ބޭންކް އޮފް މޯލްޑިވްސް (ބީއެމްއެލް) ގެ ބޯޑާއި އިސްވެރިންގެ މުސާރައަކީ ވިޔަފާރީގެ ސިއްރުތަކެއް ކަމަށްވާތީ އެ މައުލޫމާތު ހާމަ ކުރަން ނުޖެހޭނެ ކަމަށް ސުޕްރީމް ކޯޓުން މިއަދު ހުކުމްކޮށްފި އެވެ.

ބީއެމްއެލްގެ ބޯޑާއި އިސް މުވައްޒަފުންގެ މުސާރަ އާއި އިނާޔަތްތައް ހާމަކުރަން އިންފޮމޭޝަން ކޮމިޝަނަރު އެންގީ މުހައްމަދު އައިމަންގެ ފަރާތުން އެދިގެންނެވެ. އެ އެންގުމަށް ހައި ކޯޓުން ކުރިން އޮތީ ތާއީދު ކުރުމުން އެ މައްސަލަ ބީއެމްއެލްގެ ފަރާތުން ސުޕްރީމް ކޯޓުގައި އިސްތިއުނާފްކުރީ އެ ކުންފުނީގެ މުވައްޒަފުންގެ މުސާރަ އާއި އިނާޔަތްތަކަކީ ވިޔަފާރީގެ ސިއްރުތަކެއް ކަމަށް ބުނެ އެވެ.

ސުޕްރީމް ކޯޓުން މިއަދު ކުރި ހުކުމުގައި ވަނީ ބީއެމްއެލްގެ ބޯޑާއި އިސް މުވައްޒަފުންގެ މުސާރަ އާއި އިނާޔަތްތަކަކީ އެ ކުންފުނީގެ ވިޔަފާރީގެ ސިއްރުތަކެއް ކަމަށް ބެލެވޭ ކަމަށެވެ. އަދި އެއީ ބައެއް ޒާތީ މައުލޫމާތެއް ކަމަށްވާއިރު އެފަދަ މައުލޫމާތުތަކަކީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ހިމާޔަތް ކޮށްފައިވާ މައުލޫމާތުތަކެއް ކަމަށް ވާތީ އެ މީހުންގެ ހުއްދަ ނެތި އެ މައުލޫމާތު އާންމު ނުކުރެވޭނެ ހުކުމުގައިވެ އެވެ.

ހުކުމުގައިވާ ގޮތުން މީހުންގެ ޒާތީ މައުލޫމާތުތައް ވެސް ހާއްސަ ހާލަތްތަކުގައި ހާމަކުރަން އެންގުމުގެ ބާރު މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އޮތް ނަމަވެސް، މި މައްސަލާގައި އެފަދަ ހާލަތެއް ނެތެވެ.

"ތިން ވަނަ ފަރާތްތަކުގެ ރުހުން ނެތް ނަމަވެސް އެ މައުލޫމާތުތަކަކީ ދޫކުރަންޖެހޭ ފަދަ ފުޅާ އާންމު މަސްލަހަތެއް އޮތް މައުލޫމާތެއް ވެސް ނޫން." ހުކުމުގައިވެ އެވެ.

ނަމަވެސް ހުކުމުގައިވާ ގޮތުން ބީއެމްއެލްގެ މައްޗަށް މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ އުސުލޫތައް ހިންގޭނެ އެވެ. ސަބަބަކީ އެއީ ސަރުކާރުގެ މެޖޯރިޓީ ހިއްސާ އޮތް ކުންފުންޏެއް ކަމަށް ވާއިރު، އެ ކުންފުންޏަށް ސީދާގޮތުންނާއި ނުސީދާ ގޮތުން ދައުލަތުގެ ކޮންޓްރޯލް އޮތުމެވެ.