ޗައިނާގެ ޖެޓްތައް ޓައިވާންގެ ސަރަހައްދަށް ވަނުން އާއްމު ވެއްޖެ

ޗައިނާގެ އަސްކަރީ ޖެޓްތަކުން ޓައިވާނުގެ އެއަރ ޑިފެންސް އައިޑެންޓިފިކޭޝަން ޒޯނަށް ވަނުން އާއްމުވެއްޖެއެވެ.

ޓައިވާނުގެ މިނިސްޓްރީ އޮފް ނޭޝަނަލް ޑިފެންސް އިން ބުނީ މިދިޔަ އަންގާރަ ދުވަހު ވެސް ޗައިނާގެ އަސްކަރީ 21 މަތިންދާ ބޯޓެއް ޓައިވާނާ ކައިރިއަށް އައި ކަމަށާއި، އޭގެ ތެރެއިން 18 ވައިގެ އުޅަނދު ޗައިނާ-ޓައިވާން މެދުރޮނގު ހުރަސްކޮށް ޓައިވާންގެ ސަރަހައްދަށް ވަދެފައިވާ ކަމަށެވެ. ހޯމަ ދުވަހު ވެސް ވައިގެ 9 އުޅަނދެއް ޓައިވާން ސަރަހައްދަށް ވަދެފައިވާއިރު، ޗައިނާގެ ކަނޑުގެ ސިފައިންގެ 9 އުޅަނދެއް ވެސް ޓައިވާން ކައިރީގައި ހަރަކާތްތެރިވި ކަމަށް ޓައިވާނުން ބުނެއެވެ.

ޓައިވާނުގެ ދިފާޢީ ވުޒާރާއިން ބުނީ ޗައިނާގެ އަމަލުތައް ވަރަށް ކައިރިން ބަލަމުންދާކަމަށެވެ. އޮގަސްޓް މަހުގެ މިހާ ހިސާބަށް އައި އިރު ޗައިނާގެ 80 ވަރަކަށް ވައިގެ އުޅަނދާއި 36 ކަނޑުގެ އަސްކަރިއްޔާގެ އުޅަނދު ޓައިވާނާއި ކައިރިން ނުވަތަ ރޮނގު ހުރަސްކޮށް ޓައިވާން ސަރަހައްދަށް ވަދެފައިވާކަން ފާހަގަކުރެވިފައިވާ ކަމަށް ޓައިވާނުން ބުނެއެވެ.

މިއީ 2020 ވަނަ އަހަރުން ފެށިގެން ޗައިނާއިން ބޭނުން ކުރަމުން އަންނަ އުކުޅެކެވެ. ޓައިވާނާއި ޗައިނާއާ ދެމެދު އޮންނަ 'ގްރޭ އޭރިއާ' ތެރެއަށް ވަނުން ޗައިނާއިން ވަނީ އާއްމުކަމަކަށް ހަދާފައެވެ. މިކަމަކީ ބައިނަލްއަގްވާމީ މުޖްތަމައުން ކަންބޮޑުވުން ފާޅުކުރަމުންދާ ކަމެކެވެ.

1949 ވަނަ އަހަރުން ފެށިގެން އަމިއްލަ ވެރިކަމެއް އިއުލާންކޮށްގެން ހިންގަމުންދާ ޓައިވާނަކީ ޗައިނާއިން ގަބޫލުކުރާ ގޮތުގައި އެ ގައުމުގެ ބައެކެވެ. އަދި ކޮންމެ ވެސް ދުވަހަކުން ޓައިވާނަކީ ޗައިނާގެ ފުރިހަމަ ކޮންޓްރޯލް އޮންނަ ސަރަހައްދަކަށް ހަދާނެ ކަމަށް ޗައިނާއިން ބުނާއިރު، އެކަމުގައި ބާރުގެ ބޭނުން ކުރަން ޖެހުނަސް އެކަން ވެސް ކުރާނެކަމަށް އެ ގައުމުން ބުނެއެވެ.

ޓައިވާން މައްސަލައަކީ އިރުމަތީގެ ޚާރިޖީ ސިޔާސަތު ބައްޓަންކުރުމާއި، ހުޅަނގުގެ ގައުމުތަކުން އިރުމަތީ ގައުމުތަކާ ބެހޭ ޚާރިޖީ ސިޔާސަތު ބައްޓަންކުރުމުގައި މުހިއްމު ރޯލެއް އަދާކުރާ މައްސަލައެކެވެ.