މާލޭގައި ވައްކަން ކުރަން އުޅޭ 46 މީހަކު ފާހަގަކުރެވިފައިވާ ކަމަށް ހޯމް ލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވެއްޖެއެވެ.

މަޖިލީހުގެ ސަލާމަތީ ހިދުމަތްތަކާ ބެހޭ ކޮމެޓީގައި މިއަދު މާފަންނު އުތުރު ދާއިރާގެ މެމްބަރު މުހައްމަދު ނާޒިމް ކުރެއްވި ސުވާލަކަށް ޖަވާބު ދެއްވަމުން އިހުސާން ވިދާޅުވީ ފާއިތުވި ހަމަސް ދުވަހުގެ ތެރޭގައި 4،000 ފަހަރު ފުލުހުން އެ 46 ވަގުންނަށް އިންޓަރެކްޓުވެފައިވާ ކަމަށެވެ.

ބައެއް ފަހަރު އެމީހުން ހައްޔަރަށް ގެންދާ ކަމަށާއި އަނެއް ފަހަރުތަކުގައި އެމީހުންނަށް ނަސޭހަތް ދިނުމަށްފަހު ދޫކޮށްލާ ކަމަށް އިހުސާން ވިދާޅުވިއެވެ.

އެމީހުން ހައްޔަރު ކޮށްގެން ޔޫރިން ޕޮޒިޓިވްވުމުން އެއް ކޯޓަށް ގެންދިއުމުން އެއީ ޑުރަގު މައްސަލައެއް ނޫން ކަމަށާއި އެއީ ކްރިމިނަލް [ޖިނާއީ] މައްސަލައެއް ކަމަށް އެ ކޯޓުން ބުނާ ކަމަށް އިހުސާން ވިދާޅުވިއެވެ. އިހުސާން ވިދާޅުވީ ގާނޫނުގައި ކަންކަން ސާފުކޮށް ބަޔާން ކޮށްދީފައި އޮންނަން ޖެހޭ ކަމަށެވެ.

"ކްރިމިނަލް ކޯޓަށް ގެންދިޔައީމަ ބުނެފާނެ މިއީ ޑުރަގު މައްސަލައެކޭ،" އިހުސާން ވިދާޅުވިއެވެ.

ބައެއް ހާލަތްތަކުގައި މީހުން ދޫވެގެން ދަނީ ކޯޓުތަކުގައި އެ އިހުތިސޯސް ނެތުމުން ކަމަށް އިހުސާން ވިދާޅުވިއެވެ. ފުލުހުންނަށް އެފަދަ މީހުން ބެހެއްޓެން އަންނަނީ އެންމެ ގިނަވެގެން 24 ގަޑިއިރަށް ކަމަށް ވެސް ވިދާޅުވިއެވެ.

"މި ޗެލެންޖާ ހެދި މި ދެންނެވި މީހުން މިއޮއްހާ ދުވަހު ހަމަ 4،000 ފަހަރު އިންޓަރެކްޝަނަށް ފަހު އަދިވެސް އެ 46 މީހުން ތިބީ ދޫވެފައި. އޭގެތެރެއިން އެންމެ އަޅުގަނޑުމެންނަށް ކްރިޓަކަލް ކަމަށް ފާހަގަކުރެވުނު 21 މީހަކަށް ޓާގެޓު ކޮށްގެން މިދިޔަ ހަފްތާއިން ފެށިގެން އޮޕަރޭޝަނެއް ހިންގާ އޭގެތެރެއިން 10 މީހުން މިހާރު ވަނީ ނޭޝަނަލް ޑްރަގު އެޖެންސީގެ ފަރުވާ އަށް ނެގިފައި،" މިނިސްޓަރު ވިދާޅުވިއެވެ.

އިހުސާން ވިދާޅުވީ އެ 21 މީހުންގެ ތެރެއިން ހަތް މީހަކު ހޯދުމުގެ މަސައްކަތް ކުރަމުން އަންނަ ކަމަށާއި ބާކީ ތިބި ހަތަރު މީހުން ފުލުހުންގެ ބަންދުގައި އެބަ ތިބި ކަމަށެވެ.