މިސްކިތެއްގެ ފާހާނާ ތެރޭގައި ކުޑަކުއްޖަކަށް ބުލީކޮށް، އަނިޔާކުރާ މަންޒަރު ފެންނަ ވީޑިއޯއެއް ސޯޝަލް މީޑިއާގައި އާންމުވުމުން އެ ކުއްޖާއަށް އަނިޔާކުރި ބަޔަކު ދެނެގަނެ، އެކަން ސީރިއަސް މައްސަލައެއްގެ ގޮތުގައި ބަލަމުންދާ ކަމަށް ފުުލުހުން ބުނެފިއެވެ.

މިހާތަނަށް ލިބިފައިވާ މަޢުލޫމާތުން މިކަން ކުރިކަމަށް ޔަޤީން ކުރެވެނީ އއ.ރަސްދޫގައި. ފުލުހުންދަނީ މައްސަލަ ވަރަށް ސީރިއަސް މައްސަލައެއްގޮތުގައި، ތަޙްގީގުކުރަމުން
ޗީފް ސްޕްރިންޓެންޑެންޓް އޮފް ޕޮލިސް އަޙްމަދު ޝިފާން

ސޯޝަލް މީޑިއާގައި އާންމުވެފައިވަ ވީޑިއޯއިން ފެންނަ ގޮތުން ފިރިހެން ކުއްޖަކު މިސްކިތުގެ ފާހާނާ ތެރޭގައި ބަހައްޓައި އެ އުމުރުގެ އެހެން ކުދިންތަކެއް އެ ކުއްޖާއަށް އަނިޔާކުރެއެވެ. އަދި ހުތުރު ބަހުން އެ ކުއްޖާއާ ވާހަކަ ދައްކައި، ކޮޅުފައިން ޖަހާތަން ވެސް ވީޑިއޯއިން ފެނެއެވެ. އަދި އެ ކުއްޖާގެ އަތުގައި އޮތް ފެންފުޅި ބޮލަށް އަޅާލައި، ވަކި ވާހަކަތަކެއް ނުދެއްކުމަށް އިންޒާރު ދީފައިވެއެވެ. އަދި އެގޮތަށް އަނިޔާކުރަން ފެށުމުން، އޭނާ ދޫކޮށްލުމަށް އެދި އެ ކުއްޖާ އާދޭސް ކުރެއެވެ.

ވީޑިއޯކޮށްފައި ވަނީ އެ ކުއްޖާއަށް އަނިޔާކުރި މީހުންނެވެ. އެކަން ކުރަމުންދިޔަ ވަގުތު މިސްކިތުގައި ނަމާދުކުރަމުންދިޔަ އަޑު ވީޑީއޯއިން އިވެއެވެ.

ޗީފް ސްޕްރިންޓެންޑެންޓް އޮފް ޕޮލިސް އަޙްމަދު ޝިފާން ވިދާޅުވީ އެކަން ކުރި ބަޔަކު ދެނެގަތުމުގެ މަސައްކަތް ކުރަމުންދާ ކަމަށެވެ.