ލާމަރުކަޒީ ނިޒާމު ނެތިކޮށްލަން އުޅޭ ކަމަށް ބުނެ، އިދިކޮޅު އެމްޑީޕީގެ ރައީސް ޝާހިދު ސަރުކާރަށް ފާޑުވިދާޅުވެއްޖެއެވެ.

ކައުންސިލްތަކުގެ ސައިޒު ކުޑަކުރަންޖެހޭ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެފައިވަނިކޮށް، ޝާހިދު މިރޭ ކުރެއްވި ޓްވީޓެއްގައި ވިދާޅުވީ ރަށްރަށުގެ ޢާންމުހާލަތު ސާފުނުވާ ބަޔަކު މާލޭގެ ފިނިކޮޓަރީގައި ތިބެގެން ރަށްރަށުގެ ކަންހިންގުމުގެ ބާރު އެ ފިނިކޮޓަރިއަށް ޖަމާކުރުމަށް އެއް ބަހެއް ނުވެވޭނެ ކަމަށެވެ.

‏ދައުލަތުގެ ކަންކަން ހިންގަން ނޭނގިގެން ޤައުމު ބަނގުރޫޓުގެ މަގަށް ފުރޮޅެން ފެށީމައި ލާމަރުކަޒީ ނިޒާމު ނެތިކޮށްލުމަކީ ގޮތެއް ނޫން ކަމަށް ޝާހިދު ވިދާޅުވިއެވެ.

"ޕީއެންސީ ހައުސް"ގައި ވާހަކަ ދައްކަވަމުން ރައީސް މިރޭ ވިދާޅުވީ ކުދި އާބާދީތަކަށް ރައީސަކާއި ނައިބު ރައީސެއް އިންތިހާބުކުރުމުން ފުދޭނެ ކަމަށެވެ. އަދި އާބާދީ ބޮޑެތި ރަށްތަކާއި ސިޓީތަކުގެ ކައުންސިލަރުންގެ އަދަދު ވެސް މަދުކުރަންޖެހޭ ކަމަށް ވެސް ރައީސް ވިދާޅުވިއެވެ.

"ރަށެއްގެ 300 މީހުން 500 މީހުން، 1000 މީހުންގެ ރަށެއްގައި ފަސް މީހުން ހަތް މީހުން ހޮވުމަކީ ވަރަށް ހަރަދު ބޮޑު ކަމެއް. އަޅުގަނޑު ހިތުން ކައުންސިލް ރައީސްގެ ގޮތުގައި، އެ މަގާމަށް ހޮވާ މީހާއަށް ކުރީ ޒަމާނުގައި ކިޔާ ގޮތަށް ކަތީބު ކިޔާކަމުގައިވިޔަސް، ރައްޔިތުންގެ ފަރާތުން ހުންނަ ވެރިިއެއްގެ ގޮތުގައި ކައުންސިލް ރައީސަކާއި ނައިބު ރައީސެއް ހޮވީމަ އާބާދީގެ ގޮތުން ކުދި ރަށްތަކަށް ފުދޭނެ،" ރައީސް ވިދާޅުވިއެވެ.