ރާއްޖޭގެ އެންމެ ބޮޑު ހޮސްޕިޓަލް، އައިޖީއެމްއެޗުގެ ނަރުހަކާ ގުޅޭ މަސްތުވާތަކެތީގެ މައްސަލައެއް ފުލުހުން ތަހުގީގު ކުރަމުން އަންނާތީ އެ ނަރުސް މީހާ އައިޖީއެމްއެޗް އިން ސަސްޕެންޑުކޮށްފިއެވެ.

ފުލުހުން ބުނީ މީގެ ދެ ހަފްތާ ކުރިން ފުލުހުންނަށް އެ މައްސަލަ ހުށަހަޅާފައި ވަނީ އެ ހޮސްޕިޓަލުގެ ފަރާތުން ކަމަށް ފުލުހުން ބުންޏެވެ.

އައިޖީއެމްއެޗް އިން ބުނީ އެ ނަރުސް މީހާއާ ގުޅޭ މައްސަލައެއް ފުލުހުން ތަހުގީގު ކުރަމުން އަންނާތީ އެމީހާ ސަސްޕެންޑު ކޮށްފައިވާ ކަމަށެވެ.

މައުލޫމާތު ލިބިފައިވާ ގޮތުގައި އެ ނަރުސް މީހާ އަކީ އައިޖީއެމްއެޗުގެ ވޯޑު އިންޗާޖަކަށް ކުރިން ހުރި މީހެކެވެ. އެކަމަކު އައިޖީއެމްއެޗް އިން ބުނީ މަސައްކަތުގެ ފެންވަރަށް ބެލުމަށްފަހު މީގެ ދެމަސް ކުރިން ވޯޑް އިންޗާޖުގެ ވަޒީފާގެ މަސްއޫލިއްޔަތު އެމީހާގެ އަތުން ނަގާފައިވާ ކަމަށެވެ.