މާލެ ސަރަހައްދާއި ރަށްރަށުގައި ތަރައްގީ ކޮށްފައިވާ ފްލެޓުތަކަށް ދައްކަން ޖެހޭ ފައިސާ ނުދައްކާ އެތަންތަން ކުއްޔަށް ދޭ މައްސަލަ ބަލަމުން އަންނަ ކަމަށަ ހައުސިން މިނިސްޓްރީން ބުނެފިއެވެ.

ހައުސިން މިނިސްޓްރީން މިރޭ ނެރެފައިވާ ނޫސް ބަޔާނެއްގައި ބުނީ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުންނާއި ރައީސް ޑރ. މުހައްމަދު މުއިއްޒުގެ ރިޔާސީ ވައުދުގެ ދަށުން މާލެ ސަރަހައްދާއި ރަށްރަށުގައި ތަރައްގީ ކޮށްފައިވާ ފްލެޓުތަކުން މަހުން މަހަށް ދައްކަން ޖެހޭ ފައިސާ (އެސްޓިމޭޓެޑް މަންތާލީ އިންވެސްޓްމަންޓު) ގެ 20 ޕަސެންޓު މައާފު ކޮށްދީފައިވާ ކަމަށެވެ.

އެގޮތުން މިދިޔަ ޖެނުއަރީ މަހުގެ އެއްވަނަ ދުވަހުން ފެށިގެން މަހުން މަހަށް ދައްކަން ޖެހޭ ފައިސާ ގަވާއިދާ އެއްގޮތަށް ދެއްކުމަށް ފްލެޓުތަކުގެ ވެރި ފަރާތަށް އަންގާފައިވާނެ ކަމަށް ބަޔާނުގައިވެއެވެ.

ނަމަވެސް ގިނަ ފަރާތްތަކުން އަދިވެސް ފައިސާ ނުދައްކާ ކަމަށް ހައުސިން މިނިސްޓްރީން ބުންޏެވެ.

އެ މިނިސްޓްރީން ބުނީ ގަވާއިދުން ފައިސާ ނުދައްކާ ކަނޑައެޅިފައިވާ ގޮތާއި ހިލާފަށް ފްލެޓުތައް ބޭނުންކޮށް، ގަވާއިދާ ހިލާފަށް ފްލެޓަށް ބަދަލު ގެނައުމާއި ކުއްޔަށް ދިނުމާއި ގުޅޭ ކަންކަން ބަލަމުން އަންނަ ކަމަށެވެ.

ގަވާއިދާ ހިލާފުވެފައިވާ ފަރާތްތަކާއި މެދު ފިޔަވަޅު އަޅާނެ ކަމަށްވެސް ހައުސިން އިން ނެރެފައިވާ ބަޔާނުގައިވެއެވެ.