ކޮމިޝަނަރު ޖެނެރަލް އޮފް ކަސްޓަމްސްގެ މަގާމުގައި ހުންނެވި ޔޫސުފް މާނިއު މުހައްމަދު އެ މަގާމުން ވަކި ކުރައްވައި، އެ މަގާމަށް އަންހެން ބޭފުޅަކު ފުރަތަމަ ފަހަރަށް އައްޔަން ކުރައްވައިފިއެވެ.

ރައީސް ޑރ. މުހައްމަދު މުއިއްޒު މިއަދު ވަނީ ކަސްޓަމްސްގެ ވެރިއަކަށް ޑެޕިއުޓީ ކޮމިޝަނަރު ޖެނެރަލް އޮފް ކަސްޓަމްސްގެ މަގާމުގައި ހުންނެވި ޅ. ހިންނަވަރު ސަންދުރަ، ފާތިމަތު ދިޔާނާއެވެ. އެ މަގާމަަށް ދިޔާނާ އައްޔަން ކުރެއްވީ ސްޓޭޓް މިނިސްޓަރުގެ ފެންވަރުގައެވެ.

ދިޔާނާ އަށް މަގާމުގެ ލިޔުން ހަވާލުކުރެއްވީ މިއަދު އެކަމަށްޓަކައި ރައީސް އޮފީހުގައި އޮތް ރަސްމިއްޔާތެއްގައި ރައީސް މުއިއްޒެވެ.

ރައީސް އޮފީހުން ބުނީ މީގެ ކުރިން ކޮމިޝަނަރު ޖެނެރަލް އޮފް ކަސްޓަމްސްގެ މަގާމުގައި ހުންނެވީ މާނިއު މިއަދު ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓްރީގެ ސްޓޭޓް މިނިސްޓަރުކަމުގެ މަގާމަށް ބަދަލުކުރައްވާފައިވާ ކަމަށެވެ.