ރާއްޖޭގެ ދެކުނުގެ އަތޮޅުތަކުން މިފްކޯއަށް ކަޅުބިލަމަސް ގަންނަމުންދިޔަ ހަތަރު ބޯޓެއް، ޅ. ފެލިވަރުން އޮޕަރޭޓް ކުރާ ބޯޓުތަކެއްގެ ގޮތުގައި މިފްކޯއިން ހަމަޖައްސައިފިއެވެ.

މިފްކޯއިން މިއަދު ބުނީ ރާއްޖޭގެ ފެލިވަރުން އޮޕަރޭޓް ކުރާ ބޯޓުތަކެއްގެ ގޮތުގައި ހަމަޖައްސާފައި ވަނީ އާރުއެސްޑަބްލިޔު 27.5 ޓަނު ޖާގައިގެ ބޯޓުފަހަރުގެ ތެރެއިން ރަންދި 23، 24، 25، 26، ކަމަށެވެ.

އެ ހަތަރު ބޯޓުވެސް ކުރިން އޮޕަރޭޓް ކުރަމުންދިޔައީ ކޫއްޑޫއިންނެވެ. އަދި ފެލިވަރުން އޮޕަރޭޓު ކުރަމުންދިޔަ ޖަޒީރާ-102 ދެން އޮޕަރޭޓް ކުރާނީ ކޫއްޑޫ ސައިޓުންނެވެ. އެ ބޯޓުން ދުވާލަކު 100 ޓަނަށްވުރެ ގިނަމަސް ފްޒީކުރެވޭކަން މިފްކޯއިން ފާހަގަކުރެއެވެ.

"ފެލިވަރަކީ ދަޅު ބަންދުކުރާ ފެކްޓްރީއަކަށް ވެފައި، އެތަނަށް ބޮޑަށް ބޭނުންވާ، އާރުއެސްޑަބްލިޔުގައި ބެހެއްޓިފައިހުންނަ ތާޒާމަސް ހޯދުމަކީ އަޅުގަނޑުމެންގެ ވަރަށް ބޮޑު މަގުސަދެއް. މި ހަތަރު ބޯޓް އުތުރަށް ބަދަލުކުރުމުން އިތުރު ބަނދަރުތަކެއްގައި މަސްގަންނަ ބޯޓު ބޭއްވޭނެ. މިކަމުގެ ސަބަބުން އުތުރުގައި ކަނޑުމަހުގެ މަސްވެރިކަން ކުރާ މަސްވެރީންނަށް މަސްކިރޭނެ ކަމުގެ ޔަގީންކަން އިތުރުވެގެންދާނެ." މިފްކޯގެ އޮޕަރޭޝަންސް ހިންގެވުމާ ހަވާލުވެ ހުންނެވި އެކުންފުނީގެ ޖެނެރަލް މެނޭޖަރު އަހުމަދު ޒާހިރު ވިދާޅުވިއެވެ.

ކަޅުބިލަމަސް ގަތުމަށް މިފްކޯއިން ބޭނުންކުރާ ޖަޒީރާ 106: ފެލިވަރުގައި އޮޕަރޭޓް ކުރަމުންދިޔަ ޖަޒީރާ 102 ދެން ބޭނުންކުރާނީ ގއ. ކޫއްޑޫގައި-- ފޮޓޯ/ މިފްކޯ

ޒާހިރު ވިދާޅުވީ، ދެކުނުގައި މަސްވެރިކަން ރަނގަޅު ދުވަސްވަރު ރަންދި ސީރީޒްގެ ކުޑަ ބޯޓަކަށް އެންމެ ދޯންޏެއްގެ މަސް ވެސް ނުކިރޭ ކަމަށާއި، އެހެން ނަމަބެސް ޖަޒީރާ-102 ދެކުނަށް ބަދަލުކުރުމުން އެ ސަރަހައްދުގައި ފްރީޒްކުރެވޭ މަސް އިތުރުވެގެންދާނެކަމުގައެވެ. އަދި އެކަމުގެ ސަބަބުން މަސްވެރި މޫސުމުގައި އޮޑިދޯނިފަހަރުތަކުން މަސްކިރުމަށް ހަދާ ކިއު ކުޑަވެގެންދާނެ ކަން އޭނާ ފާހަގަކުރެއްވިއެވެ.

ޒާހިރު ފާހަގަކުރެއްވި ގޮތުގައި މި ބަދަލާއެކު ޒުވާނުންނާއި، މަސްވެރިކަމުގެ ސިނާއަތާއި އަލަށް ގުޅެން ބޭނުންވާ އާންމު ފަރުދުންގެ މެދުގައި މަހަށް ފުރުމުގެ ޝައުގުވެރިކަން އިތުރުވެގެންދާނެއެވެ.

މިފްކޯގެ ފްލީޓާއި އެންމެ ފަހުން ގުޅުނު ޖަޒީރާ-106 އާއި ޖަޒީރާ-105 ވެސް މަސްގަތުމުގައި ހަރަކާތްތެރިވާ ކަމަށާއި، ދާދި އަވަހަށް ޖަޒީރާ-104 ވެސް އޮޕަރޭޝަނަށް ގެނެވޭނެ ކަމަށް އެކުންފުނިން ވަނީ ބުނެފައެވެ. އެގޮތުން ޖަޒީރާ-104 އޮތީ މިހާރު މާލޭގެ ބަނދަރުގައި ކަމަށާއި، އެބޯޓަށް މަސްގަތުމުގެ އެންމެ ފަހުގެ ތައްޔާރީތައް ވަމުން އަންނަކަމަށް މިފްކޯއިން ބުނެއެވެ. މިފްކޯއިން ދެކޭގޮތުގައި އެކުންފުނިން މަސްގަންނަ ފްލީޓަށް ކުރިއަށް އޮތް މަސްވެރިކަމުގެ މޫސުން ފެށޭއިރު، 150 ޓަން އިތުރަށް ފްރީޒް ކުރެވޭނެއެވެ.

ކަޅުބިލަމަސް ގަތުމަށް މިފްކޯއިން ބޭނުންކުރާ ޖަޒީރާ 102 ބޯޓު: މިވަގުތު އޮތީ މާލެ ބަނދަރުގައި-- ފޮޓޯ/ މިފްކޯ

މިފްކޯގެ ފްލީޓުގައި އެއް ކެރިއަރ ވެސަލް އެބައޮތެވެ. އަދި މަސްކިރުމުގެ އޮޕަރޭޝަންގައި މިވަގުތު 13 ބޯޓު ހަރަކާތްތެރިވާއިރު، އެ ބޯޓުފަހަރުތަކަށް ކިރާ މަސް ސައިޓަށް ގެންދިޔުމުގައި މައި އުޅަނދުގެ ގޮތުގައި ފަސް ބޯޓު އަންނަނީ ހަރަކާތްތެރިވަމުންނެވެ.