭޝަން ވިއަސް، އަޅުގަނޑުވެސް އަޅުގަނޑު އަންހެނުންގެ ވެސް އަދި ކުދިންގެވެސް އެއްވެސް މީހެއްގެ ހަރަދެއް އަޅުގަނޑުގެ އަމިއްލަ ދަތުރެއްގައި ނުހުންނާނެ އަމިއްލަ އަށް ނޫނިއްޔާ ކޮށްފައެއް،" ރައީސް މުއިއްޒު ވިދާޅުވިއެވެ.

ރައީސުލްޖުމްހޫރިއްޔާ ކަމުގެ ހުވާ ކުރެއްވުމަށްފަހު މުލީއާގޭގައި ކުރަމުން ދިޔަ މަރާމާތުތައް ނިމެންދެން ރައީސް ހުންނެވީ އަމިއްލަފުޅު ގެކޮޅު މ. ދިމްޔާތުގައެވެ. މިރޭ ވެސް ރައީސް ވަނީ އަމިއްލަފުޅު ގެކޮޅުގައި ހުންނެވި މުއްދަތުގައި ވެސް ހުރިހާ ހަރަދެއް ކުރެއްވީ އަމިއްލަފުޅަށް ކަމަށް ވިދާޅުވެފައެވެ.

މީގެކުރިން ވެސް ރައީސް ވަނީ މުލީއާގޭގައި ކުރަމުން ދިޔަ މަރާމާތުތައް ނިމެންދެން ރައީސް ހުންނެވީ އަމިއްލަފުޅު ގެކޮޅު ދިމްޔާތުގައި ހުންނެވިއިރު ހަރަދު ކުރެއްވީ އަމިއްލަފުޅަށް ކަމަށް ވިދާޅުވެފައެވެ.

އެމަނިކުފާނު ދިމްޔާތުގައި ހުންނެވިއިރު 25 މިލިއަން ރުފިޔާ ހަރަދުވި ކަމަށާއި އަދި ފަރިއްކޮޅަށް 30 މިލިއަން ރުފިޔާ ހަރަދުވި ކަމަށް ބުނެ ބައެއް ފަރާތްތަކުން ވާހަކަތައް ދެއްކެވިއެވެ. އެކަމަށް އޭރު ރައީސް ޖަވާބު ދެއްވީ ރައީސް އޮފީހުން ސިލްސިލާ ގޮތެއްގައި އޭރު ގެނެސްދެއްވި"ރައީސްގެ ޖަވާބު" ޕްރޮގްރާމްގައި އާއްމު ފަރާތަކުން ކުރި ސުވާލަކަށް ޖަވާބު ދެއްވަމުންނެވެ.

"އެއީ ހަމަ ކަނޑައެޅިގެން ދޮގު ވާހަކައެއް. އަޅުގަނޑު ގޭގައި ހުރީ އަޅުގަނޑު އަމިއްލަ އަށް ހަރަދު ކޮށްގެން. ދައުލަތުގެ އެއްވެސް ރުފިޔާއެއް އަދި އެއްވެސް ރުފިޔާއެއް ނީންނާނެ ހަރަދު ކޮށްފައެއް. އަދި އެއްވެސް ކަމަކަށް ހަރަދެއް ނުވެސް ކުރުވަން،" މީގެކުރިން ރައީސް މުއިއްޒު ވިދާޅުވިއެވެ.

ރައީސް އޭރު ވިދާޅުވީ އަމިއްލަ ގެކޮޅުގައި ހުންނެވި ނަމަވެސް އުސޫލު އޮންނަނީ ދައުލަތުން ހަރަދު ކުރާ ގޮތަށް ކަމަށެވެ. ނަމަވެސް އަމިއްލަފުޅު ގެކޮޅަށް ދައުލަތުން އެއްވެސް ހަރަދެއް ކުރަން ބޭނުންފުޅު ނުވާ ކަމަށް ރައީސް ވިދާޅުވިއެވެ.