އަންނަ އާދީއްތަ ދުވަހު އޮންނަ ރައްޔިތުން މަޖިލިސް އިންތިހާބުގައި ވޯޓުލާ ވަގުތު އިލެކްޝަންސް ކޮމިޝަން (އީސީ) އިން އިތުރުކޮށްފިއެވެ.

އިލެކްޝަންސް އިން އެގޮތަށް ނިންމީ ދެ ގޮތަކަށް ވިސްނުމަށް ފަހުއެވެ. އެއީ މޫސުން މިހާރު އޮތް ގޮތުން ވޯޓުލާ ދުވަހު ބޯކޮށް ވާރޭ ވެހިއްޖެ ނަމަ ވޯޓުލާން ނިކުންނަ މީހުންގެ އަދަދު މަދު ވެދާނެތީއެވެ. އަދި އެ ދުވަހު ހޫނުގަދަ ނަމަ މެންދުރުގެ ވަގުތުގައި ވޯޓުލާން ނިކުންނަ މީހުންގެ އަދަދު ވެސް މަދުވެދާނެ ކަމަށް ބެލުމަށްފަހުއެވެ.

އެހެންކަމުން އިލެކްޝަންސް އިން މިހާރު ނިންމާފައި ވަނީ އާދިއްތަ ދުވަހުގެ ހެނދުނު 8:00 އިން ހަވީރު 5:30 އަށް ވޯޓުލުން ކުރިއަށް ގެންދިއުމަށެވެ.

މިހާރު 86 މެންބަރުން ތިއްބެވި މަޖިލީހަށް މި އަހަރު 93 މެންބަރުން އިންތިހާބު ކުރަން ޖެހޭނެއެވެ. މި އިންތިހާބުގައި 284،663 މީހަކަށް ވޯޓުލުމުގެ ހައްގު ލިބިފައިވާ ކަމަށް އީސީން ބުނެއެވެ.