ވޭތުވެދިޔަ ތިން އަހަރުގައި ވެސް ރޯޑް ޑިވެލޮޕްމަންޓް ކޯޕަރޭޝަން ލިމިޓެޑް (އާރްޑީސީ) އޮޑިޓް ނުކުރާތީ، ކުންފުނި އޮތް ހާލަތެއް އެންމެ ރަނގަޅަށް އެނގިވަޑައިނުގަންނަވާ ކަމަށް އެ ކުންފުނީގެ މެނޭޖިންގ ޑިރެކްޓަރު، ބްރިގޭޑިއާ ޖެނަރަލް ރިޓަޔާޑް އަލީ ޒުހައިރު ވިދާޅުވެއްޖެއެވެ.

އާރްޑީސީން ހިންގި ކަމަށް ބުނާ ކޮރަޕްޝަންތަކާ ގުޅިގެން، ކުންފުނީގެ މާލީ ލިޔެކިޔުންތައް ތަހުގީގީ އިދާރާތަކުން ގެންގޮސްފައިވާ ކަމަށް ފާހަގަކޮށް، ޕީއެސްއެމްގެ "ރާއްޖެ މިއަދު"ގައި ވާހަކަ ދައްކަވަމުން ޒުހައިރު ރޭ ވިދާޅުވީ ތަހުގީގީ އިދާރާތަކުން ލިޔެކިޔުން ހޯދައިގެން، އޮޑިޓާ ޖެނަރަލްގެ އޮފީހުގެ އެހީތެރިކަމާ އެކު އާރްޑީސީ އޮޑިޓްކުރުމުގެ މަސައްކަތް ކުރިއަށްދާ ކަމަށެވެ. އަދި ވިދާޅުވީ 2021، 2022 އަދި 2023 ވަނަ އަހަރު އާރްޑީސީ އޮޑިޓް ކުރެވިފައި ނުވާ ކަމަށާއި ކުންފުނި އުފެއްދި ފަހުން އޮޑިޓްކޮށްފައި ވަނީ 2020 ވަނަ އަހަރު އެކަނި ކަމަށެވެ.

"އަދިއެއް ކުންފުނި އޮތް ހާލަތު އެންމެ ރަނގަޅަކަށް ނޭނގޭ އަސްލު. އެއީ 2021ގައި [އޮޑިޓް] ނުކުރެވި، 2022 [އޮޑިޓް] ނުކުރެވި އޮތީ. އަދި 2023 ގައި ވެސް އެހެން [އޮޑިޓް] ފާމަށް ދީގެން [އޮޑިޓް] ކުރަމުން މި ދަނީ،" ކޯސްޓުގާޑުގެ ކުރީގެ ކޮމާންޑަރުކަން ކުރެއްވި ޒުހައިރު ވިދާޅުވިއެވެ.

އާރްޑީސީއާ ހަވާލުވެވަޑައިގެންނެވިއިރު، ކުންފުނި އޮތީ ވަރަށް ދަށުގައި، ދަރަނި ބޮޑު ކުންފުންޏެއްގެ ގޮތުގައިކަން ފާހަގަ ކުރައްވައި ޒުހައިރު ވިދާޅުވީ ސަރުކާރުން ގެންގުޅޭ ރިފޯމް އެޖެންޑާގެ ދަށުން ކުންފުނި ރިފޯމް ކުރުމަށް އާރްޑީސީގެ ބޯޑުން ފާސްކޮށްފައިވާ ކަމަށެވެ.

ރައްޔިތުން އިތުބާރު ކުރާ ކުންފުންޏަކަށް، އާރްޑީސީ ހަދަންޖެހޭ ކަމަށާއި ރައްޔިތުން ޓެކްސް ފައިސާއިން ހަރަދުކޮށްގެން ހިންގާ ކުންފުންޏަކަށްވާތީ، ކުންފުނީގެ ގެއްލުން ކުޑަކުރަންޖެހޭ ކަމަށް ވެސް އޭނާ ވިދާޅުވިއެވެ.

އާރްޑީސީ އެންމެ ބޮޑު ރައުސްމާލަކީ ކުންފުނީގެ މުވައްޒަފުން ކަމަށް ފާހަގަ ކުރައްވައި ޒުހައިރު ވިދާޅުވީ ކުންފުނީގައި މުވައްޒަފުން ތިބީ ކުންފުންޏަށް އެންމެ ބޭނުންވާ ވަރަށް ތޯ ބަލަންޖެހޭ ކަމަށާއި އެ މުވައްޒަފުންގެ ގާބިލުކަން ވެސް ވަޒަން ކުރަންޖެހޭ ކަމަށެވެ.

"މުވައްޒަފުންނަކީ އެންމެ ގާބިލު އެންމެ ހުނަރުވެރި މުވައްޒަފުންތޯ ވެސް އަޅުގަނޑުމެން ބަލަން އެބަޖެހޭ. އެ ގާބިލު ކަމަށާއި އެ މުވައްޒަފުން އޭގެ ޒާތުގައި ބޭނުންވާ ވަރަށްތޯ އަޅުގަނޑުމެން އެންމެ މުހިއްމު ކަމެއް ދީގެން މަސައްކަތް ކުރާނެ ދާއިރާ. މުވައްޒަފުންނަށް ބޭނުންވާ ވަސީލަތްތައް ހޯދައިދިނުމާއި މުވައްޒަފުންގެ ކަންކަން އެއް ހަމައަކަށް އެޅުވުން،" ޒުހައިރު ވިދާޅުވިއެވެ.

އާންމުދަނީއާ އެއްވަރަށް ހަރަދު ކުރާ ކުންފުންޏަކަށް އާރްޑީސީ ހަދަންޖެހޭ ކަމަށާއި ކަނޑައެޅޭ ތާވަލަށް ނިންމަންޖެހޭ ކަންކަން ނިންމަންޖެހޭ ކަމަށް ވެސް ޒުހައިރު ވިދާޅުވިއެވެ. އޭނާ ވިދާޅުވީ ދެ އަހަރުން ނިންމަންޖެހޭ ޕްރޮޖެކްޓުތައް ފަސް އަހަރުވެގެންދާއިރު ވެސް ނުނިމި އެބަހުރި ކަމަށެވެ.

އާރްޑީސީގެ އެމްޑީގެ މަގާމަށް ޒުހައިރު އައްޔަން ކުރީ މިދިޔަ އަހަރުގެ ނޮވެމްބަރު މަހުގައެވެ. ޒުހައިރު ވަނީ ސިފައިންގެ ވެލްފެއާ ކުންފުނީގެ ޗެއާމަންކަމާއި ސިފައިންގެ އިލެކްޓްރިކަލް އަދި މެކޭނިކަލް އިންޖިނިއަރިންގެ ކޮމާންޑަރުކަމުގެ އިތުރުން މެރިން ކޮޕްސްގެ ކޮމާންޑަރުކަން ކުރައްވާފައެވެ.