ކާރު ގަނެދޭނެ ކަމަށް ބުނެ އޮޅުވާލައިގެން މީހުންގެ އަތުން ފައިސާ ނަގަމުން އަންނަ ފުލުހެއްގެ މައްސަލަ ބަލަން ފަށައިފިއެވެ.

ސޯޝަލް މީޑިއާގައި ބައެއް ފަރާތްތަކުން އަންނަނީ އެމީހާއާ ގުޅޭ ވާހަކަތައް ހިއްސާ ކުރަމުންނެވެ. އެގޮތުން އެމީހާ އަކީ މީހުންނަށް ކާރު ގަނެދޭނެ ކަމަށް ބުނެ ފައިސާ ނަގަމުން އަންނަ ފުލުހެއް ކަމަށް ބުނެފައިވެއެވެ. ނަމަވެސް އެމީހާއާ މެދު އެއްވެސް ފިޔަވަޅެއް އަޅާފައި ނުވާ ކަމަށް ބައެއް ފަރާތްތަކުން ކޮށްފައިވާ ޕޯސްޓުގައިވެއެވެ.

އެކަމާއި ގުޅިގެން ފުލުހުންގެ ތަރުޖަމާން އަހްމަދު ޝިފާން މިރޭ ވިދާޅުވީ އެ ފުލުސް މީހާގެ މައްސަލަ ދިވެހި ފުލުހުންގެ ހިދުމަތުގެ ޕްރޮފެޝަނަލް ސްޓެންޑާޑްސް ކޮމާންޑް އިން ތަހުގީގުކުރަމުންދާ ކަމަށެވެ. އިތުރު ތަފްސީލެއް ހާމައެއް ނުކުރެއެވެ.

ފުލުހުންނާއި ގުޅޭ މިފަދަ މައްސަލަތައް މީގެކުރިންވެސް ބަލާ ފިޔަވަޅު އަޅާފައި އެބަހުއްޓެވެ.