މާލޭގެ ގެއެއްގައި ރަހީނު ކޮށްގެން ގެންގުޅުނު އަންހެނަކު ސަލާމަތް ކޮށްފިއެވެ.

ފުލުހުން މިރޭ ބުނީ މާފަންނު ގެއެއްގެ ތެރޭގައި އަންހެނަކު ބަންދު ކޮށްފައި ހުރި ކަމަށް ތުހުމަތު ކުރެވޭ މައްސަލައަކާ ގުޅިގެން ފުލުހުން ހަރަކާތްތެރިވަމުން އަންނަ ކަމަށެވެ. އަދި އިތުރު މައުލޫމާތު ލިބޭ މިންވަރަކުން ހިއްސާ ކުރާނެ ކަމަށެވެ.

ސޯޝަލް މީޑިއާގައި އަންހެން މީހާ ރަހީނު ކޮށްގެން ހުއްޓާ ހުރި ވީޑިއޯއެއް އާއްމުވެފައިވާއިރު، އެ ވީޑިއޯގައި ފިރިހެނަކު ހުރީ މޫނު އަޅައިގެން ހުރި އަންހެނެއްގެ ކަރުގައި ޖައްސައިގެން ހުރި މަންޒަރު ފެނެއެވެ. އަދި ފަހުން އެ އަންހެން މީހާ ސައިކަލަކަށް އަރައިގެން ގެންދާ މަންޒަރުވެސް ފެނެއެވެ.

އެ ސަރަހައްދުގައި ހުރި "ހަތާވީސް"ގެ ނޫސްވެރިޔާ ބުނީ ރަހީނު ކޮށްގެން ގެންގުޅުނު އަންހެން މީހާ މިހާރު ސަލާމަތް ކޮށްފައިވާ ކަމަށެވެ. އަދި އެ އަންހެން މީހާ ރަހީނު ކޮށްގެން ގެންގުޅުނު ފިރިހެން މީހާ ހައްޔަރު ކޮށްގެން ފުލުހުން ގެންދިޔަ ކަމަށެވެ.

އަންހެން މީހާ ރަހީނު ކޮށްގެން އުޅުނު ފިރިހެން މީހާ ހައްޔަރު ކުރީ އޭނާގެ ގައިގައި ފުލުހަކު މުގުރުން ޖެހި ހިސާބުންނެވެ. އެ ހިސާބުން އެ މީހާ ބިންމައްޗަށް ވެއްޓޭ މަންޒަރު ސޯޝަލް މީޑިއާގައި އާއްމުވެފައިވާ ވީޑިއޯ އިން ފެނެއެވެ. ގިނަ އަދަދެއްގެ ފުލުހުން އެ ހިސާބުގައި ތިއްބެވެ.

އެ ސަރަހައްދުގައި ތިބި ބައެއް މީހުންނާއި ސުވާލު ކުރުމުން، އަންހެން މީހާ ރަހީނުކުރި ފިރިހެން މީހާ އޭނާގެ އަމިއްލަ ގައިގައި ވަޅި އަޅާ ޒަހަމް ކޮށްލި ކަމަށް ބުނެފައިވެއެވެ. ނަމަވެސް އެކަމުގެ ތަފްސީލެއް ފުލުހުން އަދި ހާމައެއް ނުކުރެއެވެ.