ސަރުކާރަށް ތާއީދު ނުކުރާ މުވައްޒަފުންނަށް ވަޒީފާގެ ބިރު ދެއްކުން ހުއްޓާލުމަށް އިދިކޮޅު އެމްޑީޕީން ގޮވާލައިފިއެވެ.

އެމްޑީޕީން މިއަދު ނެރެފައިވާ ނޫސް ބަޔާނެއްގައި ބުނީ އެޕާޓީގެ ފަރާތުން ދަނޑިކޮށި ހަރުގޭގައި މިދިޔަ ބުރާސްފަތި ދުވަހުގެ ރޭ ބޭއްވި ޖަލްސާގައި ގުރުއާން ކިޔެވުމާ ގުޅިގެން އެޗުޑީސީގެ ވަޒީފާ އަދާ ކުރަމުން ދިޔަ މުވައްޒަފަކު ވަކިކުރުން ހަރު އަޑުން ކުށްވެރި ކުރާ ކަމަށެވެ.

ސިޔާސީ ޕާޓީއެއްގައި ހަރަކާތްތެރިވުމާއި ސިޔާސީ ހަރަކާތްތަކުގައި ބައިވެރިވެ އުޅުމަކީ ގާނޫނުއަސާސީން ކަށަވަރުކޮށްދީފައިވާ އަސާސީ ހައްގެއް ކަމަށާއި އަދި އެ އަސާސީ ހައްގުގެ ބޭނުން ހިފުމަށް އެއްވެސް ޒާތެއްގެ ބިރުވެރިކަމެއް، ބިރުދެއްކުމެއް އަދި އެއްވެސް ފިޔަވަޅެއްވެސް އެޅުމަކީ ގާނޫނުއަސާސީއާ ކަނޑައެޅިގެން ހިލާފު ކަމެއް ކަމަށް ބަޔާނުގައި ބުނެފައިވެއެވެ.

"ސަރުކާރުގެ އެއްވެސް ވަޒީފާއެއް އަދާކުރާ އެއްވެސް މުވައްޒަފަކު ވަކި ސިޔާސީ ޕާޓީއަކަށް ނިސްބަތް ވާތީ ނުވަތަ ތާއީދު ކުރާތީ ނުވަތަ ހަރަކާތެއްގައި ބައިވެރި ވާތީ ވަޒީފާގެ ބިރުވެރިކަން ނޯންނާނެ ކަމަށް ރައީސް ޑރ. މުއިއްޒު ރިޔާސީ ކެމްޕެއިންގައި ވަނީ ވައުދެވެވަޑައިގެންފައެވެ. އެހެންނަމަވެސް ވެވަޑައިގެންނެވި ވައުދާ ހިލާފަށް ސަރުކާރުގެ މުވައްޒަފުންނަށް ވަޒީފާގެ ބިރުދެއްކުމާއި ސަރުކާރަށް ތާއީދުނުކުރާ މުވައްޒަފުން ވަޒީފާތަކުން ވަކިކުރަމުންދާކަން މި ޕާޓީން ފާހަގަކުރަމެވެ" އެމްޑީޕީން ބުންޏެވެ.

އެމްޑީޕީން މިފަދައިން ބުނި ނަމަވެސް އެޗްޑީސީން މިއަދު ބުނީ އެޗްޑީސީގެ މުވައްޒަފަކު ވަޒީފާ އިން ވަކިކުރީ އެ ޖަލްސާގައި ބައިވެރިވުމުގެ ސަބަބުން ނޫން ކަމަށެވެ. އެ ފިޔަވަޅު އޭނާ އަށް އެޅީ ޖެހިޖެހިގެން ތިން ދުވަހު ވަޒީފާ އަށް ނުކުމެފައި ނުވާތީ ކަމަށް އެޗްޑީސީން ބުންޏެވެ.