މިއަހަރުގެ ރަމަޟާން މަހުން ފެށިގެން ކޮންމެ އަހަރެއްގެ ވެސް ރަމަޟާން މަހުގެ ފަހު 10 އަކީ ސަރުކާރު ބަންދު ދުވަސްތަކެއްގެ ގޮތުގައި ކަނޑައަޅާފައިވީ ނަމަވެސް އެ ދުވަސްތަކުގައި ކޮންމެހެން ދޭން ޖެހޭ ހިދުމަތްތައް ދިނުމަށް މަސައްކަތަށް ނިކުންނަ މުވައްޒަފުންނަށް ހާއްސަ އިނާޔަތެއް ދިނުމަށް ރައީސް ޑރ. މުހައްމަދު މުއިއްޒު ނިންމަވައިފިއެވެ.

އެގޮތަށް ރައީސް ނިންމެވިކަން ހާމަކުރެއްވީ ފިނޭންސް މިނިސްޓަރު މުހައްމަދު ޝަފީގު ނެރުއްވި ސާކިއުލާއެއްގައެވެ. އެ އިނާޔަތް ދޭނީ އަންނަ މަހުގެ މުސާރައާއެކުގައެވެ. އަދި އެ އިނާޔަތްތައް މުއައްސަސާތަކުން ދިން ގޮތުގެ ތަފްސީލުތައް އަންނަ މަހުގެ 18ގެ ކުރިން ފޮނުވަން ވެސް އެދިފައިވެއެވެ.

ފަހު 10ގައި މަސައްކަތަށް ނިކުންނަ ނަމަ އިނާޔަތް ލިބޭ މުވައްޒަފުން:

  • ދައުލަތުގެ ޕޭ ފްރޭމްވޯކަށް ބަދަލު ނުވާ މުވައްޒަފުންނަށް ކުރިންވެސް ދެމުން ގެންދާ އުސޫލުން ވަޒީފާއާ ބެހޭ ގާނޫނުގައި ބަޔާން ކޮށްފައިވާ އިތުރު ގަޑީގެ ފައިސާ އާއި ބަންދު ދުވަހުގެ އިނާޔަތް ލިބޭނެ. މިގޮތަށް އިނާޔަތް ދިނުމުގައި ދުވަހަކަށް ޖެހޭ އަދަދުގެ ދެބައިކުޅަ އެއްބައިގެ އިނާޔަތްތައް ދޭނީ ޑިއުޓީ އުސޫލުން އާއްމުކޮށް މަސައްކަތް ކުރާ މުވައްޒަފުންނަށް.
  • ދައުލަތުގެ ޕޭ ފްރޭމް ވޯކަށް ބަދަލުވެފައިވާ މުވައްޒަފުންނަށް ރަމަޟާން މަހުގެ ފަހު 10 އަކީ ވަޒީފާއާ ބެހޭ ގާނޫނުގައި ބަޔާން ކޮށްފައިވާ ރަސްމީ ބަންދު ދުވަސްތަކެއްގެ ގޮތުގައި ބަލައިގެން ރަސްމީ ބަންދު ދުވަސްތަކުގައި މަސައްކަތް ކުރުމުން ލިބޭނެ ކަމަށް އެ ގާނޫނުގައި ބަޔާން ކޮށްފައިވާ މުސާރައިން ދުވާލަކަށް ޖެހޭ އަދަދުގެ ދެބައިކުޅަ އެއްބަޔާ އެއްވަރުގެ އިނާޔަތެއް ދޭނެ.
  • ދައުލަތުގެ ޕޭ ފްރޭމް ވޯކަށް ބަދަލުވެފައިވާ މުވައްޒަފުން އަމަލު ކުރަން ޖެހޭ "ދައުލަތުގެ ޕޭ ފްރޭމް ފޯކުގެ މިންގަނޑުތައް" ގައި ހިމެނޭ "އިތުރު ގަޑީގެ ފައިސާ ދޭނެ ގޮތުގެ މިންގަނޑު" އަށް އަމަލުކުރަން ޖެހޭ.
  • ޕޭ ފްރޭމްވޯކަށް ބަދަލުވެފައިވާ ފަންނުތަކުގެ މުވައްޒަފުންގެ ތެރެއިން އެ ދުވަސްތަކުގައި މަސައްކަތަށް ނުކުންނަން ޖެހޭ ކަމަށް ކަނޑައަޅާ މުވައްޒަފުން، މަސައްކަތަށް ނުކުތުމުން ދައުލަތުގެ ޕޭ ފްރޭމްވޯކްގެ މިންގަނޑުތަކުގެ ތެރޭގައި ހިމެނޭ "މަގާމަށް ކަނޑައަޅާފައިވާ މުސާރަ އާއި އިނާޔަތުގެ މިންގަނޑު" ގެ ދަށުން ހާޒިރީ އިނާޔަތް ލިބޭނެ.