ސަރުކާރުގެ އެންމެ ބޮޑު ކަރަންޓު ކުންފުނި ސްޓެލްކޯ އިން ކަރަންޓު ބިލު ހަދާއިރު ގަސްތުގައި ބިލު ބޮޑު ނުކުރާނެ ކަމަށާއި އަދި ބިލު ބޮޑު ކުރުމަށް އެއްވެސް މަކަރެއް ނުހަދާނެ ކަމުގެ ޔަގީންކަން އެކުންފުނިން ދީފިއެވެ.

ސްޓެލްކޯ އިން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ސްޓެލްކޯގެ ޖެނެރަލް މެނޭޖަރު އަހްމަދު ސައިފް ވިދާޅުވީ ކަރަންޓު ބިލު ރައްޔިތުންނާއި ހަމައަށް ދާއިރު އިތުރަށް ފައިސާ ހޯދުމަށް އެއްވެސް މަސައްކަތެއް ކޮށްފައި ނުހުންނާނެ ކަމަށެވެ. އެއްވެސް އޮޅުވާލުމެއް ބިލު ހެދުމުގައި އެކުންފުނިން ނުގެންގުޅޭނެ ކަމަށް ސައިފް ވިދާޅުވިއެވެ.

ބައެއް ފަރާތްތަކުން ސްޓެލްކޯ އިން މީޓަރުތަކަށް ގޮތެއް ހަދާ ކަމަށް ބުނާ ކަމަށާއި ނަމަވެސް މިހާރުވެސް ރައްޔިތަކު އެދިއްޖެ ނަމަ މީޓަރު ޓެސްޓު ކުރުމަކީ ސްޓެލްކޯ އިން ކޮށްދޭ ކަމެއް ކަމަށް ސައިފް ވިދާޅުވިއެވެ.

"އެހެންވީމަ ތިޔަ ބޭފުޅުން އެ ޔަގީންކަން ބާއްވާ. ސްޓެލްކޯ އަކުން މަކަރެއް ނުހަދާނެ. ސްޓެލްކޯ އަކުން ބިލު ބޮޑެއް ނުކުރާނެ،" ސައިފް ވިދާޅުވިއެވެ.

ސްޓެލްކޯ އިން މިއަދު ބޭއްވި ނޫސްވެރިންގެ ބައްދަލުވުމުގައި ސައިފް ވާހަކަދައްކަވަނީ: ފޮޓޯ | ސްޓެލްކޯ

މި ބައްދަލުވުމުގައި ވާހަކަދައްކަވަމުން އެކުންފުނީގެ ޖެނެރަލް މެނޭޖަރު އިބްރާހީމް ނާޝިދު ވިދާޅުވީ ސްޓެލްކޯ އިން ކަރަންޓު ބިލު ހަދަނީ މީޓަރުގެ ރީޑިން ނެގުމަށްފަހު އެ މީޓަރުގައިވާ އެއްޗަކަށް ކަމަށެވެ. އޭނާ ވަނީ ވޭތުވެދިޔަ މަހާ އަޅާ ބަލާއިރު މާލޭގެ 84 ޕަސެންޓު ރައްޔިތުންނަށް މިމަހުގެ ކަރަންޓު ބިލު ކުޑަކަން ފާހަގަކުރައްވާފައެވެ. އޭނާ ވިދާޅުވީ ފްރިކުއެންސީ ނުވަތަ ވޯލްޓޭޖު ބަދަލު ކޮށްގެން ކަރަންޓު ބިލު ބޮޑު ކުރުމުގެ މަސައްކަތެއް އެކުންފުނިން ނުކުރާނެ ކަމަށެވެ.

"އެހެންވީމަ އަޅުގަނޑުމެން ވަކި ގެއެއްގެ މީޓަރެއް ވަކި ގޮތަކަށް އަނބުރާނެ ކަމަށް އެއީ އަޅުގަނޑުމެން ކުރާނެ ކަމެއް ނޫން ކުރާ ކަމެއް ނޫން،" ނާޝިދު ވިދާޅުވިއެވެ.

ސްޓެލްކޯ އިން މިއަދު ބޭއްވި ނޫސްވެރިންގެ ބައްދަލުވުމުގައި ނާޝިދު ވާހަކަދައްކަވަނީ: ފޮޓޯ | ސްޓެލްކޯ

ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ މިއަދު ވިދާޅުވީ މާލެއަށް ބަލާއިރު ހަ ޕަސެންޓް ރައްޔިތުންގެ ބިލު ބޮޑުކަން ފާހަގަކުރެވިފައިވާ ކަމަށެވެ. އަދި ހުޅުމާލެ އަށް ބަލާއިރު 15 ޕަސެންޓު ރައްޔިތުންގެ ބިލު ބޮޑުކަން ފާހަގަކުރެވިފައިވާ ކަމަށެވެ.

އެހެން ދިމާވި ސަބަބު ސްޓެލްކޯއިން ޓެކްނިކަލްކޮށް ބަލާނެ ކަމަށް އެމްޑީ ވިދާޅުވިއެވެ. ނަމަވެސް ސްޓެލްކޯގެ ބިލިން އިންޓަގްރިޓީއާ މެދު ޝައްކު ނުކުރައްވާ ކަމަށް ފަހުމީ ވިދާޅުވިއެވެ. އަދި އޭނާ ވަނީ ސްޓެލްކޯގެ ބިލިން ސިސްޓަމްތައް ބެލުމަށް ކަމާ ގުޅުންހުރި މުއައްސަސާތަކަށް ދައުވަތު އަރުއްވައިފައެވެ.