ރާއްޖޭގެ ހާއްސަ އިގްތިސޯދީ ސަރަހައްދުތައް ތަރައްގީ ކުރުމަށް ޔޫއޭއީގެ އިންޓަނޭޝަނަލް ފްރީ ޒޯން އޮތޯރިޓީ (އިފްޒާ) އާއެކު އެއްބަސްވުމެއްގައި ސޮއިކޮށްފިއެވެ.

މީރޫމާގައި މިއަދު ބޭއްވި ރަސްމިއްޔާތެއްގައި އެ އެއްބަސްވުމުގައި ރާއްޖޭގެ ފަރާތުން ސޮއި ކުރެއްވީ އިކޮނޮމިކް މިނިސްޓަރު މުހައްމަދު ސައީދެވެ އަދި އިފްޒާގެ ފަރާތުން އެއްބަސްވުމުގައި ސޮއި ކުރެއްވީ އެކުންފުނީގެ ޗެއާމަން މާޓިން ގްރެގާސް ޕެޑެސެންއެވެ.

އެ ރަސްމިއްޔާތުގައި ވާހަކަދައްކަވަމުން ސައީދު ވަނީ 4 މަސް ދުވަސް ނުވަތަ 5 މަސް ދުވަހުގެ ތެރޭގައި އެއްބަސްވުމަކަށް އާދެވޭނެ ކަމަށާއި އެއާއެކު އުތުރާއި ފުނަދޫގެ ފައިނޭންޝަލް ސެންޓަރ ބިލްޑް ކުރުމުގެ މަސައްކަތް ކުރިއަށް ގެންދެވޭނެކަން ފާހަގަކުރައްވައިފައެވެ.

މި އެއްބަސްވުމުގެ ދަށުން މިހާރު ސަރުކާރުގެ މައި ވިޔަފާރި ކުންފުނި އެސްޓީއޯ އިން ތެޔޮ ރައްކާކުރާ ރަށް ކ. ފުނަދޫގައި ފައިނޭންސިން ހަބެއް ގާއިމް ކުރެވިގެން ދާނެއެވެ. އަދި މާލެއާއި ހުޅުލެ ދޭތެރޭ ބްރިޖަކުން ފުނަދޫ ގުޅާލާއިރު އެ މަސައްކަތްތައް ކުރިޔަށް ގެންދާނީ އިފްޒާގެ ހަރަދުގައި ކަމަށް އިކޮނޮމިކް މިނިސްޓްރީން ބުނެއެވެ.