މި ސަރުކާރުން މަސައްކަތް ކުރަނީ ލާ މަރުކަޒީ ނިޒާމު ހަލާކުކޮށްލުމަށްފަހު ކަތީބުން ތިބި ޒަމާނުގައި އޮތް ގޮތަށް ބަދަލު ގެންނަން ކަމަށް އެމްޑީޕީގެ ރައީސް އަބްދުالله ޝާހިދު ވިދާޅުވެއްޖެ އެވެ.

އެމްޑީޕީގެ ގައުމީ މަޖިލީހުގައި ވާހަކަ ދައްކަވަމުން ޝާހިދު ރޭ ވިދާޅުވީ އެމްޑީޕީގެ ވެރިކަމުގައި ކައުންސިލްތަކަށް ބޮޑެތި ބާރުތަކެއް ދީ, ދައުލަތުގެ ބަޖެޓުގެ ވަކި މިންވަރެއް ކައުންސިލްތަކަށް ލިބޭ ގޮތަށް ހެދީ ރަށްރަށުގެ ކަންކަން އެ ރަށްރަށުން އަމިއްލައަށް ނިންމަންޖެހޭ ކަމަށް ގަބޫލުކުރާތީ އެވެ. ނަމަވެސް މި ސަރުކާރުން މަސައްކަތްކުރަނީ ހުރިހާ ބަޖެޓެއް މައި ސަރުކާރުގެ ދަށުގައި ބާއްވާ ގޮތަށް ބަދަލު ގެނައުމަށް ކަމަށާއި އެއީ އަނެއްކާވެސް އެޓޮލްސް މިނިސްޓްރީގެ ޒަމާނުގައި ކަތީބުން ތިބެގެން ރަށްތައް ބެލެހެއްޓި ގޮތަށް ބަދަލު ގެނައުން ކަމަށް އޭނާ ވިދާޅުވި އެވެ.

"ދެން ޖެހޭނީ ކައުންސިލްތަކުން ކުޑަ ސިޓީ ފޮނުވައިގެން މިނިސްޓްރީގައި އާދޭސް ދަންނަވައިގެން ދޮޅު ރުފިޔާ ބައި ކައުންސިލަށް ލިބޭތޯ ސަލާން ޖެހުމަށް. މި ނިޒާމު އެމްޑީޕީއަކުން ގަބޫލެއް ނުކުރާނަން. އެއީ މި ނިޒާމަކީ އަނެއްކާވެސް ބޯދާ ޒަމާނަށް, ކަތީބު ސިސްޓަމަށް މި ރާއްޖެ ގެންދިއުމަށް ކުރަމުންދާ މަސައްކަތެއް." ޝާހިދު ވިދާޅުވި އެވެ.

ޝާހިދު ވިދާޅުވީ މި ސަރުކާރުން ލާ މަރުކަޒީ ނިޒާމު ބަދަލު ކުރަމުންދަނީ މަގުބައްތި ޖެހުމާއި ގަބުރުސްތާނު ބެލެހެއްޓުމުގެ ބާރު އެކަނި ކައުންސިލްތަކަށް ލިބޭ ގޮތަށް ކަމަށެވެ. އަދި އެ ފުރުސަތު އެމްޑީޕީން ނުދޭނެ ކަމަށާއި އެކަމާ ދެކޮޅަށް އެ ޕާޓީން މަސައްކަތް ކުރާނެ ކަމަށް އޭނާ ވިދާޅުވި އެވެ.

"ފަށަލައަކަށްފަހު ފަށަލައެއް ނޮޅަމުން ގެންގޮސް, ލާ މަރުކަޒީ ނިޒާމަކީ ހަމައެކަނި ރަށްރަށުގެ މަގުބައްތި ޖަހާލުމާއި ގަބުރުސްތާނުގެ ވަށާ ފާރު ރޭނުމުގެ މަސައްކަތް ހަވާލުވެފައި ތިބި ބައެއް ކަމަށް ހަދައި, ބޭކާރުކޮށްލަނީ." ޝާހިދު ވިދާޅުވި އެވެ.

ޝާހިދު ވިދާޅުވީ ލާ މަރުކަޒީ ނިޒާމަކީ އެމްޑީޕީން އުފަންކުރި ދަރިއެއް ކަމަށެވެ. އަދި ކުރީގެ ރައީސް އަބްދުالله ޔާމީންގެ ވެރިކަމުގައި ޕީޕީއެމުން އިސްވެ އޮވެ ލާ މަރުކަޒީ ނިޒާމުގެ ބާރު ކުޑަކޮށްލި ގޮތަށް މި ސަރުކާރުން މަސައްކަތް ކުރަމުންދަނީ އެގޮތަށް ކަމަށާއި އެކަމާ ދެކޮޅަށް ކައުންސިލްތަކުން މަސައްކަތް ކުރަން ޖެހޭ އޭނާ ވިދާޅުވި އެވެ.

"ރާއްޖޭގެ ހުރިހާ ކައުންސިލްތަކަކުން މިކަން ކުށްވެރިކޮށް ބަޔާން ނެރުމަށް އަޅުގަނޑު ގޮވާލަން. އަޅުގަނޑުމެން އިރާދަކުރެއްވިއްޔާ މި ޕާޓީ ތިބޭނީ ވަރަށް ސާބިތުކަމާ އެކީގައި ރައްޔިތުންނަށް ބާރުތައް ދިނުމުގައި." ޝާހިދު ވިދާޅުވި އެވެ.

ޝާހިދު ވިދާޅުވީ ރަށްރަށުގެ ކަންކަން ނިންމުމުގެ ބާރު މާލޭގައި ހުންނަ މިނިސްޓަރަކަށް ލިބިގެން ނުވާނެ ކަމަށެވެ.