ވެލާނާ އިންޓަނޭޝަނަލް އެއާޕޯޓު (ވީއައިއޭ)ގައި މަސައްކަތް ކުރާ މުވައްޒަފުންތަކަކަށް ހަމަލާދިން ބިދޭސީއަކު ހައްޔަރު ކޮށްފިއެވެ.

އެ ބިދޭސީ މީހާ އެއާޕޯޓުގެ މުވައްޒަފުންތަކަކަށް ހަމަލާދޭ މަންޒަރު ފެންނަ ވީޑިއޯ ސޯޝަލް މީޑިއާގައި އަންނަނީ މިހާރު ދައުރުވަމުންނެވެ. އެ ވީޑިއޯ އިން ފެންނަ ގޮތުގައި އެމީހާ އަކީ އެއާޕޯޓަށް ފުރަން ގޮސް އުޅުނު ޕަސިންޖަރެކެވެ. އަދި ރުޅި އައިސްގެން ހުރެ އެމީހާ އެއާޕޯޓުގެ މުވައްޒަފެއްގެ ގައިގައި ގޮށް މުށުން ޖަހާ މަންޒަރު ފެނެއެވެ.

އެ މުވައްޒަފު ގައިގާ ބިދޭސީ މީހާ ޖެހުމުން އިތުރު މުވައްޒަފަކު އެ ބިދޭސީ މީހާ ކޮށްޕާ މަންޒަރުވެސް ފެނެއެވެ. އެއާއެކު އޭނާ ކޮށްޕާލި މުވައްޒަފު ގައިގާ ވެސް ޖަހާ މަންޒަރު ވީޑިއޯ އިން ފެނެއެވެ.

ފުލުހުން މިއަދު ބުނީ މިއަދު ހެނދުނުގެ ވަގުތެއްގައި އެއާޕޯޓުގައި މާރާމާރީ ހިންގި ކަމަށް ތުހުމަތު ކުރެވޭ ބިދޭސީ ފިރިހެނަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ.