ހުޅުމާލެ ހިޔާ ފްލެޓަކަށް މީހުން ގެންގޮސް، ބަރަހަނާކޮށް، ބްރެކްމެއިލްކޮށް ފައިސާ އާއި އަގުބޮޑެތި މުދާ އަތުލިކަމަށް ބުނެ، ފުލުހުންނަށް ރިޕޯޓް ކުރި މީހުން އެ ފްލެޓަށް ދިޔައީ އަމިއްލަ އިހްތިޔާރުގައި ކަމަށް ފުލުހުން ބުނެފިއެވެ.

އިސްކަންދަރު ބިލްޑިންގައި ފުލުހުން މިއަދު ބޭއްވި ޕްރެސް ކޮންފަރެންސްގައި ބުނީ ހިޔާ ފްލެޓް "އެޗް5"ގެ އެޕާޓްމަންޓަކަށް މީހުން ގެންގޮސް، ޖިނާއީ އަމަލު ހިންގާފައި ވަނީ ފައިސާއަށް ހަށިވިއްކާކަން އިސްތިހާރުކޮށްގެން ކަމަށެވެ.

ހަށި ވިއްކުމުގެ އަމަލުގައި އިސްކޮށް އުޅުނު ދެ އަންހެނުން ދޮށީ އުމުރުގެ ފިރިހެނުންނާ ގުޅުންބަދަހިކޮށް، ހަށިވިއްކާނެ ކަމަށް ބުނެ، އެޕާޓްމަންޓަށް ގެންގޮސްފައިވާ ކަމަށް ފުލުހުން ބުންޏެވެ.

ފުލުހުން ބުނީ އެ ފްލެޓް ތެރޭގައި ގަދަކަމުން މީހުން ބަރަހަނާކޮށް ވީޑިއޯ ނަގައި ބްލެކްމެއިލް ކުރި މައްސަލާގެ ތުހުމަތުގައި ހަތް މީހަކު ހައްޔަރުކުރި ކަމަށެވެ. އެ ކަމުގައި އިސްކޮށް އުޅުނު ދެ އަންހެނުން ހިމެނޭ ގޮތަށް ފަސް ފިރިހެނެއްގެ ވަނަވަރު ފުލުހުން މިއަދު ވަނީ އާންމުކޮށްފައެވެ.

މައްސަލައިގެ ތުހުމަތުގައި ހައްޔަރުކުރި މީހުން

  1. މ، ގޯބިލިގަސްދޮށުގެ، އައިމިނަތު ހުމައިނާ ޒަކަރިއްޔާ، 24،
  2. މާލެ ދަފްތަރު، އާޔަތު އައްބާސް، 30
  3. ގއ. ދާންދޫ، ޕެލަސް ހައުސް، މުހައްމަދު އައްބާސް، 43
  4. ގ. ހަނދުމާގެ އާގެ، 31ސަމާހު އަލީ،
  5. ދ. ކުޑަހުވަދޫ، ސަންފުލާވާ، މުހައްމަދު މުނީރު، 35
  6. ނ ވެލިދޫ، އަހުމަދު މާޖިދު، 33
  7. މއ. ސީނަރީވިއު، އަހުމަދު މަދީހު، 34

ފުލުހުން ބުނީ ހަށިވިއްކި ފްލެޓަށް ދިޔަ މީހުން އެތަނަށް ދިޔައީ ބިރު ދައްކައިގެންނާއި ގަދަކަމުން ކަމަށް ތަހުގީގަށް ބަޔާން ދީފައިވާ ކަމަށާއި ނަމަވެސް ފުލުހުން ބެލި ސީސީޓީވީ ފޫޓޭޖުތަކުން ފެންނަ ގޮތުން އެތަނަށް މީހުން ދިޔައީ އަމިއްލަ އިހްތިޔާރުގައި ކަމަށެވެ

"އެ ފަރާތްތައް އެތަނަށް ދިޔައީ އަމިއްލައަށް ނޫން ކަމަށާއި އެ މީހުން އެތަނަށް ދިޔައީ ބިރުދައްކައިގެންނާއި ގަދަކަމުން ކަމަށް ފުލުހުންގެ ތަހުގީގަށް ބަޔާން ދީފައިވޭ. އެހެންނަމަވެސް އަޅުގަނޑުމެންނަށް ފާހަގަކުރެވޭ ގޮތުގައި ސީސީޓީވީ ފޫޓޭޖުތައް ބެލިއިރު އެ މީހުން އެ އެޕާޓްމަންޓަށް ގޮސްފައި ވަނީ އެ މީހުންގެ އަމިއްލަ އިހްތިޔާތުގައިކަން އަޅުގަނޑުމެންނަށް ފާހަގަކުރެވޭ،"

ފުލުހުން ބުނީ އަމިއްލަ އިހްތިޔާރުގައި އެތަނަށް ދިޔަކަން ފުލުހުންގެ ތަހުގީގަށް އެނގުނު ހިސާބުން، އެ މައްސަލަތައް ތަހުގީގު ކުރަން ބޭނުން ނުވާ ކަމަށް މައްސަލަ ހުށަހެޅި ވަރަށް ގިނަ ފަރާތްތަކުން ބުނެފައިވާ ކަަމށެވެ.

ފުލުހުން ބުނީ އެ މައްސަލަތައް ފުލުހުންނަށް ރިޕޯޓްކުރަން ބައެއް މީހުން ފަސްޖެހިފައި ވަނީ އެ މީހުންގެ ބަރަހަނާ ވީޑިއޯތައް ނަގައި ބްލެކްމެއިލްކޮށްފައިވާތީ ކަމަށާއި އެކަން ހިންގި މީހުންނަކީ ވައްކަމާޢި މާރާމާރީ ހިންގި ބަޔަކަށްވުމުން، އެ މީހުންގެ ފަރާތުން ނުރައްކަލެއް ކުރިމަތިވެދާނެތީ ކަމަށެވެ.

"އެ މީހުން އެ އެޕާޓްމަންޓަށް ގޮސްފައި ވަނީ ގާނޫނާ ހިލާފު ކުށްތައް އަރައިގަތުމުގެ ނިޔަތުގައި ކަމަށްވުމުންނާއި އެ މީހުންގެ ބަރަހަނާ ވީޑިއޯ ލީކުކޮށްލާފާނެކަމުގެ ބިރު އޮތުމުންނާއި އަދި މީގެ އިތުރުން މި މައްސަލާގައި ހިމެނޭ މީހުންނަކީ ވައްކަމާއި މާރާމާރީ އާއި ފޭރުމާއި މަސްތުވާތަކެތީގެ ޝާމިލުވާ ފަރާތްތަކެއް ކަމުގައިވާތީ، އެފަރާތްތަކުގެ ކިބައި ނުރައްކަލެއް ކުރިމަތިވެދާނެކަމުގެ ބިރަށްޓަކާ ވެސް އެ މައްސަލަތައް ފުލުހުންނާ ހިސާބަށް ރިޕޯޓްކޮށްފައި ނުވާ ވަރަށް ގިނަ ހާދިސާތަކެއް ހުރިކަން ވެސް ފާހަގަކުރަން،" ފުލުހުން ބުންޏެވެ.

ފުލުހުން ބުނީ ހިޔާ ފްލެޓުގެ "އެޗް5" އެޕާޓްމަންޓުގައި ގަދަކަމުން ފައިސާ ހޯދައި އެތަނުގެ ތެރޭގައި މަސްތުވާތަކެތި ވިއްކާ ވިޔަފާރިކޮށް، އެތަކެތި ބޭނުންކުރުންފަދަ ޖިނާއީ އެތައް ކުށެއް ހިންގާފައިވާ ކަމަށެވެ.

ހަށިވިއްކި ފްލެޓުގައި ޖިނާއީ އަމަލު ހިންގުމުގައި އިސްކޮށް އުޅުނު އެއް އަންހެނަކު ބަލިވެއިނުމުން، އޭނާ ވަނީ ބަންދުން ދޫކޮށްލާފައެވެ.