ފަތުރުވެރިކަމުގެ ދާއިރާގައި މަސައްކަތްކުރާ އަންހެނުން ބާރުވެރި ކުރުމަށް ހިތްވަރު ދިނުމުގެ ގޮތުން ބާއްވާ "މޯލްޑިވްސް ޓްރެވަލް ކޮންފަރެންސް 2024 ވިމެންސް އެޑިޝަން" މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ސްޕޮންސަރ ކޮށްފިއެވެ.

މިއަދު ހޮޓެލް ޖެންގައި ކުރިޔަށް ދިޔަ މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއަރ އޮޕަރޭޓަރސް (މަޓާޓޯ)ގެ މޯލްޑިވްސް ޓްރެވަލް ކޮންފަރެންސް ޝަރަފުވެރިކޮށްދެއްވީ ރާއްޖޭގެ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދެވެ.

މި ރަސްމިއްޔާތުގައި ވާހަކަފުޅު ދައްކަވަމުން، ރައީސުލްޖުމްހޫރިއްޔާގެ އަނބިކަނބަލުން ވިދާޅުވީ މިންތީގެ ހަމަހަމަކަން ޤާއިމުކުރުމުގެ ގޮތުން ޙަޤީޤީ ބަދަލެއް ގެނައުމަށްޓަކައި ހަރުދަނާ ސިޔާސަތުތަކެއް އެކުލަވާލުމަކީ މުހިންމު ކަމެއް ކަމަށެވެ. އަދި އެކަން ޙާޞިލުކުރުމަށްޓަކައި އަންހެން ކަނބަލުންނަށް މަސައްކަތުގެ މާހައުލުގައި ކުރިމަތިވާ ގޮންޖެހުންތައް ދެނެގަތުމަކީ ކޮންމެހެން ކުރަންޖެހޭ ކަމެއްކަން އެކަމަނާ ފާހަގަކުރެއްވިއެވެ. މީގެއިތުރުން، މިންތީގެ ހަމަހަމަކަން ޤާއިމުކުރުމަށް ސަރުކާރުން މަސައްކަތް ކުރައްވާނެކަމުގެ ޔަޤީންކަން ދެއްވިއެވެ.

" މޯލްޑިވްސް ޓްރެވަލް ކޮންފަރެންސް 2024" ގެ ތެރެއިން ---

އެމްއޭސީއެލް އިން ބުނީ މި ކޮންފަރެންސް އެމްއޭސީއެލް އިން ސްޕޮންސަރ ކޮށްދިނުމުގެ މައިގަނޑު މަގުސަދަކީ އެކުންފުންޏަކީ ދިވެހިރާއްޖޭގެ ފަތުރުވެރިކަމުގެ އެންމެ މުހިއްމު އެއް ބައިވެރިޔާ ކަމަށް ވުމާއިއެކު، ރާއްޖޭގެ އެކި ދާއިރާތަކުގައި މަސައްކަތް ކުރާ އަންހެނުން ބާރުވެރިކުރުމަށް، ސަރުކާރުން ކަނޑައަޅާފައިވާ ލަނޑުދަޑިތައް ހާސިލްކުރުމަށް އެއްބާރުލުން ދިނުން ކަމަށެވެ. އަދި ޚާއްސަކޮށް އަންހެނުންނަށް މަސައްކަތުގެ މާހައުލުގައި ހުރި ގޮންޖެހުންތައް ނައްތާލުމާއި، އަންހެނުން ބާރުވެރިކުރުމަށް ހިއްވަރު ދިނުން ކަމަށެވެ.

މި ކޮންފަރެންސްގައި ވާހަކަ ދައްކަވަމުން، އެމްއޭސީއެލް އޭރޯޑްރޯމް މެނޭޖްމެންޓް ސަރވިސަސްގެ ސީނިއަރ ޖެނެރަލް މެނޭޖަރ މަހަމޫދާ ޝަރީފް ވިދާޅުވީ އިންޖިނިއަރިންގ ދާއިރާއާއި އެއަރފީލްޑް މެނޭޖްމަންޓް ދާއިރާގައި އަންހެނުން މަސައްކަތް ކުރަމުން ދިޔަ ނަމަވެސް، ލީޑަރޝިޕްގެ މަޤާމުތަކުގައި އަންހެނުން މަދު ކަމަށެވެ. އަދި ޖިންސުގެ ހަމަހަމަކަން ޤާއިމުކުރުމުގެ މުހިއްމުކަން ފާހަގަކޮށް، އެމް.އޭ.ސީ.އެލްގެ މެނޭޖްމަންޓުން ލީޑަރޝިޕް މަޤާމްތަކަށް އަންހެނުން އައްޔަނުކުރުމަށް މުހިންމު ފިޔަވަޅުތަކެއް އަޅަމުންދާކަމަށް ފާހަގަކުރެއްވިއެވެ.

މީގެ ތެރޭގައި އަންހެނުންނަށް ފުރުސަތުތައް ފަހިކޮށްދިނުމާއި، އަންހެނުންނަށް ކުރިމަތިވާ ގޮންޖެހުންތަކަށް ޙައްލު ހޯދައިދިނުމާއި، އަދި ޖިންސުގެ ތަފާތުކުރުމަށްވުރެ ޤާބިލުކަމަށް އިސްކަންދީ، ޖިންސުގެ ފަރަގު ނައްތާލުމަށް އަންހެނުންނާއި ފިރިހެނުން އެކުގައި މަސައްކަތްކުރަމުންދާކަން އޭނާ ފާހަގަކުރެއްވިއެވެ.

މި ކޮންފަރެންސްގެ މައިގަނޑު މަޤްޞަދަކީ، ފަތުރުވެރިކަމުގެ ދާއިރާގައި އަންހެނުންނަށް ހުރި ފުރުޞަތުތައް އިތުރުކޮށް، އަންހެނުންގެ ދައުރު ފުޅާކުރުމަށް މަގުފަހިކުރުމެވެ.

މި ކޮންފަރެންސްގައި ފަތުރުވެރިކަމުގެ ދާއިރާގައި ހަރަކާތްތެރިވާ އަންހެނުން ބައިވެރިވި ދެ ޕެނަލް ޑިސްކަޝަން ވެސް ވަނީ ކުރިޔަށް ގެންގޮސްފައެވެ. އެގޮތުން މަތީ މަޤާމުތަކުގައި ތަފާތުކުރުން ނައްތާލުމަށާއި އަދި ފަތުރުވެރިކަމުގެ ދާއިރާގައި އަންހެނުންނަށް ދިމާވާ ގޮންޖެހުންތަކާއި، ޒަމާނުއްސުރެ ރާއްޖޭގައި ޓޫރިޒަމް ދާއިރާގައި މަސައްކަތް ކުރާފަރާތްތަކާއި މެދު ދެކޭގޮތާއި ބެހޭގޮތުން ޕެނަލްގެ ބައިވެރިން ވަނީ ހިޔާލު ބަދަލުކޮށްފައެވެ.

"މޯލްޑިވްސް ޓްރެވަލް ކޮންފަރެންސް 2024 - ވިމެންސް އެޑިޝަން" ބާއްވައިފައި ވަނީ ޓޫރިޒަމް މިނިސްޓްރީގެ އިތުރުން ވިމެން އިން މެނޭޖްމަންޓް، ވިމެން އޮން ބޯޑްސް އަދި ވިމެން އާންޓްރަޕްރެއިނަރސް އެސޯސިއޭޝަން - މޯލްޑިވްސް ފަދަ ޖަމިއްޔާތަކުގެ އެއްބާރުލުމާއި އެކުގައެވެ.