މާދަމާ ބާއްވާ މާލޭ ސިޓީ ކައުންސިލްގެ ބައި އިލެކްޝަންގައި އެމްޑީޕީގެ ކެންޑިޑޭޓުންނަށް ވޯޓު ދިނުމަށް މާލޭ ސިޓީގެ މޭޔަރު އާދަމް އާޒިމް އާދޭހާ އެކު އެދިވަޑައިގެންފިއެވެ.

މާލޭ ސިޓީ ކައުންސިލްގެ ތިން ގޮނޑިއެއް ހުސްވީ އެ ކައުންސިލްގެ މެމްބަރުންގެ ތެރެއިން ތިން ބޭފުޅަކު، މަޖިލީހަށް އިންތިހާބުވެވަޑައިގެންނެވުމުންނެވެ. ހުސްވެފައިވަނީ ހެންވޭރު ހުޅަނގު ދާއިރާގެ ގޮނޑި އާއި ހުޅުމާލޭ ދާއިރާގެ ގޮނޑި އަދި މައްޗަންގޯޅީ މެދު ދާއިރާގެ ގޮނޑިއެވެ.

އާޒިމް މިއަދު ވީޑިއޯ މެދުވެރިކޮށް އާންމު ކުރި އިންޓަރވިއުއެއްގައި ވިދާޅުވީ އެމްޑީޕީގެ ކެންޑިޑޭޓުންނަކީ ވަރަށް ގާބިލް ބައެއް ކަމަށާއި އެހެންވެ, "ފެހި ތަނަވަސް މާލެ"އެއް ހޯދުމަށްޓަކައި މާލޭގެ ރައްޔިތުން އެ ތިން ކެންޑިޑޭޓުންނަށް ވޯޓު ދިނުމަށް އެދިވަޑައިގަންނަވާ ކަމަށެވެ.

"އަޅުގަނޑު އެދެނީ, އަޅުގަނޑުގެ އާދޭހަކީ މާދަމާ ހެނދުނު ހެނދުނާ ނިކުމެ އެމްޑީޕީގެ ކެންޑިޑޭޓުންނަށް, އާދެ ތިލަފަތަށް ވޯޓު ދެއްވާ." އާޒިމް ވިދާޅުވި އެވެ.

މައްޗަންގޯޅީ މެދު ދާއިރާއަށް އެމްޑީޕީގެ ޓިކެޓްގައި ވާދަ ކުރައްވަނީ ހައްވާ ޝިފާނާއެވެ. އަދި ހުޅުމާލޭ ދާއިރާއަށް ވާދަ ކުރައްވަނީ އަހުމަދު ރަޝީދު އެވެ. އަދި ހެންވޭރު ހުޅަނގު ދާއިރާއަށް ވާދަ ކުރައްވަނީ މުހައްމަދު އަލީ ޖިނާދެވެ.