މާލީ ބަގާވާތެއް ކުރަން އުޅުނު ކަމުގެ ތުހުމަތު ކޮށްގެން އިދިކޮޅު ލީޑާޝިޕް ހައްޔަރު ކުރަން ސަރުކާރުން މަސައްކަތް ކުރި ނަމަވެސް އެކަމާއި ޖެހިލުން ނުވާ ކަމަށް އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެއެވެ.

ބޭންކް އޮފް މޯލްޑިވްސް (ބީއެމްއެލް)ގެ ރުފިޔާ އެކައުންޓުތަކަށް ދޫކޮށްފައިވާ ކާޑުތަކުން ރާއްޖެއިން ބޭރުގެ ޓްރާންސެކްޝަންތަކަށް އިއްޔެ އިން ފެށިގެން ބޭނުން ނުކުރެވޭ ގޮތަށް ނިންމި ނިންމުމަކީ ސިޔާސީ ބަޔަކު އެކަމުގެ އަޑީގައި ތިބެ، ސަރުކާރު ބަދަލު ކުރަން ކުރި ކަމެއް ކަމަށް ތުހުމަތުކޮށް އެކަމުގެ ތަހުގީގެއް ފުލުހުން ވަނީ ފަށައިފައެވެ.

އެކަމާއި ގުޅޭ ގޮތުން މިއަދު އެމްޑީޕީގެ ލީޑާޝިޕް އިން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ފައްޔާޒު ވިދާޅުވީ ދިވެހި ފުލުހުންގެ ހިދުމަތުގެ ހުރުމަތަށްޓަކައި ވެސް ކޮމިޝަނަރު އޮފް ޕޮލިސް ޝުޖާއު މަގާމުން އިސްތިއުފާ ދެއްވަން ޖެހޭ ކަމަށެވެ.

"މާލީ ބަގާވާތެކޭ ކިޔަސް މެންޓަލް ބަގާވާތަކޭ ކިޔަސް އަޅުގަނޑުމެން އަދި އެހެން ފަހަތަކަށް ޖައްސާލައެއް ނުލެވޭނެ،" ކުރީގެ އިކޮނޮމިކް މިނިސްޓަރު ފައްޔާޒު ވިދާޅުވިއެވެ.

ފައްޔާޒު ވިދާޅުވީ މިއަދު ގައުމުގެ ހާލަތު އޮތް ގޮތުން، ދިވެހި ރައްޔިތުން ބަނޑުހައިހޫނުކަމާ ހިސާބަށް ދާ ތަން އިހުސާސް ކުރެވޭ ކަމަށެވެ. ނަމަވެސް އެ ހިސާބަށް ރައްޔިތުން ނުގެންގޮސް، ހެދިފައިވާ ގޯސްތައް ރަނގަޅު ކުރުމުގެ ފުރުސަތު ސަރުކާރަށް އަދިވެސް އެބައޮތް ކަމަށް އޭނާ ވިދާޅުވިއެވެ.

"އެކަމަކު އަޅުގަނޑުމެންނަށް ފެންނަނީ ވިސްނުންތެރިކަމެއް ނެތި ބޯހަރު އަދި ހުދުމުހުތާރު ގޮތެއްގައި ކަންކަން ކުރައްވަން ރައީސް މުއިއްޒު އުޅުއްވާ ތަން،" ފައްޔާޒު ވިދާޅުވިއެވެ.

ބީއެމްއެލް އިން މިދިޔަ އާދިއްތަ ދުވަހު (25 އޮގަސްޓު 2024)ގެ ހެނދުނު ނިންމި ނިންމުން އެ ދުވަހުގެ ހަވީރު ވަނީ އިހު އޮތް ގޮތަށް ބަދަލުކޮށްފައެވެ. އެގޮތަށް ބަދަލުކުރީ މަރުކަޒީ ބޭންކް (އެމްއެމްއޭ) އިން އަންގައިގެން ކަމަށް ބީއެމްއެލް އިން ބުންޏެވެ. އެކަމާއި ގުޅިގެން އިއްޔެ ސަރުކާރުން ބޭއްވި ނޫސްވެރިންގެ ބައްދަލުވުމެއްގައި އިކޮނޮމިކް މިނިސްޓަރު މުހައްމަދު ސައީދު ވިދާޅުވީ ބީއެމްއެލް އިން އެ ނިންމުން ނިންމީ އެކަން ނުކުރުމަށް ރައީސް ޑރ. މުހައްމަދު މުއިއްޒު އަންގަވާފައި ވަނިކޮށް ކަމަށެވެ.

އެކަމާއި ގުޅިގެން ފުލުހުން ރޭ (26 އޮގަސްޓު 2024) ނެރެފައިވާ ނޫސް ބަޔާނެއްގައި ބުނީ ސަރުކާރުގެ މައި ހިއްސާ އޮންނަ ބޭންކް، ބީއެމްއެލް އިން ސަރުކާރުގެ މަޝްވަރާއާ ހިލާފަށް ދިވެހި ގިނަ ރައްޔިތުންނަށް ކުއްލި ސިހުމެއް ލިބޭ ފަދަ ނިންމުމެއް ނިންމި ވަގުތާ ދިމާކޮށް ސިޔާސީ ފަރާތްތަކުން ސަރުކާރުގެ މާލީ ހާލަތާ ގުޅޭ ގޮތުން ނޫސްވެރިންގެ ބައްދަލުވުމެއް ބާއްވައި ހަމަ އެވަގުތު ސޯޝަލް މީޑިއާގެ އެތައް ސަތޭކަ ބޮޓް އެކައުންޓުތައް ބޭނުން ކޮށްގެން ސަރުކާރު ވައްޓާލަން މަގުތަކަށް ނުކުތުމަށާއި އާންމު ހަމަޖެހުން ނަގާލުމަށް ގޮވައި ގައުމުގެ މަސްލަހަތު ނަގާލުމަށް ހިތްވަރުދީފައިވާ ކަމަށެވެ.

އެކަމަކީ ގާނޫނީ ސަރުކާރެއް ޣައިރު ގާނޫނީކޮށް ބަދަލުކޮށްލުމަށް ކުރެވިގެން ދިޔަ ކަމެއް ކަމަށް ބެލުމުގެ ޖާގަ އޮތުމުން އެ މައްސަލަ ފުލުހުންގެ ހިދުމަތުގެ ފަރާތުން ތަހުގީގު ކުރަން ފަށާފައިވާ ކަމަށް ވެސް ފުލުހުންގެ ބަޔާނުގައިވެއެވެ.

އެކަމަށް އިޝާރާތް ކުރައްވާ ރައީސް ޑރ. މުހައްމަދު މުއިއްޒު ވެސް ވަނީ ޕީއެންސީ ހައުސްގައި ބޭއްވި ހަރުގެ ޖަލްސާގައި ވާހަކަދައްކަވާފައެވެ. އެގޮތުން ބީއެމްއެލް އިން އެ ނިންމުން ނިންމީ ބަޔަކު އަޑީގައި ތިބެގެން ބަގާވަތްކޮށް ސަރުކާރު ވައްޓާލަން ކަމަށް އެމަނިކުފާނު ފާހަގަކުރެއްވިއެވެ.