ސަރުކާރު ހިއްސާވާ ގިނަ ކުންފުނިތަކެއްގެ ބޯޑުތަކުން ގިނަ އަދަދެއްގެ ބަޔަކު ވަކި ކުރައްވަވާ، އެ މަގާމުތަކަށް އައު ބަޔަކު އައްޔަން ކުރައްވައިފިއެވެ.

ޕްރައިވަޓައިޒޭޝަން އެންޑް ކޯޕަރައިޓައިޒޭޝަން ބޯޑު (ޕީސީބީ) އިން އެ ބަދަލުތައް ގެނެސްފައި ވަނީ މިމަހުގެ 8ވަނަ ދުވަހު ކަމަށް އެ ބޯޑުން ބުންޏެވެ. އެ ބޯޑުން އާއްމު ކޮށްފައިވާ މައުލޫމާތުތަކުން އެނގޭ ގޮތުން ސަރުކާރު ހިއްސާވާ 10 ކުންފުންޏެއްގެ ބޯޑަށް ވަނީ ބަދަލުތައް ގެނެސްފައެވެ.

ނަމަވެސް ބަދަލުތައް ގެނައި ހުރިހާ ކުންފުނިތަކެއް ބޯޑަށް އައު މެންބަރުންތަކެއް އައްޔަން ކުރައްވާފައެއް ނުވެއެވެ. މިގޮތަށް އައު ބޭފުޅުން އައްޔަން ކޮށްފައި ވަނީ ދެ ކުންފުންޏަކަށެވެ.

ޕީސީބީން ގެނެސްފައިވާ ބަދަލުތަކުގެ ތެރެއިން އައްޑޫ އިންޓަނޭޝަނަލް އެއާޕޯޓް ކުންފުނީގެ ޑިރެކްޓަރުންގެ ބޯޑު މެންބަރު ކަމުން ހުސެއިން މުހައްމަދު ދީދީ އާއި ޝާތިފް އަލީ އަދި ޝަޒުރާ ޝާކިރު ވަނީ ވަކި ކުރައްވާފައެވެ.

ހައުސިން ޑިވެލޮޕްމެންޓް ފައިނޭންސް ކޯޕަރޭޝަން (އެޗްޑީއެފްސީ)ގެ ބޯޑުން މުހައްމަދު ރަޝީދާއި ހާމިދު ސޯދިގު ވަކި ކުރެއްވިއިރު އެ ކުންފުނީގެ ބޯޑަށް ޒިދުނާ އިބްރާހިމް އައްޔަން ކުރައްވާފައިވެއެވެ.

ބިޒްނަސް ސެންޓާ ކޯޕަރޭޝަން (ބީސީސީ)ގެ ބޯޑު މެންބަރުކަމުން ލަމްޔާ އިބްރާހިމާއި އަހުމަދު އިފްތިހާރު ވަކިކުރެއްވިއިރު މޯލްޑިވްސް ޕޯސްޓްގެ ޗެއާޕާސަން ވެސް ވަނީ މަގާމުން ވަކިކުރައްވާފައެވެ. އަދި އެކުންފުނީގެ ބޯޑު މެންބަރުކަމުން މެންބަރު މުހައްމަދު ނާޝިދު ވެސް ވަކި ކުރެއްވިއެވެ. ހަމައެއާއެކު އެ މަގާމަށް ހައްވާ ސަފްނާ ވަނީ އައްޔަންކުރެއްވިއެވެ.

ފަހި ދިރިއުޅުން ކޯޕަރޭޝަންގެ ބޯޑު މެންބަރުކަމުން ނަޖީލް އަހުމަދު ވެސް ވަނީ ވަކި ކުރައްވާފައެވެ. ވޭސްޓް މެނޭޖްމެންޓް ކޯޕަރޭޝަންގެ ޑިރެކްޓަރުންގެ ބޯޑުން އަލީ ނަބީލާއި މުސްތަފާ މުހައްމަދު އަދި އަލީ އިކްރާމު ވަކި ކުރެއްވިއިރު ފެނަކަ ކޯޕަރޭޝަންގެ ޗެއާޕާސަން އަހުމަދު ޝަހީރާއި ބޯޑު މެންބަރު އިބްރާހިމް ނާއިފާއި އަހުމަދު އީހާބު ވެސް މަގާމުން ވަނީ ވަކި ކުރައްވާފައެވެ.

އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަންގެ ބޯޑުން ޝުހުދާ އިބްރާހިމް ވަކި ކުރެއްވިއިރު ޓްރޭޑް ނެޓް މޯލްޑިވްސް ކޯޕަރޭޝަންގެ ޑިރެކްޓަރުންގެ ބޯޑުން ނާހިޔާ މުހައްމަދު ވެސް ވަކިކުރެއްވިއެވެ. އަދި ޕޮލިސް ވެލްފެއާ ކޯޕަރޭޝަންގެ ބޯޑު މެންބަރުކަމުން އަލީ ނަޒީރުވެސް ވަނީ ވަކި ކުރައްވާފައެވެ.