އިންފޮމޭޝަން ކޮމިޝަން (އައިކޮމް) ގެ ނިންމުމަކަށް އަމަލު ނުކުރުމުން ރައީސް އޮފީހުގެ މައްސަލައެއް ޕްރޮސިކިއުޓާ ޖެނަރަލް (ޕީޖީ)ގެ އޮފީހަށް ހުށަހަޅާފައިވީ ނަމަވެސް އެ މައްސަލަ އަކީ ކުރީ ސަރުކާރާ ގުޅުންހުރި މައްސަލައެއް ކަމަށް ރައީސް އޮފީހުގެ ތަރުޖަމާން ހީނާ ވަލީދު ހާމަ ކުރައްވައިފިއެވެ.

ހީނާ އެކްސްގައި މިއަދު ކުރެއްވި ޕޯސްޓެއްގައި ވިދާޅުވީ އާރްޓީއައިގެ ދަށުން، ރައީސް އޮފީހުން މައުލޫމާތު ނުދީގެން، ޖިނާއީ ދައުވާކޮށްދެއްވުން އެދި އިންފޮމޭޝަން ކޮމިޝަނަރުގެ ފަރާތުން ޕީޖީއަށް ހުށަހަޅުއްވާފައިވާ މައްސަލައަކީ، މި ސަރުކާރާ ގުޅުންހުރި މައްސަލައެއް ނޫން ކަމަށެވެ.

އަދި ވިދާޅުވީ އެއީ، މި ސަރުކާރު ފެށުމުގެ މާ ކުރީން ކޮވިޑް ވެކްސިންގެ މައުލޫމާތުތަކެއް ސާފުކުރަން 2022 ވަނަ އަހަރު ހުށަހަޅާ އޭރު މައުލޫމާތު ނުދީ އޮތް މައްސަލައެއް ކަމަށެވެ.

ޕީޖީން ވަނީ އެ މައްސަލައިގެ ތަހުގީގު ހިންގުމަށް ފުލުހުންނަށް އަންގާފައިވާ ކަމަށް ބުނެފައެވެ.