މަސްވެރިންނަށް މިހާތަނަށް ނުދީ ހުރި ފައިސާގެ ތެރެއިން އެއްބައި މި ހަފްތާ ނިމުމުގެ ކުރިން ޖަމާކުރާނެ ކަމަށް މިފްކޯ އިން ބުނެފިއެވެ.

ފާއިތުވެދިޔަ ދޮޅުމަސް ތެރޭގައި މަސްވެރިންނަށް ނުދީ 80 މިލިއަން ރުފިޔާ އެބައޮތެވެ. މިފްކޯ އިން ބުނީ އެފައިސާގެ ތެރެއިން މި ހަފްތާ ނިމުމުގެ ކުރިން 46 މިލިއަން ރުފިޔާ ޖަމާ ކުރާނެ ކަމަށެވެ. އަދި އަންނަ ހަފްތާ އިން ފެށިގެން މަސްވެރިންނަށް ނުދީވާ ބާކީ ފައިސާ ވެސް ޖަމާ ކުރަމުން ގެންދާނެ ކަމަށެވެ.

އިއްޔެ ބޮޑު ކަންނެލީގެ މަސްވެރިން ވަނީ އެމީހުންގެ ހުރި ކަންބޮޑުވުންތަކާއި ގުޅިގެން މުޒާހަރާ ކޮށްފައެވެ. އެއް ނަންބަރު ފާލަން ކުރިމަތީ ފަޅުތެރޭގައި ކަންނެލި ދޯނިތައް އަޅައި، މަސްވެރިން ޑިމާންޑުކުރަމުން ދިޔައީ ލޭނު މަސްވެރިކަމަށް ހުއްދަ ނުދިނުމަށާއި ސަރުކާރުން ވައުދުވެފައިވާ ގޮތަށް މިފްކޯއިން ބޮޑު ކަންނެލި ގަތުމަށާއި މާލެއިން ތެޔޮ ލިބޭ އަގުގައި ކަންނެލި މަސްވެރިންނަށް ތެޔޮ ފޯރުކޮށްދިނުމަށެވެ.

ނަމަވެސް ސަރުކާރުން އެ މަސްވެރިންގެ ކަންބޮޑުވުންތަކަށް އިޖާބަ ދިނުމުން ރޭގެ ވަގުތެއްގައި މަސްވެރިން ވަނީ މުޒާހަރާ ނިންމާލައިފައެވެ.

ފިޝަރީޒް އެންޑް އޯޝަން ރިސޯސް މިނިސްޓްރީން ރޭ "އެކްސް"ގައި ކުރި ޕޯސްޓެއްގައި ބުނީ ރައީސް ޑރ. މުހައްމަދު މުއިއްޒުގެ މެނިފެސްޓޯގައި ވައުދުވެފައިވާ ގޮތަށް ހުޅުމާލެއިން މަސްވެރިންނަށް ވިއްކާ ޑީސަލްގެ އަގު، ޝެޑުތަކުން ވިއްކާ އަގަށް ހެޔޮކޮށްފައިވާ ކަމަށެވެ.

އެ ޕޯސްޓާ ގުޅިގެން ބޮޑު ކަންނެލީގެ މަސްވެރިންގެ ޔޫނިއަން (ބީޔޭޔޫ)އިން "އެކްސް"ގައި ބުނެފައި ވަނީ ލޭނު މަސްވެރިކަމަށް ރާއްޖޭގައި ހުއްދަ ނުދޭން ސަރުކާރުން ނިންމައި، ޑީސަލް ގަންނަން ލިބޭ އަގު މަސްވެރިންނަށް ހެޔޮކޮށްފައިވާތީ، އިހްތިޖާޖް ނިންމާލާފައިވާ ކަމަށެވެ.

މަސްވެރިންނަށް މިހާތަނަށް ނުދީ ހުރި ފައިސާގެ ތެރެއިން އެއްބައި މި ހަފްތާ ނިމުމުގެ ކުރިން ޖަމާކުރާނެ ކަމަށް މިފްކޯ އިން ބުނެފައިވާއިރު މަސްވެރިން ކިރާ މަހަށް އެންމެ ގިނަ ވެގެން 48 ގަޑިއިރު ތެރޭގައި ފައިސާ ޖަމާ ކުރާނެ ކަމަށް ރައީސް ޑރ. މުހައްމަދު މުއިއްޒު ވަނީ ވައުދުވެވަޑައިގެންފައެވެ.