ފަލަސްތީނުގެ ބިމަށް ވެރިވެގަނެ، އެ ގައުމުގެ މީހުން މަރައި، ގަތުލްއާންމު ހިންގަމުންދާ އަނިޔާވެރި ޔަހޫދީ ދައުލަތް، އިޒުރޭލުގެ ރައްޔިތުންނަށް ރާއްޖެ ނާދެވޭ ގޮތަށް ގާނޫނު ބަދަލުކުރަން ނިންމާފައިވާ ކަމަށް ސަރުކާރުން ބުނި ހަބަރު ދުނިޔޭގެ ސަމާލުކަމަށް އަތުވެއްޖެއެވެ.

ރައީސް އޮފީހުން މިއަދު ބޭއްވި ޕްރެސް ކޮންފަރެންސެއްގައި ހޯމް ލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވީ އިޒުރޭލު ޕާސްޕޯޓް މަނާކުރުމަށް ވަރަށް އަވަހަށް ގާނޫނަށް އިސްލާހު ހުށަހަޅުއްވާނެ ކަމަށެވެ.

އިޒުރޭލު ޕާސްޕޯޓް ރާއްޖޭގައި މަނާކުރުމާ ގުޅޭ މަސައްކަތް ކުރުމަށް ކެބިނެޓުން މިއަދު ވަނީ ކޮމެޓީއެއް އެކުލަވާލާފައެވެ. އެ ކޮމެޓީގައި ހިމެނިވަޑައިގަންނަވަނީ މިނިސްޓަރު އިހުސާންގެ އިތުރުން ފޮރިން މިނިސްޓަރު މޫސާ ޒަމީރާއި އެޓަރނީ ޖެނަރަލް އުޝާމާއި އިކޮނަމިކް މިނިސްޓަރު މުހައްމަދު ސައީދާއި ޓޫރިޒަމް މިނިސްޓަރު ފައިސަލްގެ އިތުރުން އިސްލާމިކް އެފެއާޒް މިނިސްޓަރު ޑރ. މުހައްމަދު ޝަހީމް އަލީ ސައީދެވެ.

ފަލަސްތީނާއި އިސްރާއީލްގެ މައްސަލައިގައި ރާއްޖޭގެ ފަރާތުން ފަލަސްޠީނުގެ ފަރާތުން އެދޭކަންކަން ދެނެގަތުމަށް ރައީސް ސްޕެޝިއަލް އެންވޯއިއެއް ކަނޑައަޅުއްވަން ވެސް ކެބިނެޓުން މިއަދު ނިންމާފައިވެއެވެ.

މި ހަބަރު ދުނިޔޭގެ މީޑިއާތަކުގެ ސަމާލު ކަމަށް ވަނީ އައިސްފައެވެ. އެގޮތުން އިންޑިއާ ޓުޑޭ އާއި އެސޯސިއޭޓު ޕްރެސް (އޭޕީ) ގެ އިތުރުން އިޒްރޭލު ނޫހެއް ކަމަށްވާ "ޓައިމްސް އިފް އިސްރާއީލް"ގައި ވެސް އެ ހަބަރު ވަނީ ގެނެސް ދީފައެވެ.

މީގެއިތުރުން "އަލްޖަޒީރާ ޑޮޓް ނެޓް"ގައި ވެސް އަރަބި ބަހުން އެ ހަބަރު ގެނެސް ދީފައިވެއެވެ.

މިއަދުގެ ކެބިނެޓު ބައްދަލުވުމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިސް ނެންގެވުމުގެ މަތިން ޔޫ.އެން ރިލީފް އެންޑް ވޯރކްސް އެޖެންސީ މެދުވެރިކޮށް ފަލަޞްޠީނުގެ ޙާލުގައި ޖެހިފައިވާ އަޚުންނާއި އުޚްތުންނަށް އެހީތެރިކަން ފޯރުކޮށްދިނުމަށްޓަކައި ރާއްޖޭގައި ފަންޑްރައިޒް ކުރުމަށް ހަރަކާތްތަކެއް ހިންގުމަށް ސަރުކާރުން ނިންމެވިއެވެ.

"ފަލަސްތީނާއިއެކު ދިވެހިން" މި ނަމުގައި މުޅި ރާއްޖޭގައި ހިނގާލުމެއް ބޭއްވުމަށާއި ދިވެހިރާއްޖެއިން އިސްނަގައިގެން ފަލަޞްޠީނުގެ މައްސަލައަށް އަވަސް ޙައްލެއް ގެނައުމަށްޓަކައި އިސްލާމީ ޤައުމުތައް އެކުވެގެން މަޝްވަރާ ބައްދަލުވުންތަކެއް ބޭއްވުމަށް ވެސް ކެބިނެޓުން މިއަދު ނިންމާފައިވެއެވެ.