ފަލަސްތީނުގެ ގައްޒާގެ ރަފާއަށް އިޒުރޭލުން ދެމުންގެންދާ ހަމަލާތައް ވަގުތުން ހުއްޓާލުމަށް އދ.ގެ އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ)އިން އަމުރުކޮށްފައިވުމުން، މިވަގުތަކީ އިޒްރޭލުގެ އަމަލުތަކާ ދެކޮޅަށް ތެދުވުމަށް އެންމެ ރަނގަޅު ވަގުތު ކަމަށް ސަރުކާރާ އިދިކޮޅު އެންމެ ބޮޑު ޕާޓީ، އެމްޑީޕީން މިރޭ ބުނެފިއެވެ.

އައިސީޖޭގެ އަމުރު ތަންފީޒު ކުރުމަށް ގޮވާލައި އެމްޑީޕީން މިރޭ ނެރުނު ބަޔާނުގައި ބުނެފައި އިޒްރޭލާ ދެކޮޅަށް ބައިނަލްއަގްވާމީ އިދާރާތަކުން ނެރެފައިވާ ގަރާރުތަކާއި އަމުރުތައް ވަގުތުން ވަގުތަށް ތަންފީޒު ކުރަންޖެހޭ ކަމަށެވެ.

"އިޒްރޭލުގެ އަމަލުތަކާ ދެކޮޅަށް ތެދުވުމަށް މިއީ އެންމެ ރަނގަޅު ވަގުތު ކަމަށްވާއިރު ބައިނަލްއަގްވާމީ އިދާރާތަކުން އިޒްރޭލާ ދެކޮޅަށް ނެރެފައިވާ ގަރާރުތަކާއި އަމުރުތައް ވަގުތުން ވަގުތަށް ތަންފީޒު ކުރުމަށް ވެސް މި ޕާޓީން ގޮވާލަމެވެ،" އެމްޑީޕީން ނެރުނު ބަޔާނުގައިވެއެވެ.

އެ ބަޔާނުގައި ބުނެފައި ވަނީ ގައްޒާގައި ހާލުގައި ޖެހިފައި ތިބި ފަލަސްތީނުގެ ރައްޔިތުންނަށް ބޭނުންވާ އިންސާނީ އެހީތެރިކަން ވަގުތުން ވަގުތަށް ފޯރުކޮށްދިނުމަށް އައިސީޖޭއިން އަމުރުކޮށްފައިވާ ކަމަށާއި އެ އެންގުމަށް ވެސް ބައިނަލްއަގްވާމީ މުޖުތަމައުއިން ފުރިހަމައަށް އަމަލުކުރަން ޖެހޭނެ ކަމަށެވެ.

މީގެ އިތުރުން ފަލަސްތީނުގެ ރައްޔިތުންގެ ނަސްލު ނައްތާލުމަށް އިޒްރޭލުން ޒަމާނުއްސުރެ ބައިނަލްއަގްވާމީ ގާނޫނުތަކާއި ހިލާފަށް ހިންގަމުންދާ އަމަލުތައް ވަގުތުން ހުއްޓާލުމަށް ގޮވާލާ ކަމަށް ބަޔާނުގައިވެއެވެ.

"އަޅުގަނޑުމެންގެ ދުޢާއަކީ ފަލަސްތީނުގެ ރައްޔިތުން ތަހައްމަލު ކުރަމުންދާ ލާއިންސާނީ އަނިޔާތަކަށް ނިމުމެއް ގެނެސް ފަލަސްތީނުގެ މިނިވަން ދައުލަތެއް ވީ އެންމެ އަވަހަކަށް ގާއިމުވެގެން ދިޔުމެވެ. އާމީން،" އެމްޑީޕީގެ ބަޔާނުގައިވެއެވެ.

އިޒުރޭލުން ގާޒާގައި ހިންގާ ލާއިންސާނީ އަމަލުތަކުގެ މައްސަލަ އައިސީޖޭއަށް ހުށަހެޅީ ދެކުނު އެފްރިކާއިންނެވެ.

އައިސީޖޭއިން މިއަދު ނެރުނު އަމުރުގައި ރަފާއަށް އިންސާނީ އެހީތެރިކަންފޯރުކޮށްދިނުމަށް ރަފާ ބޯޑަރު ހުޅުވާލުމަށް އަމުރުކޮށްފައިވެއެވެ. އިޒުރޭލުގެ ހަމަލާތައް ހުއްޓާލައި، ބޯޑަރު ހުޅުވަން ތާއިދުކޮށް އަމުރު ކުރީ އައިސީޖޭގައި އެ މައްސަލަ ބައްލަވާ 13 ފަނޑިޔާރުންގެ އަގުލަބިއްޔަތުންނެވެ. އެކަމާ ދެކޮޅަށް ދެ ފަނޑިޔާރަކު ވޯޓު ދިނެވެ.