ވެލާނާ އިންޓަނޭޝަނަލް އެއާޕޯޓު (ވީއައިއޭ)ގައި ސްމާޓް ގޭޓުގެ ހިދުމަތް މިއަދު ގާއިމްކޮށްފިއެވެ. މިއީ ރައީސް ޑރ. މުހައްމަދު މުއިއްޒުގެ ވެރިކަމުގެ 14 ހަފްތާގެ ތެރޭގައި މޯލްޑިވްސް ކަސްޓަމްސް އިން ހާސިލްކުރުމަށް ނިންމާފައިވާ ކަންތައްތަކުގެ ތެރޭގައި ހިމެނޭ ހިދުމަތެކެވެ.

އެ އިފްތިތާހު ކޮށްފައި ވަނީ އެކަމަށްޓަކައި މިއަދު ހެނދުނު ވެލާނާ އިންޓަނޭޝަނަލް އެއާޕޯޓްގެ ޕެސެންޖާ ޓާމިނަލްގައި ބޭއްވުނު ހާއްސަ ހަފްލާއެއްގައި މޯލްޑިވްސް އެއާޕޯޓްސް ކޮމްޕެނީ ލިމިޓެޑްގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފް މުހައްމަދެވެ.

އެ ހަފްލާގައި ވާހަކަދައްކަވަމުން ޝަރީފް ވިދާޅުވީ މިއަދު ކަސްޓަމްސް އިން ތައާރަފްކުރި ސްމާޓް ގޭޓްގެ ސަބަބުން އެއާޕޯޓުން ފަސިންޖަރުންނަށް ދެމުންގެންދާ ހިދުމަތުގެ ފެންވަރު ރަގަޅުކުރެވި އަވަސް ހިދުމަތެއް ދިނުމަށް މަގުފަހި ކުރެވިގެންދާ ކަމަށެވެ.

"އަޅުގަނޑުމެން މިތިބީ އެއާޕޯޓުގެ ސްޓޭކް ހޯލްޑަރުންނާއި އެންފޯސްމަންޓް އެޖެންސީތަކާއި ގުޅިގެން، މި އެއާޕޯޓުގެ ހިދުމަތް ހޯދާ ފަރާތްތަކަށް މިހާރަށްވުރެ ފަސޭހަކޮށް ހިދުމަތް ދިނުމަށް ތައްޔާރަށް. މިއަދު މި ފެށުނީ އޭގެތެރެއިން މުހިއްމު ކަމެއް. މީގެ ސަބަބުން ފަސިންޖަރުންނަށް ދެވޭ ހިދުމަތް އަވަސްވެ، ދިމާވާ އިންކޮންވީނިއަންސް ހައްލުކުރެވޭނެ" ޝަރީފް ވިދާޅުވިއެވެ. މީގެ އިތުރުން އާ ޓާމިނަލް އާއި ގުޅިގެން ތަރަގީ ކުރަންޖެހޭ ކަންކަން ހަލުވި ސްޕީޑްގައި ކުރަމުންދާ ކަމަށް ވެސް ޝަރީފްގެ ވާހަކަފުޅުގައި ވިދާޅުވިއެވެ.

މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މިއަދު ބުނީ ދިވެހިރާއްޖެއަކީ ފަތުރުވެރިންގެ މެދުގައި އެންމެ މަގުބޫލް އެއް މަންޒިލުކަމަށްވާއިރު، އަހަރުން އަހަރަށް ރާއްޖެ އަންނަ ފަތުރުވެރިންގެ އަދަދު އިތުރުވަމުން އަންނަ ކަމަށެވެ. އަދި ވެލާނާ އިންޓަނޭޝަނަލް އެއާޕޯޓު (ވީއައިއޭ) އިން ހިދުމަތް ހޯދާ ދަތުރުވެރިންގެ ބޮޑު އިންސައްތަ އަކީ ފަތުރުވެރިން ކަމަށްވެފައި، ވީއައިއޭ އިން ދެވޭ ހިދުމަތަކީ ގާނޫނާ ގަވާއިދުތަކުގެ އިމުގެ ތެރެއިން އަވަސް އަދި ލުއިފަސޭހަ ހިދުމަތަކަށް ވުމަކީ ރާއްޖޭގެ އިގްތިސޯދަށް ވަރަށް މުހިއްމު ކަމެއް ކަމަށެވެ.

އެހެންކަމުން މިއަދު އިފްތިތާޙް ކުރެވުނު "ސްމާޓް ގޭޓް" ވެގެން ދާނީ ދަތުރުވެރިންނަށް ފަސޭހަކަމާއި އެކު ކަސްޓަމްސް ކްލިއަރަންސް ފުރިހަމަކުރުމަށް މުހިއްމު ވަސީލަތަކަށް ކަމަށް އެމްއޭސީއެލް އިން ބުންޏެވެ.

މިވަގުތު ކަސްޓަމްސްގެ ރިސްކް މެނޭޖްމަންޓް ސިސްޓަމްގެ ތެރެއިން ދަތުރުވެރިންގެ ލަގޭޖް ސްކޭން ކުރަމުންދާއިރު އިތުރަށް ބަލަންޖެހޭ ލަގޭޖްތަކުގައި ރަތް ސްޓިކާ ހަރުކުރެވި، "ރެޑް ޗެނަލް" އިން ލަގޭޖްތައް ހުޅުވައި، އިތުރަށް ބަލާ ފާސްކުރަމުން ގެންދެއެވެ. ސްމާގް ގޭޓް ހިދުމަތާއިއެކު، ކުރިން ބޭނުންކުރަމުން އައި ރަތް ސްޓިކާގެ ބަދަލުގައި ދެން ބޭނުންކުރަމުން ދާނީ "ރޭޑިއޯ ފްރީކުއަންސީ އައިޑެންޓިފިކޭޝަން (އާރް.އެފް.އައި.ޑީ) ޓެގް" އެވެ.

އެހެންކަމުން މިޓެގް ހަރުކުރެވޭ ލަގޭޖްގެ ވެރިފަރާތުން ރެޑް ޗެނަލަށް ވަޑައިގެން ކަސްޓަމްސް ކްލިއަރަންސް ހޯދަންޖެހޭނެއެވެ. އަދި ކަސްޓަމްސް ކްލިއަރަންސް ފުރިހަމަނުކޮށް ނިކުތުމަކީ ކަސްޓަމްސްގެ ގާނޫނާއި ގަވާއިދާ ހިލާފްކަމެކެވެ. އެގޮތަށް ނިކުތުމަށް މަސައްކަތް ކުރާ ދަތުރުވެރިންގެ ލަގޭޖް ސްމާޓް ގޭޓުން އައިޑެންޓިފައިކޮށް އެލާމް އަޅާނެެއެވެ.

މީގެ އިތުރުން، އެ ހިދުމަތާއި އެކު ގްރީން ޗެނަލްއިން ކްލިއަރަންސް ލިބެންޖެހޭ ދަތުރުވެރިންގެ ކްލިއަރަންސް ޕްރޮސެސް އިތުރަށް އަވަސްވެ އެއްވެސް ހުރަހެއް ނެތި، ފުރިހަމަކުރެވިގެންދާނެއެވެ.