ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހައްދުންމަތީގެ ރަށްތަކަށް ކުރައްވާ ދަތުރުފުޅެއްގައި މިއަދު ފުރާވަޑައިގެންފިއެވެ.

ރައީސުލްޖުމްހޫރިއްޔާގެ މި ދަތުރުފުޅުގައި ހައްދުންމަތީގެ ބައެއް ރަށްތަކަށް ޒިޔާރަތްކުރައްވައި، އެ ރަށްރަށުގެ ރައްޔިތުންނާއި ކައުންސިލްތަކާއި އ.ތ.މ. ކޮމިޓީތަކާ ބައްދަލުކުރައްވައި، އެރަށްރަށުގެ ތަރައްގީ އަށް ބޭނުންވާ ކަންކަމާއި، ރައްޔިތުން އެންމެ އެދޭކަންކަމާ ގުޅޭގޮތުން މަޝްވަރާ ކުރައްވާނެ ކަމަށް ރައީސް އޮފީހުން ބުންޏެވެ.

މި ދަތުރުފުޅުގައި ރައީސުލްޖުމްހޫރިއްޔާގެ އަރިހުގައި ސަރުކާރުގެ މަތީފަންތީގެ ވަފުދެއް ބައިވެރިވެވަޑައިގަންނަވައެވެ.

ރައީސް އޮފީހުގެ މިނިސްޓާ އެޓް ދަ ޕްރެޒިޑެންޓްސް އޮފީސް ފީ ސްޓްރެޓީޖިކް ކޮމިއުނިކޭޝަން އިބްރާހީމް ހަލީލް "ހަތާވީސް" އަށް މިއަދު ވިދާޅުވީ މި ހައްދުންމައްޗަކީ ރައީސް ފެއްޓެވި މި ދަތުރުފުޅަކީ ރަމަޟާން މަސް ފެށުމުގެ ކުރީން އެމަނިކުފާނު ރަށްރަށަށް ކުރައްވަމުން ގެންދެވި ދަތުރުފުޅުގެ ތެރެއިން ވަޑައިނުގަނެވުނު އަތޮޅެއް ކަމަށެވެ.

މި ދަތުރުފުޅަށްފަހު މާދަމާ ރައީސް އައްޑޫ ސިޓީ އަށް ވަޑައިގަންނަވާނެއެވެ. ނަމަވެސް އައްޑޫ އަށް ރައީސް ވަޑައިގަންނަވަނީ ކެމްޕެއިން ދަތުރުފުޅެއްގައެވެ.