ކުރީގެ ފޮރިން މިނިސްޓަރު ޝާހިދުގެ ދަރިން ހުޅުމާލެއިން އެޕާޓްމަންޓުތަކެއް ބައްލަވައިގެންފައިވާ ކަމަށް ބުނެ، ފަތުރަމުންދާ ވާހަކަތަކަށް އެމަނިކުފާނު ޖަވާބުދާރީވެވަޑައިގެންފިއެވެ.

ޝާހިދު މިއަދު "ފޭސްބުކް"ގައި ކުރެއްވި ޕޯސްޓެއްގައި ބުނެފައި މާލޭގައި 10 ބުރީގެ އެޕާޓްމެންޓެއް ޢިމާރާތްކޮށް ކުއްޔަށްދިނުމުގެ ވިޔަފާރި ކުރަމުން އަންނަތާ އެތައް ޒަމާނެއްވެފައިވާ ކަމަށާއި މާތްاللهގެ ރަޙްމަތްފުޅުން ޢާއިލާއަށް ބޭނުންވާ ކަންތައްތައް ޤާނޫނުގެ އިމުގެތެރޭގައި ކުރެވޭވަރުގެ ތަނަވަސްކަން މިންވަރު ކުރައްވާފައިވާ ކަމަށެވެ.

ޝާހިދު މިހެން ވިދާޅުވީ އެމަނިކުފާނުގެ ތިން ދަރިން ކަމަށްވާ މޫސާ ޔަމީން ޝާހިދާއި އިސްމާއިލް ޔަޒީން ޝާހިދާއި އައިމިނަތު ޔާނިއާ ޝާހިދުގެ ނަމުގައި ހުޅުމާލެއިން އަގުބޮޑު އެޕާޓްމަންޓުތަކެއް ގަނެފައިވާ ކަމަށް ބުނެ، ދިޔަރެސް ނޫހުން މިއަދު ފަތުރާފައިވާ ހަބަރަކާ ގުޅިގެންނެވެ.

އެ ވާހަކަތަަކަށް ރައްދު ދެއްވައި ޝާހިދު ވިދާޅުވީ ހުޅުމާލެ ރެއިންކުރެސްޓް އިން ގަނެފައިވާ އެޕާރޓްމެންޓް ޔަމީން ގަނެފައި ވަނީ ބޭންކް އިން ލޯނެއް ނަގައިގެން ކަމަށެވެ. ލޯނު މިހާރުވެސް އަނބުރާ ދައްކަމުންދާ ކަމަށާއި އެ ބުނާ އެޕާޓްމެންޓްތައް ގަނެފައި ވަނީ ނިމިދިޔަ ސަރުކާރުގައި ވަޒީރުކަމަށް ވަޑައިގެންނެވުމުގެ ކުރިން ކަމަށް ޝާހިދު ވިދާޅުވެފައިވެއެވެ.

"އަޅުގަނޑާއި އަޅުގަނޑުގެ ދަރިންނަކީވެސް ދިވެހި ރައްޔިތުންނަށްވާތީ އަޅުގަނޑުމެންނަށް ވެސް މުދާ ހޯދުމާއި މުދާ ގެންގުޅުމުގެ ޙައްޤު ޤާނޫނު އަސާސީ ގެ 40 ވަނަ މާއްދާއިން ކަށަވަރު ކޮށްދެއެވެ،" ޝާހިދު ފޭސްބުކްގައި ވިދާޅުވެފައިވެއެވެ.

"މިކަމާމެދު ސުވާލު ކުރައްވާ ފަރާތްތަކުން އަބުރުކަތިލާ ޒާތީ ދިރިއުޅުމުގެ ކަންކަމާބެހި ގަނާކުރުމުގެ ބަދަލުގައި ޤާނޫނީ އިމުގެ ތެރޭގައި އެންޓި ކޮރަޕްޝަން ކޮމިޝަން އަށް ހުށަހަޅުއްވައި އެ ކޮމިޝަނުން މިކަންކަން ބެއްލެވުމަށް މަރުޙަބާކިޔަމެވެ،"