މިދިޔަ އަހަރު ބޭއްވި ރިޔާސީ އިންތިހާބުގައި އެމްޑީޕީ އަށް ދެވަނަ ދައުރެއް ދޭން ދިވެހި ރައްޔިތުން ބޭނުން ނުވީ ގައުމު ހިންގަން އެމްޑީޕީ އަށް ނޭނގުމުން ކަމަށް ރައްޔިތުން މަޖިލީހުގެ ރައީސް އަބްދުއްރަހީމް (އަދުރޭ) ވިދާޅުވެއްޖެއެވެ.

ކައުންސިލްތަކުގެ ސައިޒު ކުޑަކުރަންޖެހޭ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެފައި ވާތީ އެމްޑީޕީގެ ރައީސް ޝާހިދު ވަނީ އެކަމަށް ފާޑު ވިދާޅުވެފައެވެ. ޝާހިދު ރޭ އެކްސްގައި ކުރެއްވި ޕޯސްޓެއްގައި ވިދާޅުވީ ރަށްރަށުގެ ޢާންމުހާލަތު ސާފުނުވާ ބަޔަކު މާލޭގެ ފިނިކޮޓަރީގައި ތިބެގެން ރަށްރަށުގެ ކަންހިންގުމުގެ ބާރު އެ ފިނިކޮޓަރިއަށް ޖަމާކުރުމަށް އެއް ބަހެއް ނުވެވޭނެ ކަމަށެވެ.

‏ދައުލަތުގެ ކަންކަން ހިންގަން ނޭނގިގެން ޤައުމު ބަނގުރޫޓުގެ މަގަށް ފުރޮޅެން ފެށީމައި ލާމަރުކަޒީ ނިޒާމު ނެތިކޮށްލުމަކީ ގޮތެއް ނޫން ކަމަށް ޝާހިދު ވިދާޅުވިއެވެ.

ޝާހިދަށް ރައްދު ދެއްވާ އަދުރޭ ވިދާޅުވީ ގައުމު ހިންގަން ނޭނގި ފިނި ކޮޓަރީގައި ތިބެ ގައުމު ބަނގުރޫޓްކޮށްލީ ކޮންބައެއްކަން ރައްޔިތުންނަށް އެނގޭ ކަމަށެވެ. ރައްޔިތުން އެމްޑީޕީގެ ވެރިކަން ނިމުމަކަށް ގެނައީ އެ ސަބަބާއި ހެދި ކަމަށްވެސް އަދުރޭ ވިދާޅުވިއެވެ.

"ރައީސް ޑރ. މުއިއްޒުގެ ސަރުކާރަކީ ރައްޔިތުންގެ އިހުސާސްތައް ދަނެގެން ހިންގާ ރައްޔިތުންގެ ސަރުކާރެއް. ލާމަރުކަޒީ ނިޒާމުގެ ފޮނި މީރުކަން ރައްޔިތުންނަށް ހޯދައި ދޭނީ ރައީސް ޑރ. މުއިއްޒުގެ ސަރުކާރުން،" އަދުރޭ ވިދާޅުވިއެވެ.

"ޕީއެންސީ ހައުސް"ގައި ވާހަކަ ދައްކަވަމުން ރައީސް ރޭ ވިދާޅުވީ ކުދި އާބާދީތަކަށް ރައީސަކާއި ނައިބު ރައީސެއް އިންތިހާބުކުރުމުން ފުދޭނެ ކަމަށެވެ. އަދި އާބާދީ ބޮޑެތި ރަށްތަކާއި ސިޓީތަކުގެ ކައުންސިލަރުންގެ އަދަދު ވެސް މަދުކުރަންޖެހޭ ކަމަށް ވެސް ރައީސް ވިދާޅުވިއެވެ.

"ރަށެއްގެ 300 މީހުން 500 މީހުން، 1000 މީހުންގެ ރަށެއްގައި ފަސް މީހުން ހަތް މީހުން ހޮވުމަކީ ވަރަށް ހަރަދު ބޮޑު ކަމެއް. އަޅުގަނޑު ހިތުން ކައުންސިލް ރައީސްގެ ގޮތުގައި، އެ މަގާމަށް ހޮވާ މީހާއަށް ކުރީ ޒަމާނުގައި ކިޔާ ގޮތަށް ކަތީބު ކިޔާކަމުގައިވިޔަސް، ރައްޔިތުންގެ ފަރާތުން ހުންނަ ވެރިިއެއްގެ ގޮތުގައި ކައުންސިލް ރައީސަކާއި ނައިބު ރައީސެއް ހޮވީމަ އާބާދީގެ ގޮތުން ކުދި ރަށްތަކަށް ފުދޭނެ،" ރައީސް ވިދާޅުވިއެވެ.